ព័ត៌មានថ្ងៃនេះ ​អតីត​អ្នក​បើក​ឡាន​ក្រុមហ៊ុន​ភ្នំពេញ​សូរិយា​គ្រោង​ជួប​ចរចា​ជាមួយ​ភាគី​ក្រុមហ៊ុន​នៅ​រសៀល​ថ្ងៃ​ស្អែក​នេះសហគមន៍​ស្រុក​ស្រែអំបិល​នឹង​ហែ​ញត្តិ​ដាក់​ទៅ​អាជ្ញាធរ​មូលដ្ឋានឲ្យ​ជួយ​ដោះស្រាយ​ជម្លោះ​ដីធ្លី​ក្រសួង​ដែនដី សម្រេច​ចេញ​ប្លង់​កម្មសិទ្ធិ​ដីធ្លី​ដល់​ប្រជាពលរដ្ឋ​ខេត្តក្រចេះ​ដើម្បី​បញ្ចប់​ការតវ៉ា​សុំ​អន្តរាគមន៍​ពី​នាយក​រដ្ឋមន្ត្រី​រដ្ឋមន្ត្រី​ក្រសួង​អប់រំ​៖ មិន​ទាន់​កំណត់​ថា​តើ​បេក្ខជន​ប្រឡង​លើក​ទី​២ នឹង​ត្រូវ​ឲ្យ​និទេ្ទស​ឬ​យ៉ាងណា​​ក្នុង​១​យប់​១​ថ្ងៃ​មាន​កុមារ​ចំនួន​១២០​នាក់​ត្រូវ​ការសង្គ្រោះ​បន្ទាន់​នៅក្នុង​មន្ទីរពេទ្យ​គន្ធបុប្ផា​​សិស្ស​ប្រឡង​ជាប់​និង​ធ្លាក់​បាក់​ឌុប​នៅ​ក្នុង​វិទ្យាល័យ​ស្វាយរៀង​បង្ហាញ​អារម្មណ៍​ផ្សេងៗ​គ្នា​​អនុគុណ​និង​ចៅ​សង្កាត់​ជ្រោយចង្វា​រកោះ​និមន្ដ​ចៅអធិការ​វត្តមួយ​ដែល​ឲ្យ​អ្នក​តវ៉ា​ដីធ្លីស្នាក់នៅ​ទៅ​សាកសួរ​សាលា​អន្តរជាតិ​ហ្វ្រេដ​ហ្វ​ត​ប្រកាស​ផ្តល់​ជំនួយ​ដល់​ក្មេង​ប្រុស​រង​ការធ្វើ​ទារុណកម្ម​ដោយសារ​លួច​ផ្លែ​ដូង​​ក្រសួង​ធនធានទឹក អំពាវនាវ​ឲ្យ​ពលរដ្ឋ​ប្រុងប្រយ័ត្ន​១​សប្តាហ៍​ចាប់ពី​ថ្ងៃ​ទី​៣០​ខែសីហា​ទៅ​​ពលរដ្ឋ​ប្រមាណ​២០០​នាក់​ដែល​មាន​ជម្លោះ​ដីធ្លី​នៅ​ខេត្តកោះកុង​ចែក​ខិតបណ្ណ​រក​ការគាំទ្រ
ថ្ងៃអាទិត្យ ទី31 សីហា 2014
អំពីវីអូឌី | ទំនាក់ទំនង

ព័ត៌មានថ្មីបំផុត

ព័ត៌មានក្នុងប្រទេស

មើលព័ត៌មានក្នុងប្រទេសទាំងអស់
  • ​អតីត​អ្នក​បើក​ឡាន​ក្រុមហ៊ុន​ភ្នំពេញ​សូរិយា​គ្រោង​ជួប​ចរចា​ជាមួយ​ភាគី​ក្រុមហ៊ុន​នៅ​រសៀល​ថ្ងៃ​ស្អែក​នេះ

    ថ្ងៃអាទិត្យ ទី31 សីហា 2014 | 1 ម៉ោង មុន

    ​អតីត​បុគ្គលិក​បើកបរ​រថយន្ត ក្រុមហ៊ុន​ភ្នំពេញ​សូរិយា​ដឹក​អ្នកដំណើរ ដែល​ត្រូវបាន​បញ្ឈប់​បន្ទាប់ពី​បង្កើត​សហជីព គ្រោង​ជួប​ចរចាជាមួយ​ភាគី​ក្រុមហ៊ុន​ជាថ្មីទៀត នៅ​រសៀល​ថ្ងៃ​ចន្ទ ស្អែក​នេះ ដើម្បី​បញ្ចប់​ជម្លោះ​ជាង​៥​ខែ​មកនេះ​។​ ​ការចរចា​នេះ ធ្វើឡើងក្រោយពី​ក្រុមប្រឹក្សា​អាជ្ញាកណ្តាល​បង្គាប់​ឲ្យ​ភាគី ក្រុមហ៊ុន​ទទួលយក​អ្នក​បើក​ឡាន​ទាំង​១៧​នាក់​ឲ្យចូល​ធ្វើការ​វិញ តែ​ភាគី​ថៅកែ​មិន​ព្រម​ដោយ​ជំរុញ​ឲ្យ​ប្តឹង​បន្ត​ទៅ​តុលាការ​។  ក្រោយ​មក​អតីត​អ្នក​បើក​ឡាន​ទាំងនោះ​បាន​បាតុកម្ម​នៅខាងមុខក្រុមហ៊ុនជិត​ផ្សារ​ថ្មី​ទាមទារ​ចូលធ្វើការ​វិញ​ តែភាគីក្រុម​ហ៊ុននៅតែមិនព្រមទទួល។​ ​មន្ត្រី​ចងក្រង​សហជីព និង​ដោះស្រាយ​វិវាទ​នៅ​សហភាព​ការងារ​កម្ពុជា លោក អៀន គឹមហ៊ុន មានប្រសាសន៍ថា នៅ​ថ្ងៃស្អែក​នេះ នឹង​មាន​ការចរចារ រវាង​ភាគី​សហជីព និង​ក្រុមហ៊ុន​ហើយ អភិបាលខណ្ឌ​ដូនពេញ និង​លោក សយ សុភាព តំណាង​រដ្ឋាភិបាល​ជា​អ្នកសម្របសម្រួល​។ លោក​ព្រមាន​ថា ប្រសិនបើ​មិន​មាន​ដំណោះស្រាយ​នៅ​ថ្ងៃស្អែក​នេះ​ទេ  ពួកគាត់​នឹង​ធ្វើ​បាតុកម្ម​ជា​ទ្រង់ទ្រាយ​ធំ​ជា​ថ្មី​ទៀត ព្រោះ​ការបញ្ឈប់​នេះ ជា​ការរើសអើង​ដោយសារ​ពួកគាត់​បង្កើត​សហជីព​នៅ​ក្នុង​ក្រុមហ៊ុន​។​ ​លោក អៀន គឹមហ៊ុន បន្ថែមថា ការតវ៉ា អូសបន្លាយ​រហូត​មក​ដល់​បច្ចុប្បន្ន​នេះ ដោយសារ​ភាពកំសោយរ​បស់​រដ្ឋាភិបាល​ក្នុង​ការដោះស្រាយ​បញ្ហា​នេះ​។​ កន្លង​មក​ភាគី​ក្រុមហ៊ុន​បញ្ជាក់ថា ការបញ្ឈប់​បុគ្គលិក​នេះ មិនមែន​ដោយសារ​មូលហេតុ​នៃ​ការបង្កើត​សហជីព​នោះទេ គឺ​ដោយសារ​មិន​មាន​ការងារ​ធ្វើ​។ ភាគី​ក្រុមហ៊ុន​ធ្លាប់​អះអាង​ទៀតថា ការធ្វើ​បាតុកម្ម​នេះ បាន​ធ្វើឲ្យ​រាំងស្ទះ​ការងា​ររបស់​ក្រុមហ៊ុន ធ្វើឲ្យ​ចំនួន​អតិថិជន​ថយចុះ​។​ ​គួរបញ្ជាក់​ថា ការបញ្ឈប់​អ្នកបើកប​រទាំង​១៧​នាក់​នេះ ធ្វើឡើង បន្ទាប់ពី​ពួកគេ​បង្កើត​ក្រុម​សហជីព ហើយ​ផ្ញើរ​បញ្ជីរ​ឈ្មោះ​ផ្លូវការ​ទៅ​ក្រុមហ៊ុន​។ តាម​រដ្ឋធម្មនុញ្ញ​នៃ​ព្រះរាជ​ជាណា​ចក្រ​កម្ពុជា​មាត្រា​៣៦ ត្រង់​ចំណុច​មួយ​ចែង​ថា  ប្រជា​ពលរដ្ឋ​ខ្មែរ​ទាំង​២​ភេទ មាន​សិទ្ធិ​បង្កើត​សហជីព និង​ចូល​ជា​សមាជិក​សហជីព​៕ សូមសរសេរមកអ្នកនាង ថុល ស្រីលក្ខណ៍ តាមរយៈ sreyleak@vodhotnews.com

    [អានបន្ត]
  • សហគមន៍​ស្រុក​ស្រែអំបិល​នឹង​ហែ​ញត្តិ​ដាក់​ទៅ​អាជ្ញាធរ​មូលដ្ឋានឲ្យ​ជួយ​ដោះស្រាយ​ជម្លោះ​ដីធ្លី​

    ថ្ងៃអាទិត្យ ទី31 សីហា 2014, 11:27 AM

    ​ប្រជា​សហគមន៍​ស្រុក​ស្រែអំបិល​ខេត្តកោះកុង​ត្រៀម​ហែ​ញ​តិ្ត​នៅ​ថ្ងៃ​ទី​១៧​ខែ​កញ្ញា​ឆ្នាំ​២០១៤​ខាងមុខនេះ ដើម្បី​ស្វែងរក​កិច្ច​អន្តរាគមន៍ ពី​ស្ថាប័ន​ពាក់ព័ន្ធ​ឲ្យជួយ​ដោះស្រាយ បញ្ហា​ដីធ្លី​របស់​ពួក​គាត់​ជាមួយ​ក្រុមហ៊ុន​ស្ករ​អំពៅ ដែល​អូសបន្លាយ​ជិត​១០​ឆ្នាំ​មកនេះ​។​ ​តំណាង​ក្រុម​ប្រជាពលរដ្ឋ​ដែល​រង​នូវ​ការរំលោភ​ដីធ្លី​ពី​សំណាក់​ក្រុមហ៊ុន​ស៊ូ​ហ្គា​(sugar) និង​ក្រុមហ៊ុន​ផ្លេន​ថេ​សិន​(plantation)​ចំនួន​៣​ភូមិ​គឺ​ភូមិ ត្រពាំង​កណ្ដោល ភូមិ​ឈូក និង​ភូមិ​ជីខ បាន​មក​ជួបជុំគ្នា​នៅ​ព្រឹក​នេះ​ដើម្បី​រក​វិធីសាស្ដ្រ​ដាក់​ញាតិ​ប្រកបដោយ​ប្រសិទ្ធិភាព​។​ ​លោក​យិន ជៀវ​ ជា​តំណាង​ប្រជាពលរដ្ឋ​មកពី​ភូមិ​ឈូក​បាន​ប្រាប់​VOD​ឲ្យដឹង​នៅ​ព្រឹក​នេះ​ថា ញ​តិ្ត​ដែល​ពួកគាត់​ត្រៀម​ដង្ហែ​នោះ គ្រោង​ដាក់​នៅ​កន្លែង​ទី​មួយ​គឺ​ដាក់​នៅ​សាលាឃុំ​ជីខ​លើ ទី​ពីរ​គឺ​សាលា​ស្រុក​ស្រែអំបិល​។ លោក​បន្តថា​មូលហេតុ​ចម្បង​នៃ​ការដាក់​ញត្តិ​នោះ​គឺ​ដើម្បី​ឲ្យ​អាជ្ញាធរ​និង​រដ្ឋអំណាច​ទាំងនោះ​មាន​ចំណាត់ការ​ដោះស្រាយ​ជូន​ពួកគាត់ ឲ្យ​ក្រុមហ៊ុន​ប្រគល់​ដី​កម្មសិទ្ធិ​សង​មកវិញ​ដោយ​គ្មាន​លក្ខខណ្ឌ​។ ​ទោះបីជា​យ៉ាងណា​ក៏ដោយ​ លោក​យិន ជៀវ​ ក៏​បាន​បង្ហាញ​នូវ​អារម្មណ៍​សុទិដ្ឋិនិយម​ថា បើសិនជា​ពួកគាត់​គ្មាន​ដំណោះស្រាយ​ណាមួយ​ពី​អាជ្ញាធរ​នៅ​ថ្នាក់​មូលដ្ឋាន​ឃុំ ស្រុក​នោះ​ទេ ពួកគាត់​នឹង​បន្ដ​ដាក់​ញ​តិ្ត​ទៅ​ថ្នាក់​ខេត្ត ក្រសួង និង​ស្ថាប័ន​ដែល​ពាក់ព័ន្ធ​ផ្សេងៗ​ជាពិសេស​គឺ​ខុទ្ទកាល័យ​លោក​ហ៊ុន​សែន​បន្ដទៀត​។​ ​នៅ​ថ្ងៃ​ម្សិលមិញ​ប្រជា​សហគមន៍​ទាំង​បី​ភូមិ​បាន​ចែក​ខិត​បណ្ណ​ផ្សព្វផ្សាយ​ដល់​សាធារណជន​នៅ​តាម​ផ្លូវជាតិ​លេខ​៤៨​ស​ដើម្បី​បង្ហាញ​ពី​គោលជំហរ​ត្រៀម​ដង្ហែ​ញ​តិ្ត​នៅ​ថ្ងៃ​ទី​១៧​ខែ​កញ្ញា​ឆ្នាំ​២០១៤​ខាងមុខនេះ​។​ ​ជម្លោះ​ដីធ្លី​នៅ​ឃុំ​ជីខ​លើ​ស្រុក​ស្រែអំបិល​ខេត្ត​កោះកុង ជាមួយ​ក្រុមហ៊ុន​ស្ករអំពៅ បានអូសបន្លាយ​តាំងពី​ឆ្នាំ​២០០៦ ហើយ​បច្ចុប្បន្ន​នៅ​ប៉ះពាល់​ដី​ប្រជាពលរដ្ឋ​២០០​គ្រួសារ​លើ​ទំហំ​ដី​ជាង​១០០០​ហិកតា​៕ សរសេរ​មកកាន់លោក ប៉ែន ប៉ូលីន តាមរយៈ​ penpoline@yahoo.com.au

    [អានបន្ត]
  • ក្រសួង​ដែនដី សម្រេច​ចេញ​ប្លង់​កម្មសិទ្ធិ​ដីធ្លី​ដល់​ប្រជាពលរដ្ឋ​ខេត្តក្រចេះ​ដើម្បី​បញ្ចប់​ការតវ៉ា​សុំ​អន្តរាគមន៍​ពី​នាយក​រដ្ឋមន្ត្រី​

    ថ្ងៃអាទិត្យ ទី31 សីហា 2014, 10:29 AM

    ក្រសួង​ដែនដី នគរូបនីយកម្ម និង​សំណង់ សម្រេច​ចេញ​ប័ណ្ណកម្មសិទ្ធិ​ដីធ្លី​ជូន​ប្រជាពលរដ្ឋ​មាន​ជម្លោះ ដីធ្លី​ស្រុក​ស្នួល ខេត្ត​ក្រចេះ ជាង​៣០០​គ្រួសារ ដែល​តែងតែ​ឡើង​មក​ភ្នំពេញ​សុំ​អន្តរាគមន៍​ពី​លោក​នាយករដ្ឋមន្ត្រី​ហ៊ុន សែន​។  ​សេចក្តីប្រកាស​ព័ត៌មាន​របស់​ក្រសួង ចេញផ្សាយ​នៅ​ថ្ងៃទី​៣០​ខែ​សីហា ឲ្យដឹងថា ក្រសួង​នឹង​ចេញ​ប័ណ្ណកម្មសិទ្ធិ​ដីធ្លី​ជូន​ប្រជាពលរដ្ឋ​ចំនួន​៣២៩​គ្រួសារ ដែល​រស់នៅ​ភូមិ​ថ្ពង និង​ភូមិ​គ្រង ឃុំ​ស្នួល ស្រុក​ស្នួល ខេត្ត​ក្រចេះ តាម​សំណើ​របស់​ប្រជាពលរដ្ឋ​ចំនួន​៣២៩​គ្រួសារ ដែល​សុំ​ជួយ​អន្តរាគមន៍​ផ្តល់​ប័ណ្ណកម្មសិទ្ធិ​ដីធ្លី​លើដី​ចំនួន​២៩១​ក្បាលដី មាន​ទំហំ​១៥៦២,៧៥​ហិកតា​។ ក្រសួង​អំពាវនាវ​ឲ្យ​ប្រជាពលរដ្ឋ​មាន​ការពាក់ព័ន្ធ​នឹង​ក្បាលដី​ខាងលើ អញ្ជើញ​ទៅ​ទទួលយក​ប័ណ្ណកម្មសិទ្ធិ​ដីធ្លី​របស់​ខ្លួន​នៅ​សាលា​ខេត្តក្រចេះ នៅ​ថ្ងៃ​ពុធ​ទី​០៣​ខែ​កញ្ញា ឆ្នាំ​២០១៤ ចាប់ពី​ម៉ោង​០៩​ព្រឹក​តទៅ​។ ចំពោះ​អ្នក​ខកខាន​មិន​បាន​ទៅ​ទទួល​យក​ប័ណ្ណកម្មសិទ្ធិ​តាម​ពេល​កំណត់​ខាងលើ ពួកគេ​អាច​ទៅ​ទទួលយក​នៅ​មន្ទីរ​រៀបចំ​ដែនដី នគរូបនីយកម្ម សំណង់ និង​សុរិយោដី ខេត្ត​ក្រចេះ រៀង​រាល់​ម៉ោង​ធ្វើការ​។​ ​ក្រុម​ពលរដ្ឋ​អ្នក​តវ៉ា​ដែល​ឡើង​មក​ភ្នំពេញ ឲ្យដឹងថា​ក្នុង​ចំណោម​ពួក​គាត់​៣៨០​គ្រួសារ​នោះ មាន​៣២៩​គ្រួសារ ត្រូវបាន​ក្រុម​និស្សិត​ចុះ​វាស់វែង​កំណត់​ព្រំ​ដី​រួចរាល់​ហើយ កាលពី​ជាង​២​ឆ្នាំមុន ប៉ុន្តែ​នៅ​ថ្ងៃទី​៨ ខែកក្កដា ឆ្នាំ​២០១៤ សុរិយោដី​ខេត្ត បែរ​ជា​ចេញ​សេចក្តីសម្រេច កាត់​ដី​អ្នកភូមិ​នៅ​តំបន់​នោះ​ដាក់​ជា​ដី​រដ្ឋ​ទៅ​វិញ ទើប​ផ្ទុះ​ការតវ៉ា​ដល់​រាជធានី​ភ្នំពេញ​។  លោក ឈា លីមហាជ អាយុ៤៣ឆ្នាំ ជាពលរដ្ឋមានជម្លោះដីធ្លី ប្រាប់VODថា ក្រុមប្រជាពលរដ្ឋ នឹងត្រឡប់ទៅខេត្តក្រចេះវិញនៅថ្ងៃចន្ទស្អែកនេះ ដើម្បីទទួលប័ណ្ណកម្មសិទ្ធិដីធ្លី។ តែលោកថាប្រជាពលរដ្ឋ៥១គ្រួសារទៀត នឹងបន្តសុំអន្តរា​គមន៍ករណីឈ្មោះរបស់ពួកគាត់ត្រូវបានកាត់ចេញពីទិន្នន័យបិទផ្សាយ ពេលនិស្សិតចុះវាស់វែងដីឲ្យ។ ​កន្លងទៅ​លោកនាយក​រដ្ឋមន្ត្រី​ហ៊ុន សែន បានប្រកាស​កាត់​ដី​ទំហំ​៧៥០​ហិកតា​នៅ​ស្រុក​ស្នួល ខេត្ត​ក្រចេះ ឲ្យ​ក្រុមអ្នកតវ៉ា​ជាង​៤០០​គ្រួសារ ដើម្បី​បញ្ចប់​ជម្លោះ​។ ប៉ុន្តែ​នៅ​ថ្ងៃទី​៨ ខែកក្កដា ឆ្នាំ​២០១៤ សុរិយោដី​ខេត្ត បែរ​ជា​ចេញ​សេចក្តីសម្រេច កាត់​ដី​អ្នកភូមិ​នៅ​តំបន់​នោះ​ដាក់​ជា​ដី​រដ្ឋ​ទៅ​វិញ ទើប​ផ្ទុះ​ការតវ៉ា​ដល់​រាជធានី​ភ្នំពេញ​៕ ​សរសេរ​មកកាន់​លោក ស៊ុន ណារិន តាមរយៈ​sun_narin@vodhotnews.com

    [អានបន្ត]
  • រដ្ឋមន្ត្រី​ក្រសួង​អប់រំ​៖ មិន​ទាន់​កំណត់​ថា​តើ​បេក្ខជន​ប្រឡង​លើក​ទី​២ នឹង​ត្រូវ​ឲ្យ​និទេ្ទស​ឬ​យ៉ាងណា​

    ថ្ងៃអាទិត្យ ទី31 សីហា 2014, 09:44 AM

    រដ្ឋមន្ត្រី​ក្រសួង​អប់រំ យុវជន និង​កីឡា លោក ហង់ ជួន ណារ៉ុន ឲ្យដឹងថា ក្រសួង​មិន​ទាន់​កំណត់​ថា​តើ​បេក្ខជន​ប្រឡង​ថ្នាក់​ទី​១២ លើក​ទី​២ នឹង​ត្រូវ​ឲ្យ​និទេ្ទ​សឬ​យ៉ាងណា​នៅឡើយ​ទេ​។​ ​ក្នុង​បទសម្ភាសន៍​ជាមួយ​VOD​នៅ​ថ្ងៃ​អាទិត្យ​នេះ លោក ហង់ ជួន ណារ៉ុន មានប្រសាសន៍ថា ក្រសួង​កំពុង​តែពិចារណា និង​ទុក​ឲ្យ​មតិ​ភាគច្រើន​ជា​អ្នកសម្រេច តែ​លោក​បាន​លើក​ជា​ឧទាហរណ៍​ប្រៀបធៀប​ទៅ​នឹង​ទឹក​ពីរ​កែវ​ពេញ​ដូចគ្នា ដោយ​គ្រាន់​តែ​មួយ​ពេញ​មុន និង​មួយទៀត​ពេញ​ក្រោយ តើ​មួយណា​ពេញ​ច្រើនជាង​។ លោ​កញ្ជាក់ថា​«​ទុក​ឲ្យ​មតិ​ភាគច្រើន​សម្រច​...​ចំណេះដឹង​មុន​ក្តី ក្រោយ​ក្តី ជួនកាល អ្នក​ក្រោយ គេ​លើស​ជាង​អ្នក​មុន ដោយសារ​គេ​ខំ​ប្រឹង​រៀន​»​។​ ​ក្រសួង​អប់រំ យុវជន និង​កីឡា ប្រកាស​ថា​បេក្ខជន​ជាប់​ជា​ស្ថាពរ​នៃ​ការប្រឡង​ថ្នាក់​ទី​១២ មាន​ចំនួន​២៣១២៦​នាក់ ត្រូវជា​២៥,៧២​ភាគរយ​តែ​ប៉ុណ្ណោះ បើ​ប្រៀបធៀប​នឹង​ឆ្នាំ​២០១៣ មាន​ទៅ​ដល់​៨៦,៧៧​ភាគរយ​។ ការប្រឡង​បាក់​ឌុប​លើក​ទី​២ នឹង​ត្រូវ​ធ្វើឡើង​នៅ​ថ្ងៃទី​១៣​និង​ទី​១៤​ខែតុលា ឆ្នាំ​២០១៤​។​ការប្រឡង​បាក់​ឌុប​ឆ្នាំ​សិក្សា​២០១៣-២០១៤ សិស្ស​ជាប់​និទ្ទេស​A​ទូទាំង​ប្រទេស មាន​ចំនួន​១១​នាក់  និទ្ទេស​B ២១៩ នាក់ និទ្ទេស​C៩០៧ នាក់ និ​ទេ្ទស​D ១៨២៣​នាក់ និង​និទ្ទេស E​ចំនួន ២០១៥៧​នាក់​។ សិស្ស​ប្រឡង​ថ្នាក់​ទី​១២ មាន​ចំនួន​៨៩៩៣៧​នាក់​។​ នាយកប្រតិបត្តិនៃអង្គការកម្មវិធីអភិវឌ្ឍន៍ធនធានយុវជនកម្ពុជា(YRDP) លោក​ជាង សុខា យល់ថា ការប្រឡងលើកទីពីរនេះ គួរតែមានការប្រើប្រាស់ស្តង់ដារតែមួយ ដើម្បីជៀសវាងការមិនពេញចិត្ត និងទំនាស់អ្វីមួយកើតឡើងចេញពីក្រុមដែលប្រឡងជាប់។ លោកបន្តថាក្រសួងគួរតែសិក្សាឲ្យបានស៊ីជម្រៅថាតើនឹងត្រូវផ្តល់និទ្ទេសដោយរបៀបណា ដោយសារតែនិទ្ទេសនេះ មានសារសំខាន់សម្រាប់សិស្សពេលប្រឡងចូលសាកលវិទ្យាល័យ។ ​លោក ហង់ ជួន ណារ៉ុន ឲ្យដឹងទៀតថា នៅ​ថ្ងៃ​ចន្ទ​ស្អែក​នេះ ក្រសួង​នឹង​បង្ហោះ​មេរៀន​សង្ខេប សម្រាប់​បេក្ខជន​រៀន​ត្រៀមប្រឡង​លើក​ទី​២ គណិតវិទ្យា រូបវិទ្យា គីមីវិទ្យា និង​ជីវវិទ្យា ដែល​អាច​រក​បាន​តាម​គេហទំព័រ​ក្រសួង​www.moeys.gov.kh​និង​នៅលើ​ហ្វេ​សប៊ុក​www.facebook.com/moeys.gov.kh​។​លោក​បន្តថា ក្រសួង​កំពុង​រៀបចំ​បញ្ជូន​គ្រូ​ចុះ​តាម​បណ្តា​ខេត្ត ទាំង​ស្ម័គ្រចិត្ត និង​អាជីព ដើម្បី​បង្រៀន​ដល់​សិស្ស​។​លោក​ណែនាំ​ឲ្យ​សិស្ស​ដែល​ប្រឡង​លើក​២ គោរព​តាម​ប្បញ្ញត្តិ​នៃ​ការប្រឡង​ឲ្យបាន​ប្រសើរ ជាពិសេស​មិន​ត្រូវ​លាក់​ទុក​ជាប់​នឹង​ខ្លួន​នូវ​ឧបករណ៍​អេឡិចត្រូវនិក​គ្រប់​ប្រភេទ​ក្នុង​មណ្ឌល​ប្រឡងឬ​បន្ទ​ប់ប្រឡង​ជាដាច់ខាត​។  ​ការប្រឡង​លើក​ទី​២​នេះ ក្រសួង​នឹង​ផ្តល់​សិទ្ធិ​ប្រឡង​ចំពោះ​សិស្ស ដែល​មិន​ទទួលបាន​មធ្យមភាគ​ជាប់​តាម​ការកំណត់​របស់​ក្រសួង​ប៉ុណ្ណោះ ចំណែក​សិស្ស​ដែល​អវត្តមាន អ្នក​ដែល​គេ​ប្រឡង​ជំនួស និង​អ្នក​បាន​ប្រព្រឹត្ត​មិន​សមរម្យ​លើ​អ្នក​ឃ្លាំមើល មិន​ត្រូវបាន​អនុញ្ញាតឲ្យ​ចូលរួមប្រ​ឡង​ជា​លើក​ទី​២​ឡើយ​៕ ​សរសេរ​មកកាន់​លោក ស៊ុន ណារិន តាមរយៈ​sun_narin@vodhotnews.com

    [អានបន្ត]
  • ​ក្នុង​១​យប់​១​ថ្ងៃ​មាន​កុមារ​ចំនួន​១២០​នាក់​ត្រូវ​ការសង្គ្រោះ​បន្ទាន់​នៅក្នុង​មន្ទីរពេទ្យ​គន្ធបុប្ផា​

    ថ្ងៃអាទិត្យ ទី31 សីហា 2014, 09:39 AM

    មន្ទីរពេទ្យ​គន្ធបុប្ផា​រាជធានី​ភ្នំពេញ បានឲ្យដឹងថា ក្នុង​១​យប់​១​ថ្ងៃ មាន​កុមារ​ចំនួន​១២០​នាក់ ត្រូវការ​សេវា​ផ្នែក​សង្គ្រោះបន្ទាន់ ដើម្បី​ការពារ​អាយុជីវិត​ចាប់តាំងពី​ថ្ងៃ​ចូល​មក​មន្ទីរពេទ្យ​ដំបូង ខណៈ​មន្ទីរពេទ្យ​នេះ​បន្ត​ប្រកាស​រក​ជំនួយ​ពី​សប្បុរសជន​សម្រាប់​ចំណាយ​ទៅលើ​ការព្យាបាល​អ្នកជំងឺ​។​ របាយការណ៍​មន្ទីរពេទ្យ​គន្ធបុប្ផា ប្រចាំ​ខែ​សីហា ចេញផ្សាយ​កាលពី​ថ្ងៃ​ទី​៣០​ខែសីហា​ម្សិលមិញ​នេះ បានបង្ហាញ​ថា  ក្នុង​១​យប់ ឬ ១​ថ្ងៃ កុមារ​មាន​ជំងឺ​ធ្ងន់ធ្ងរ ជា​មធ្យម ចំនួន​៧០​នាក់ ត្រូវបាន​ដាក់​សម្រាក​ព្យាបាល​ក្នុង​មន្ទីរពេទ្យ​គន្ធបុប្ផា​រាជធានី​ភ្នំពេញ  ក្នុងនោះ​កុមារ​៦០​នាក់ ត្រូវការ​សេវា​សង្គ្រោះបន្ទាន់ ដើម្បី​សង្គ្រោះ​ជីវិត​ជា​បឋម  បើ​មិន​ដូច្នោះ​ទេ ពួកគេ​នឹង​បាត់បង់​ជីវិត​។  របាយការណ៍​នេះ ឲ្យដឹងទៀតថា ក្នុង​ខែ​សីហា​នេះ មាន​កុមារ ចំនួន ៣៥ ៥៦៦​នាក់​បាន​មក​ទទួល​សេវា​ពិគ្រោះ​ជំងឺ  ក្នុងនោះ​កុមារ​ដែល​មាន​ជំងឺ​ធ្ងន់ធ្ងរ​ត្រូវបាន​ដាក់​សម្រាក​ព្យាបាល​មាន​ចំនួន ​៥ ៣៩៥​នាក់ សម្រាប់​មន្ទីរពេទ្យ​នៅ​រាជធានី​ភ្នំពេញ​។​

    [អានបន្ត]
  • ​សិស្ស​ប្រឡង​ជាប់​និង​ធ្លាក់​បាក់​ឌុប​នៅ​ក្នុង​វិទ្យាល័យ​ស្វាយរៀង​បង្ហាញ​អារម្មណ៍​ផ្សេងៗ​គ្នា​

    ថ្ងៃអាទិត្យ ទី31 សីហា 2014, 09:14 AM

    ​លទ្ធ​ផល​ប្រឡង​សញ្ញាបត្រ​មធ្យមសិក្សា​ទុតិយភូមិ​ឆ្នាំ​២០១៣- ២០១៤ របស់​សិស្សា​នុសិស្ស នៅ​វិទ្យាល័យ​ស្វាយរៀង​ដែល​មាន​សិស្សានុសិស្ស​មក​ចូលរួម​ស្ដាប់ និង​មើល​បាន​ប្រកាស​នៅ​ថ្ងៃទី ៣០ ខែ សីហា ឆ្នាំ ២០១៤ ពួកគេ​បាន​បង្ហាញ​អារម្មណ៍​ផ្សេងៗ​គ្នា​។​ ​យុវ​សិស្ស​ម្នាក់​ឈ្មោះ យ៉ា ដូ​ណា ថ្លែង​ក្រោយពេល​ដឹង​លទ្ធផល​ថា នាង​រីករាយ​ណាស់​ដែលបាន​ប្រឡង​ជាប់​ទទួលបាន​និទ្ទេស​ E​ នាង​ពេញចិត្ត​ព្រោះ​វា​ជា​សមត្ថិភាព​ផ្ទាល់ខ្លួន​។ នាង​បាន​បន្តទៀតថា នឹង​បន្ត​ការសិក្សា​នៅ​ថ្នាក់​ឧត្តមសសិក្សា​។ ​យុវ​សិស្ស ខូ​យ វ៉ា​ណាត មកពី​ស្រុក​រំដួល បានបង្ហាញ​អារម្មណ៍​សោកស្ដាយ​ជាខ្លាំង​ដែល​រូប​នាង​ពុំ​បាន​ប្រឡង​ជាប់ ប៉ុន្តែ​នាង​នឹង​ខិតខំ​រៀន​បន្ថែម​ដើម្បី​ប្រឡង​លើក​ទី​២​នាពេលខាងមុខ​។

    [អានបន្ត]

ព័ត៌មានផ្សេងៗ

ព័ត៌មានអន្តរជាតិ

មើលព័ត៌មានអន្តរជាតិទាំងអស់
​អង់គ្លេស​បង្កើន​ការប្រុងប្រយ័ត្ន​ភេរវកម្ម​ខណៈ​ជនភៀសខ្លួន​ស៊ី​រី​កើន​ដល់​៣​លាន​នាក់​

ថ្ងៃសៅរ៍ ទី30 សីហា 2014, 11:58 AM

នាយករដ្ឋមន្ត្រី​អង់គ្លេស​ប្រកាស​នៅ​ថ្ងៃ​សុក្រ​ស​ម្សិលមិញ​ពី​ការប្រុងប្រយ័ត្ន ករណី​ការ​រាលដាល​អំពើ​ភេរវកម្ម​ខណៈ​ជនភៀសខ្លួន​ស៊ី​រី គេចចេញ​ពី​សង្គ្រាម​ញាំញី​កើន​ដល់​ចំនួន​៣​លាន​នាក់​។​ ​នាយករដ្ឋមន្ត្រី​អង់គ្លេស លោក David Cameron​ថ្លែង​ទៅ​កាន់​បណ្តាញសារព័ត៌មាន​ថា លោក​មិន​មាន​ការសង្ស័យ​ទេ ករណី​ក្រុម​ជី​ហាត មក​ពី​ក្រុម​រដ្ឋ​អ៊ីស្លាម​បំបែក​ខ្លួន​ចេញពី​អ៊ីរ៉ាក់ និង​ស៊ី​រី ដាក់​គោលដៅ​ប្រឆាំង​ពួក​អឺរ៉ុប​។ លោក បង្ហាញ​ការព្រួយបារម្ភ​ពី​កម្រិត​នៃ​ការវាយប្រហារ​អំពើ​ភេរវកម្ម​កើនឡើង​ដល់​ដំណាក់កាល​ធ្ងន់ធ្ងរ នៅពេលដែល​អង្គការ​សហប្រជាជាតិ​បង្ហាញ​របាយការណ៍​ជនភៀសខ្លួន​ស៊ី​រី​កើន​ដល់​៣​លាន​នាក់​។ នេះ បើ​តាម​ការចុះផ្សាយ​របស់​បណ្តាញសារព័ត៌មា​ន​Channel News Asia​។​ ​បើ​ទោះ​មាន​ស្ថានភាព​ប្រែប្រួល​ក៏ដោយ អ្នកនាំពាក្យ​សេត​វិមាន​លោក Josh Earnest ថ្លែងថា ទីក្រុង​វ៉ាស៊ីនតោន មិនទាន់មាន​ផែនការ​ទប់ទល់​ករណី​ថ្មី​នេះ​ទេ ប៉ុន្តែ​មន្ត្រី​សន្តិសុខ​ជាតិ​របស់​អាមេរិក​កំពុង​ធ្វើការ​យ៉ាង​ជិតស្និទ្ធ​ជាមួយ​ទីក្រុង​ឡុង​ដ៏​លើ​បញ្ហា​នេះ​។ លោក​ប្រធានាធិបតី​សហរដ្ឋអាមេរិក​បា​រ៉ាក់​អូបា​ម៉ា​បាន​ទទួលស្គាល់​ថា គាត់​មិន​មាន​យុទ្ធសាស្ត្រ​ជា​បន្ទាន់​ដើម្បី​ដោះស្រាយ​បញ្ហា​jihadists នៅ​ចំពោះមុខ​នេះ​ទេ៕ សូមសរសេរមកលោក ពៅ មេត្តា តាមរយៈ minpov@vodhotnews.com​

[អានបន្ត]

ព័ត៌មានផ្សេងៗ

ព័ត៌មានកំសាន្ត

មើលព័ត៌មានកំសាន្តទាំងអស់
  • ខៀវ សានសាណា បដិសេធរឿងរៀបការ

    ថ្ងៃព្រហស្បតិ៍ ទី28 សីហា 2014, 11:47 AM

    ​ដំណឹង​ចុងក្រោយ​ដែល​បែកធ្លាយ​ចេញ​ពី​ក្រុមហ៊ុន​Herbalife បាន​អះ​អា​ថា ចំណង​ស្នេហ៍​ថ្មោងថ្មី​រវាង​អ្នក​មេម៉ាយ ខៀវ សាន​សា​ណា និង​បុរស​ពោះម៉ាយ​វ័យ​៦០​ឆ្នាំ ជា​ជនជាតិ​អូស្ត្រាលី ហាក់​មិន​បានរ​លូន​ដូច​មុន​នោះទេ បើ​ប្រៀបធៀប​នឹង​ដំណាក់កាល​មុន​។ យ៉ាងណាក៏ដោយ អ្នក​ទាំង​ពីរ នឹង​នៅ​មាន​ពន្លឺ​អាពាហ៍ពិពាហ៍ បន្ទាប់​ដោះស្រាយ​បញ្ហា​ប្រឈម​ធំ​មួយ​រួចរាល់​។  ​បុគ្គលិក​របស់​ក្រុមហ៊ុន Herbalife Cambodia និយាយ​ដោយ​សុំ​មិន​បញ្ចេញ​ឈ្មោះថា ចំណង​ស្នេហ៍​រវាង​អ្នកនាង​ខៀវ សាន​សា​ណា និង​លោក Seraj Sutton  អ្នកគ្រប់គ្រង​ជាន់ខ្ពស់​ប្រចាំ​ក្រុមហ៊ុន​នេះ មាន​គម្រោង​រៀបការ​បើក​ចំហរ​នៅ​អំឡុង​ខែ​តុលា​ខាងមុខនេះ​។ ប៉ុន្តែ​ពេល​នេះ គម្រោង​ទាំងមូល ត្រូវ​លើក​ពេល​ហើយ ដោយ​ថែម​ទាំង​គ្មាន​ការកំណត់​ជាថ្មី​។ ការកែប្រែ​នេះ បាន​កើតឡើង​ទន្ទឹមនឹង​ភាព​ល្អូកល្អិន​ដែល​ធ្លាប់​ស​ម្ញ៉ែង​ក៏​ត្រូវ​រយាល​ម្ខាងៗ​។ ចម្លើយ​មួយ​ដែល​នាង​បកស្រាយ​ទៅកាន់​អ្នក​ដឹងឮ គឺ​ភាព​មមាញឹក នាំ​ឲ្យ​នាង និង​លោក Seraj Sutton មិន​អាច​ចាត់ចែង​មង្គលការ​។ ប៉ុន្តែ​នៅ​ក្រោយ​បញ្ហា​ដ៏​ចម្រូងចម្រាស​នេះ ត្រូវ​គេ​ព្រលយ​ថា មក​ពី​ហេតុផល​អតីត​ស្វាមី ដែល​ជា​មន្ត្រី​នៅ​អង្គការសហប្រជាជាតិ​ទៅវិញ​ទេ​។  ​រហូតមកទល់​ពេលនេះ មាន​ដំណឹង​ថា អ្នកនាង និង​ស្វាមី មិន​មាន​លិខិត​លែងលះ​ឡើយ ទើប​ធ្វើឲ្យ​លោក Seraj Sutton បាត់បង់​ទំនុកចិត្ត​។ គាប់​ជួន​ជា​លោក​មិន​ចង់​បន្ថែម​បន្ទុក​ឲ្យ​សាណា រង​ការចោទប្រកាន់​ក្នុង​ពេល​លោកដូ​ឡា​ល់ដ៍ បូ​វ​សឺ​រ (Donald Bowser) មិន​ទាន់​ឯកភាព​រឿង​លែងលះ​ឲ្យ​ផង ទើប​ភាព​ផ្អែមល្ហែម​របស់​អ្នក​ទាំង​ពីរ ត្រូវ​ប្រមូល​ខ្ចប់​ទុក​មួយ​អន្លើ​សិន​។  ​ខៀវ សាន​សា​ណា ប្រាប់​VOD​ថា​អត់​មាន​គម្រោង​រៀបការ​ឆាប់ៗ​នោះទេ​។ នាង​និយាយថា​«​ដូចជា​អត់​មាន​គម្រោង​រៀបការ​អី​ផង ហើយ​ខ្ញុំ​និង​គាត់​(Seraj) មេ និង កូនចៅ​តើ​!»​។ ជាមួយ​ការបដិសេធ​មិន​និយាយ​លម្អិត​ពី​រឿង​ឯកជន នាង​ប្រាប់ថា សព្វថ្ងៃ​រវល់​ណាស់​រឿង​សិល្បៈ ដូច្នេះ​សម្រាប់​នាង គឺ​អត់​មាន​ពេល​គ្រប់គ្រាន់ ដើម្បី​គិតគូរ​រឿង​ស្នេហ៍​ចាស់ ឬ​ស្នេហ៍​ថ្មី​នោះ​ទេ​។​ លោក Seraj Sutton និងអ្នកនាង ខៀវ សាន​សា​ណា (រូបថតពីហ្វេសប៊ុក) អត្ថបទកំសាន្តផ្សេង​ទៀត  ​  តារា​សម្តែង សុភ័ណ្ឌ ឡា​រី ដែល​រិះគន់​រដ្ឋាភិបាល មាន​ឱកាស​ទៅ​អាមេរិក​   មន្ត្រី​ក្រសួង​វប្បធម៌​ប្រតិកម្ម​នឹង​ការអះអាងថា​ភាពយន្ត​«​ស្បែក​គង់​»​ខាតបង់​៤០​ភាគរយ​  ​ខៃ ប្រសិទ្ធ ចេញមុខ​រក​ថវិកា​​ជួយ​សហគមន៍​ក្រីក្រ​នៅ​កម្ពុជា  នាយ​កុយ សម្ងំ​នៅជប៉ុនដើម្បី​ពង្រឹង​ទីផ្សារ​ជំនួញពេលត្រឡប់​មកវិញ   កែវ នីសា ទូរទស្សន៍​បាយ័ន​ឲ្យ​តំណែង​ត្រូវ​ចិត្ត​   សុគន្ធ និសា សម្ដែង​ច​រឹក​ប្រុស និង​ធ្វើ​ខ្មោច​ក្នុង​រឿង​ថ្មី​  ​ប្រភព​ដដែល​និយាយថា ខៀវ សាន​សា​ណា ក៏​មិន​ទាន់​ទុក​ចិត្ត​លោក Seraj ទាំងស្រុង​ដែរ ដោយសារ​តែ​រយៈកាល​កន្លងមក លោក​Seraj មិន​ផ្ដល់​អ្វី​ជា​ដុំកំភួន ក្រៅ​ពី​ជួយ​នាង​ឲ្យ​ពូកែ​ស្វែងរក​កូនក្រុម ក្នុង​ការងារ​ជា​ប្រព័ន្ធ​នោះ​នៅឡើយ​។ ជាក់ស្ដែង​មុន​នេះ​បន្តិច អ្នកណា​ក៏​ដឹង​ដែរ​ថា លោក Seraj Sutton មានបំណង​ទិញ​ដី​ធំ​មួយ​សង់​វីឡា​នៅ​ជ្រោយចង្វារ ឲ្យ​ខៀវ សាន​សា​ណា សប្បាយចិត្ត ប៉ុន្តែ​ការសន្យា​នៅ​តែ​ត្រឹម​ជា​ខ្យល់​។ ប្រភព​បន្តថា «​ពួកគេ​ឥឡូវ​ដូចជា​មិន​ទុកចិត្ត​គ្នា​យ៉ាងម៉ិច​ទេ ព្រោះ​Seraj​ភ័យ​រឿង​សា​ណា លែង​ប្ដី​មិន​ទាន់​ដាច់ ឯ​សា​ណា​ភ័យខ្លាច Seraj  មិន​ប្រាកដប្រជា​»​។ យ៉ាងណាក៏ដោយ អ្នក​ទាំង​ពីរ នៅ​តែ​បង្ហាញ​ភាពស្និទ្ធិស្នាល និង​ផ្អែមល្ហែម​ដាក់គ្នា​ម្ដង​ម្កាល រាល់​ពេលទំនេរ​ជួបគ្នា ដោយ​គ្រាន់តែ​ទំនាក់ទំនង​ហាក់​មាន​ការ​ប្រយ័ត្នប្រយែង​ដោយ​រៀងៗ​ខ្លួន​ប៉ុណ្ណោះ​។  ​តាម​ការបញ្ជាក់ លោក Seraj  មិន​ខ្វះ​លុយកាក់​សង់​វីឡា និង​ផ្ដល់​ភាព​ហ៊ឺហារ​ឲ្យ​គូស្នេហ៍​នោះ​ទេ ប៉ុន្តែ​មក​ពីសា​ណា​លែង​ស្វាមី​មិនទាន់​ដាច់ ទើប​ការទាក់ទង ត្រូវ​ស្ថិត​ក្នុង​ការ​ស្ទាប​ស្ទង់​។ ប៉ុន្មាន​សប្ដាហ៍​ចុងក្រោយ លោក Seraj Sutton  បាន​បើក​ការិយាល័យ​Herbalife​ថ្មី​មួយ នៅ​ម្ដុំ​វិមានឯករាជ្យ ដើម្បី​ឲ្យ​ខៀវ សាន​សា​ណា និង​មេ​បណ្ដាញ​ទាំងឡាយ បណ្ដុះបណ្ដាល និង​ស្វែងរក​កូនក្រុម  ប៉ុន្តែ ខៀវ សាន​សា​ណា បែរជា​ត្រូវ​សមាជិក​ភាគច្រើន​ប្រាប់ថា​មិន​សូវ​ប្រឹងប្រែង​ដូច​មុន​។​ VOD មិនអាច​ទាក់ទង​លោក Seraj Sutton ដើម្បី​អត្ថាធិប្បាយ​លើ​បញ្ហា​នេះ​បាន​នៅឡើយ​ទេ​។​ ​ដំណឹង​ចុងក្រោយ​ប្រាប់ថា ពេល​នេះ​កូនប្រុស​ច្បង​របស់​នាង​គឺ សេ​មមី បូ​វ​សឺ​រ​(Sammy Bowser ) ត្រូវបាន​អតីត​ស្វាមី​យក​ទៅ​រស់នៅ​កាណាដា​បាត់​ហើយ​៕ ​សរសេរ​មកកាន់​លោក​វង្ស សុ​ម៉ា​លីន តាមរយៈ​vongsomalin@yahoo.com 

    [អានបន្ត]
  • តារា​សម្តែង សុភ័ណ្ឌ ឡា​រី ដែល​រិះគន់​រដ្ឋាភិបាល មាន​ឱកាស​ទៅ​អាមេរិក​

    ថ្ងៃអង្គារ ទី26 សីហា 2014, 08:41 AM

    ​ក្រោយ​ទទួល​សម្ពាធ​មិនឲ្យ​ចេញ​មុខ​លើ​ការងារ​សិល្បៈ​ក្នុងស្រុក តារា​សម្ដែង​លោក​សុភ័ណ្ឌ ឡា​រី នៅតែ​អាច​ទម្លុះ​ទីផ្សារ​បាន​ដដែល ដោយ​បាន​ធ្វើឲ្យ​បងប្អូន​ខ្មែរ​នៅ​សហរដ្ឋអាមេរិ​ក បើក​ច្រក​ឲ្យចេញ​សម្ដែងជា​លើកដំបូង​។ នេះ​ជា​ការងារ​សិល្បៈ​បើកឆាក បន្ទាប់ពី​លោក​ត្រូវ​ស្ថាប័ន​ក្នុងស្រុក បិទ​មិនឲ្យ​ចេញមុខ​ទាំងស្រុ​ង ព្រោះតែ​មាន​និន្នាការ​គាំទ្រ​គណបក្សប្រឆាំង​។  ​លោក​សុភ័ណ្ឌ ឡា​រី លើកឡើងថា លោក​សប្បាយចិត្ត​ណាស់​ដែល​ត្រូវបាន​សមាគម​ខ្មែរ និង​បងប្អូន​ខ្មែរ​រស់នៅ​សហរដ្ឋអាមេរិក បើកឱកាស​ឲ្យចេញ​សម្ដែង​រយៈពេល​២​ខែ ក្នុងពេល​ដែល​ការងារ​សិល្បៈ​ក្នុង​ស្រុក ទាំង​ការសម្ដែង​រឿង ការឡើង​ច្រៀង​លើ​ឆាក​ទូរទស្សន៍ ការថត​ស្ពតពាណិជ្ជកម្ម និង សកម្មភាព​ចេញ​មុន​ក្នុង​បទ​ចម្រៀង​របស់​ផលិតកម្ម​ក្នុង​ស្រុក​ទាំងអស់ ត្រូវបាន​រើសអើង​។ បើទោះជា​លោក​បាន​វិវត្តន៍​ខ្លួន​ក្លាយ​ជា​តារា​ចម្រៀង​របស់​ក្រុម​សង្គ្រោះ​ជាតិ ក៏​ការងារ​សិល្បៈ ដើម្បី​ពង្រីក​កេរ្តិ៍ឈ្មោះ និង​រក​ប្រាក់​ចំណូល​ត្រូវបាន​ស្លាប់​ទៅហើយ​។  ​ពាក់ព័ន្ធ​នឹង​ការងារ​ចេញ​សម្ដែង​ក្រៅ​ស្រុក​ជា​លើកដំបូង​នេះ លោក​ទើប​បាន​ទទួល​លិខិតអនុញ្ញាត​ពី​ស្ថានទូត​អាមេរិក​ប្រចាំ​នៅ​កម្ពុជា​នៅ​ប៉ុន្មាន​ថ្ងៃនេះ​ទេ ដោយ​លោក​ត្រូវ​ធ្វើដំណើរ​ចេញពី​ដី​កំណើត​នៅ​ថ្ងៃ​ទី​០១ ខែ​កញ្ញា​ខាងមុ​នេះ​។  លោក​អះអាង​ថា លិខិត​នោះ​អនុញ្ញាតឲ្យ​លោក​អាចស​ម្ដែង​ពេញ​៣​ខែ ទើប​លោក​នឹង​អាច​បន្ត​សម្ដែង​ក្រោយ​បញ្ចប់​២​ខែ ដែល​បាន​គ្រោងទុក ប្រសិនបើ​មាន​ការស្នើសុំ​។ ការងារ​ចេញ​សម្ដែង​នេះ មិន​ពាក់ព័ន្ធ​នឹង​ការងារ​បក្ស​នោះទេ ប៉ុន្តែ​បើ​បងប្អូន​ខ្មែរ​រស់នៅ​ទីនោះ ស្នើ​ឲ្យ​លោក​ច្រៀង​បទ​ក្នុង​ក្រុម​សង្គ្រោះ​ជាតិ នោះ​លោក​នឹង​ទទួលយក​សំណើ ដោយសារតែ​លោក​ក៏​ចង់បង្ហាញ​ស្នាដៃ​បទ​ចម្រៀង ដែល​ខ្លួន​បាន​រំលេច ក្នុង​ក្រុម​តន្ត្រី​សង្គ្រោះ​ជាតិ​នោះ​ដែរ​។ តារា​ដែល​អះអាង​ថា ខ្លួន​ជា​កូនកំព្រា​រូបនេះ និយាយថា​«​ខ្ញុំ​ទៅ​អាមេរិក ក្នុងនាម​ជា​តារា​សម្ដែង ដើម្បី​ទៅ​ច្រៀង​ជូន​បងប្អូន​សប្បាយ​ដូចគ្នា​នឹង​តារា​ទូទៅ ប៉ុន្តែ​បើ​មាន​សំណូមពរ​ឲ្យ​ខ្ញុំ​ច្រៀង​បទ​បែប​ហ្នឹង​(​បទ​ប្រឆាំង​) នោះ​ខ្ញុំ​ក៏​ច្រៀង​ផងដែរ ដោយ​ខ្ញុំ​គ្រោង​យក​ស៊ី​ឌី​របស់ខ្ញុំ​ទាំង​២​វ៉ុល​យក​ទៅ​ចែក​នៅ​ទីនោះ​ផង​!»​។  ​បទ​ដែល​លោក​បាន​ថត​ជា​ស៊ី​ឌី​នោះ មាន​ខ្លឹមសារ​ទាំងស្រុង​នឹង​ការរិះគន់​ចំៗ​ទៅ​លើ​រដ្ឋាភិបាល ដែល​បទ​ទាំងនេះ ត្រូវ​បាន​ហាមប្រាម​មិន​ឲ្យ​ន​ចាក់​បន្លឺ​ជា​សាធារណៈ​នោះឡើយ​។ សុភណ្ឌ័ ឡា​រី ហាក់​សម្ដែង​នូវ​អារម្មណ៍​សើច​សប្បាយ​យ៉ាងខ្លាំង ដែល​ប្រភព​ចំណូល​ដែល​បាត់​ទាំង​ស្រុង​ពី​ការងារ​សិល្បៈ ត្រូវបាន​បើក​ឱកាស​ឡើងវិញ ក្រោម​ការធានា​ឲ្យចេញ​សម្ដែង​នៅ​សហរដ្ឋ​អាមេរិក​លើក​នេះ​។ លោក​សង្ឃឹម​យ៉ាង​ខ្លាំង​ថា​ការងារ​បែប​នេះ នឹង​បន្តកន្ទុយ​រត់​ចូល​មក​ទៀត បន្ទាប់​ពី​តាម​ផលិតកម្ម​តូចធំ និង​ក្រុម​ផលិតករ​ទូរទស្សន៍ បានបង្ហាញ​ការរើសអើង​មិន​អញ្ជើញលោក ឲ្យចេញ​សម្ដែង​ដូច​មុន​។  អត្ថបទកំសាន្តផ្សេង​ទៀត  ​  មន្ត្រី​ក្រសួង​វប្បធម៌​ប្រតិកម្ម​នឹង​ការអះអាងថា​ភាពយន្ត​«​ស្បែក​គង់​»​ខាតបង់​៤០​ភាគរយ​  ​ខៃ ប្រសិទ្ធ ចេញមុខ​រក​ថវិកា​​ជួយ​សហគមន៍​ក្រីក្រ​នៅ​កម្ពុជា  នាយ​កុយ សម្ងំ​នៅជប៉ុនដើម្បី​ពង្រឹង​ទីផ្សារ​ជំនួញពេលត្រឡប់​មកវិញ   កែវ នីសា ទូរទស្សន៍​បាយ័ន​ឲ្យ​តំណែង​ត្រូវ​ចិត្ត​   សុគន្ធ និសា សម្ដែង​ច​រឹក​ប្រុស និង​ធ្វើ​ខ្មោច​ក្នុង​រឿង​ថ្មី​  ​តាម​គម្រោង លោក​ត្រូវ​សម្ដែង​នៅ​សហរដ្ឋ​អាមេរិក​ចំនួន​១៨​លើក ជាមួយ​តារាចម្រៀង​ស្រី​ខេ​លី​មក​ពី​ផលិតកម្ម​M អ្នកនាង ហង្ស ពិសី និង​ក្រុម​តន្ត្រី 4U Band​។ ក្រោយ​ទៅដល់​អាមេរិក លោក និង​ក្រុមការងារ​ត្រូវ​សម្ដែង​បើកឆាក​នៅ​រាត្រី​ថ្ងៃ​សៅរ៍​ទី​៦ កញ្ញា និង​គ្រោង​បញ្ចប់​នៅ​ចុង​ខែ​តុលា ក្នុង​ឆ្នាំ​២០១៤​នេះ​។  រដ្ឋ​សំខាន់ៗ ដែល​លោក និង​ដៃគូ​សម្ដែង​បង្ហាញខ្លួន​រួម​មាន​រដ្ឋ​ម៉ាសាឈូសេត រដ្ឋ​កាលីហ្វ​កញ៉ា រដ្ឋ​តិច​សាស់ រដ្ឋ​ឡុង​ប៊ិច និង​បណ្ដា​រដ្ឋ​មួយចំនួនទៀត ដែល​មាន​បងប្អូន​ខ្មែរ​រស់នៅ​ច្រើន​ជាដើម​។ ការចេញ​សម្ដែង​នេះ បង្ហាញ​យ៉ាង​ច្បាស់​ថា វិថី​សិល្បៈ​ដែល​បាន​ស្លាប់បាត់ បាន​រស់​ឡើង​វិញ​។  ​លោក​សុភ័ណ្ឌ ឡា​រី រំពឹងថា ពលរដ្ឋ​ខ្មែ​រស់នៅ​បារាំង អូស្ត្រាលី  និង​កាណាដា​ជាដើម ពិតជា​បើកទ្វារ​ទទួល​ឲ្យ​លោក​ចេញ​សម្ដែង​ដូចគ្នា​ក្នុង​ពេល​បន្ទាប់ ពិសេស​ក្នុងពេល​ដែល​អ្នក​ណា​ក៏​ចាប់អារម្មណ៍​ថា​លោក​ជា​តារា​ដែល​មាន​ឈ្មោះ​បោះ​សំឡេង​ក្នុង​សិល្បៈ ហើយ​សុខចិត្ត​បោះបង់​ទីផ្សារ​ក្នុងស្រុក ព្រោះ​តែ​ចង់​រិះគន់​រដ្ឋាភិបាល​តាម​ឆន្ទៈ​របស់​ខ្លួន​បែប​នេះ​។ សុភ័ណ្ឌ ឡា​រី ប្រាប់ថា ការរើសអើង​ចំពោះ​លោក មិន​អាច​សម្លាប់​អាជីព​សិល្បៈ​របស់​លោក​បាន​ទេ តួយ៉ាង​ដូចជា​ឱកាស​បាន​ចេញ​សម្ដែង​នៅ​ក្រៅ​ប្រទេស​លើក​នេះ​អ៊ីចឹង​៕ ​សរសេរ​មកកាន់​លោក វង្ស សុ​ម៉ា​លីន តាមរយៈ​vongsomalin@yahoo.com ​

    [អានបន្ត]
  • មន្ត្រី​ក្រសួង​វប្បធម៌​ប្រតិកម្ម​នឹង​ការអះអាងថា​ភាពយន្ត​«​ស្បែក​គង់​»​ខាតបង់​៤០​ភាគរយ​

    ថ្ងៃចន្ទ ទី25 សីហា 2014, 05:52 PM

    មន្ត្រី​ក្រសួង​វប្បធម៌ និង​វិចិត្រសិល្បៈ នៅ​ថ្ងៃ​ចន្ទ​នេះ ប្រតិកម្ម​នឹង​ការលើកឡើង​ថា​ការហាម​មិន​ឲ្យ​ទស្សនិកជន អាយុ​ក្រោម​១៥​ឆ្នាំ ចូល​មើល​ខ្សែភាពយន្ត​«​ស្បែក​គង់​»​ដែល​ជា​ភាពយន្ត​ខ្នាត​ធំ​ចំណាយ​អស់​ប្រាក់​ជិត​៦៨​ម៉ឺន​ដុល្លារ​នេះ ធ្វើឲ្យ​ផលិត​ករខាតបង់​ប្រា​ក់​ប្រមាណ​៤០​ភាគរយ​។​ ​ប្រតិកម្ម​នេះ​កើតឡើង​បន្ទាប់​ពី​កាសែត​ភ្នំពេញ​ប៉ុស្តិ៍​ចុះផ្សាយ​នៅ​ថ្ងៃ​ចន្ទ​នេះ​ថា ក្រសួង​បាន​ហាម​មិនឲ្យ​ទស្សនិកជន​អាយុ​ក្រោម​១៥​ឆ្នាំ មើល​ភាពយន្ត​«​ស្បែក​គង់​»​នេះ និង​ធ្វើឲ្យ​ក្រុមហ៊ុន​ខាតបង់​ប្រាក់​៤០​ភាគរយ​។  ​ក្នុង​បទសម្ភាសន៍​ជាមួយ​VOD លោក ស៊ិន ច័ន្ទ​សា​យ៉ា ប្រធាន​នាយកដ្ឋាន​សិល្បៈ​ភាពយន្ដ និង ផ្សព្វផ្សាយ​វប្បធម៌ មានប្រសាសន៍ថា ក្រសួង​ពិតជា​បាន​ចេញ​ការកំណត់​អាយុ​អ្នកទស្សនា​នេះ​មែន ដោយសារ​រូបភាព​នៃ​ភាពយន្ត​មាន​លក្ខណៈ​អាសអាភាស​។ លោក​បញ្ជាក់ថា​«​មែន​អាហ្នឹង​យើង​កំណត់​មែន​។ យើង​វិនិច្ឆ័យ​ទៅ​លើ​ខ្លឹមសារ​នៃ​រឿង និង​រូបភាព​នៃ​រឿង​។ ថ្នាក់ដឹកនាំ​កំពូល​បាន​សម្រេច​ថា​យើង​កំណត់​អាយុ​ទស្សនិកជន​ដែល​ចូល​ទស្សនា​រឿង​ហ្នឹង ចាប់ពី​១៥​ឡើងទៅ​។​យើង​ធ្វើការ​មិនមែន​តម្រូវ​មនុស្ស​ម្នាក់​ទេ មាន​មនុស្ស​ច្រើន ហើយ​យោបល់​ខុសៗ​គ្នា​។ មាន​អ្នក​ជេរ​ក្រសួង​វប្បធម៌​ថា រឿង​ហ្នឹង​...​មាន​សិច​មានអី​។ មួយ​ទៀត​ថា​អត់​អី​ទេ ទទួលយកបាន ម៉េច​បាន​កំណត់​ក្មេង​អញ្ចឹង​...»​។​ ​នៅពេល​សួរ​ពី​ការលើកឡើង​ថា​ក្រសួង​ធ្វើឲ្យ​អ្នក​ផលិត​ភាពយន្ត​ខាតប​ង់​៤០​ភាគរយ លោក​ស៊ិន ច័ន្ទ​សា​យ៉ា ប្រតិកម្ម​ថា​តើ​តួរ​លេខ​នេះ​បាន​មកពីណា ហើយ​នរណា​ជា​អ្នក​ផ្តល់ឲ្យ​។ លោក​បន្តថា​នៅ​តាម​ភាពយន្ត​និមួយៗ មិន​មាន​ក្មេង​ចូលទៅ​មើល​ច្រើន​ទេ គឺ​យ៉ាងច្រើន​១០​នាក់​ប៉ុណ្ណឹង​។​លោក​មានប្រសាសន៍ថា​«​អ្នកណា​ជា​អ្នក​និយាយ​តួរ​លេខ​ហ្នឹង អ្នកណា​កំណត់​ទូរលេខ​ហ្នឹង អ្នកណា​គេ ខ្ញុំ​អត់​យល់​!​។​មើល​ជាក់ស្តែង​ទៅ តើនរ​ណា​ដែល​មើល​រឿង​ហ្នឹង​ហើយ​នាំ​កូន​ទៅ​មើល​។​៤០​ភាគរយ​មែន​ទេ​?» ​លោក​ស៊ិន ច័ន្ទ​សា​យ៉ា បន្តថា ជាធម្មតា ការពិនិត្យ​មើល​ភាពយន្ត​មាន​ពីរ​ដំណាក់កាល គឺ​ទីមួយ​ត្រូវ​មើល​សេណា​រី​យ៉ូ និង​ទី​ពីរ​ពេល​ផលិត​ចប់សព្វគ្រប់​ហើយ ក្រសួង​នឹង​មើល​រូបភាព​ផ្ទាល់​។​ប៉ុន្តែ​លោក​ថា ជាធម្មតា អ្នក​ផលិត​កុន​ណាក៏ដោយ មិន​ដែល​ធ្វើបាន​១០០​តាម​សេណា​រី​យ៉ូ​ទេ គឺ​អាច​លម្អៀង​៣០​ទៅ​៤០ ឬ​៥០​ទៅ​៦០​ភាគរយ​។​ ​ផលិតករ​ភាពយន្ត​រឿង​«​ស្បែក​គង់​» និង ជា​អគ្គនាយក​នៃ​ក្រុមហ៊ុន​អង្គរ​ភិចឆើ (Angkor Picture Inc ) លោក ប៉ុល វិ​បូ បកស្រាយ​ថា​ការខាតបង់​នេះ គឺ​មាន​ទៅ​ដល់​៤០​ភាគរយ​មែន ដោយសារ​ចំនួនឪពុកម្តាយ​ បងប្អូនក្មេងអាយុ​ក្រោម​​១៥​ឆ្នាំ សម្រេច​មិន​មើល​រឿង​ហ្នឹង នៅ​ពេល​កូនៗ​មិន​ត្រូវបាន​អនុញ្ញាតឲ្យ​ចូល​មើល​ភាពយន្ត​។​លោក​បន្តថា​រហូត​​មក​ដល់​១១​ថ្ងៃនេះ ចំនួន​ទស្សនិកជន​មាន​ត្រឹមតែ​៥​ម៉ឺន​នាក់​ប៉ុណ្ណោះ ដែល​ចំនួន​រំពឹង​ទុក​គឺ​ត្រូវមាន​៤០​ភាគរ​យ​បន្ថែមទៀត​។​ ​ទោះជា​យ៉ាងណា លោក ប៉ុល វិ​បូ បញ្ជាក់ថា​«​ការងារ​នេះ ខ្ញុំ​មិន​បន្ទោស​ក្រសួង​ទាំងស្រុង​ទេ ពី​ព្រោះ​ក្រសួង​ខ្លួនឯង ក៏​គាត់​មិន​យល់​ថា​វា​ត្រឡប់​ទៅ​ករណី​ហ្នឹង​ដែរ​។ គាត់​ហាម​តែ​ក្រោម​១៥​ឆ្នាំ​ទេ​។ ក្រោម​១៥​ឆ្នាំ ទស្សនិកជន​មានតែ​៥​ទៅ​១០​ភាគរយ​។ ជាក់ស្តែង មាន​ឪពុក​ម្តាយ​ទៅ​វិញ​ទាំងអស់​។ តែ​ខ្ញុំ​សោកស្តាយ ដោយសារ​ខ្ញុំ​មិន​ដឹង​ដែរ​»​។​ ​លោក ប៉ុល វិ​បូ ឲ្យដឹងទៀតថា ភាពយន្ត​«​ស្បែក​គង់​»​នេះ មិនមែន​សម្រាប់​តែ​មនុស្ស​ចាស់ទេ គឺ​សម្រាប់​យុវវ័យ និង​ក្មេងៗ​ផងដែរ ដោយសារតែ​មាន​ភាព​កំប្លែង​។ លោក​បាន​ស្នើ​ឲ្យ​ក្រសួង​បើកចំហ​ឲ្យបាន​ទូលំទូលាយ ដើម្បី​ឲ្យ​ខ្សែភាពយន្ត​ខ្មែរ​អាច​ប្រកួតប្រជែង​ក្នុង​ឆាក​អន្តរជាតិ​បាន​នៅពេល​ខាងមុខ​។ លោក​មានប្រសាសន៍ថា​«​នៅពេលដែ​ល​​យើង​ផលិត​ខ្សែភាពយន្ត​មួយ កាលណា​រឹតបន្តឹង​លើ​គំនិត​ច្នៃប្រឌិត​ខ្លាំងពេក ធម្មតា​គំនិត​ច្នៃប្រឌិត​ថ្មី គឺ​អ្វី​ដែល​គេ​មិន​ដែល​ឃើញ​។​...​ប៉ុន្តែ​ត្រូវ​យល់​ថា​មានតែ​គំនិត​ច្នៃប្រឌិត​ហ្នឹង​ទេ ដែល​អាច​ប្រកួតប្រជែង​នឹង​ទីផ្សារ​អន្តរជាតិ​បាន​។ ប្រសិនបើ​ផលិតករ​រំពឹង​តែ​ចាក់​ក្នុងស្រុក យើង​អត់​មាន​ចំណូល យើង​អត់​មានលទ្ធភាព​ផលិត​បំពេញតម្រូវការ​អន្តរជាតិ យើង​អត់​មាន​ចំណូល​ច្រើន​»​។   ​អ្នកស្រី ឌី សា​វ៉េ​ត តារា​ជើងចាស់ និង​ជា​ផលិតករ​ជើងចាស់​មួយរូប មានប្រសាសន៍ថា ជាធម្មតា​មុន​ផលិត​ភាពយន្ត ត្រូវ​មាន​ការ​ត្រ​ពិនិត្យ​សេណា​រី​យ៉ូមុ​ននឹង​អនុញ្ញាត​ឲ្យមាន​ការផលិត​។ លោកស្រី​បន្ត​ថា រឿង​សិច​ស៊ី​មាន​ទៅ​តាម​ប្រពៃណី​ទំនៀមទម្លាប់​របស់​ប្រទេស​និមួយៗ ហើយ​ប្រទេស​ខ្មែរ​មាន​ទំនៀមទម្លាប់​តាំងពីដើម​មកហើយ​។  លោក​បញ្ជាក់ថា​«​តែ​សម័យនេះ​ឆ្នាំ​២០១៤​ហើយ វា​តែងតែ​មាន​ការ​ជឿនលឿន​ហើយ​។ យើង​កុំ​គាបខ្លាំងពេក​។ សម័យ​ខ្ញុំ​ភាគច្រើន​ចាស់ៗ​ទៅ​មើល​។​...​ក្រសួង​ត្រូវ​មាន​ការយោគយល់​ទៅតាម​សាច់​រឿង​របស់​គេ ហើយ​អ្នក​ធ្វើ ធ្វើ​ក្នុង រង្វង់​ការអប់រំ និង​យល់​ពី​ទំនៀមទម្លាប់​។ ក្រសួង​ក៏​ជួយ​ឲ្យយោបល់​ឲ្យ​យើង ហើយ​យើង​ក៏​ត្រូវ​ដឹង​ថា​អ្វី​ដែល​ត្រូវ​ធ្វើ​»​។​ ​ក្រៅ​ពី​ការ​បញ្ចាំង​ក្នុងស្រុក ផលិតករ​ភាពយន្ត​«​ស្បែក​គង់​»​គ្រោង​នឹង​យក​ខ្សែភាពយន្ត​ខ្នាត​ធំ​នេះ​ទៅ​ដាក់​បញ្ចាំង​នៅ​បរទេស​ផង​ដែរ ដូចជា​ប្រទេស​ថៃ វៀតណាម ម៉ាឡេស៊ី ឥណ្ឌូនេស៊ី ហ្វីលីពីន មី​យ៉ាន់​ម៉ា​(​ភូមា​) សហរដ្ឋអាមេរិក អូស្ត្រាលី បារាំង ចិន និង​ឥណ្ឌា​ជាដើម​។ ខ្សែភាពយន្ត​នេះ មាន​ឈុត​ឆាក​ប្រើ​មន្តអាគម​ន៍ វាយប្រហារ កាប់​ចាក់ និង​បាញ់បោះ​ដាក់គ្នា​។​តែ​ឈុត​ឆាក​សុទ្ធតែ​បង្កប់​នូវ​ន័យ​កំប្លែង​៕ ​សរសេរ​មកកាន់​លោក ស៊ុន ណារិន តាមរយៈ​sun_narin@vodhotnews.com

    [អានបន្ត]
  • ​ខៃ ប្រសិទ្ធ ចេញមុខ​រក​ថវិកា​​ជួយ​សហគមន៍​ក្រីក្រ​នៅ​កម្ពុជា

    ថ្ងៃចន្ទ ទី25 សីហា 2014, 10:55 AM

    ​ជា​រឿង​ភ្ញាក់ផ្អើល​មួយ ដែល​អតីត​តារា​សម្ដែង​លោក ខៃ ប្រសិទ្ធ ​ប្រកាស​ថា​នឹង​ដើរតួ​នាទី​ក្នុង​ការស្វែងរក​ថវិកា​ពី​ប្រទេស​អូស្ត្រាលី  ជួយ​ដល់​សហគមន៍​ក្រីក្រ​នៅ​កម្ពុជា ដែល​ប្រឈម​នឹង​កង្វះ​ទឹកស្អាត​។ ការប្រកាស​នេះ បាន​ធ្វើឡើង​បន្ទាប់​ពី​លោក​ផ្ដល់​អណ្ដូង​ទឹកស្អាត​ចំនួន​២ ដល់​អ្នកភូមិ​នៅ​ខេត្តសៀមរាប តាមរយៈ​តារា​សម្ដែង​ម្នាក់​នៅ​កម្ពុជា​។ ​លោក សាវិន ហ្វី​លីព តារាភាពយន្ត​ខ្មែរ និង​ជា​ម្ចាស់​គម្រោង​សាវិន​កម្ពុជា ដែល​ជា​អ្នកស្វែងរក​ជំនួយ​ផ្ដល់​អណ្ដូង​ទឹកស្អាត​ដល់​សហគមន៍​ក្រីក្រ ប្រាប់ឲ្យដឹង​ថា មូលនិធិ​របស់​លោក​បាន​ទទួល​ការចាប់អារម្មណ៍​យ៉ាងខ្លាំងពី​សំណាក់​សប្បុរសជន ហើយ​អ្វី​ដែល​វិជ្ជមាន​បំផុត​នោះ គឺ​បាន​ការចូលរួម​ពី​សំណាក់ លោក ខៃ ប្រសិទ្ធ ដែល​ជា​អតីត​តារា​សម្ដែង​ល្បីឈ្មោះ និង​ជា​ពលរដ្ឋ​ស្រប​ច្បាប់​ម្នាក់ របស់​ប្រទេស​អូស្ត្រាលី​។​ ​ជាក់ស្ដែង កាលពី​ថ្ងៃ​ទី​២៣ សីហា ឆ្នាំ​២០១៤ លោក ខៃ ប្រសិទ្ធិ ទើបតែ​បាន​ផ្ដល់​អណ្ដូងទឹក​ស្អាត​ជា​លើក​ទី​២ បន្ទាប់ពី​បាន​បរិច្ចាគ​ម្ដង កាលពី​ខែ​កក្កដា​កន្លងទៅ បន្ទាប់​ពី​ការស្នើសុំ ។ លោក​សាវិន ហ្វី​លីព ថ្លែងថា «​មកទល់ពេលនេះ បង ខៃ ប្រសិទ្ធ ជួយ​អណ្ដូងទឺក​២​ហើយ ដោយ​លើក​ទី​១ គាត់​ជួយ​ពីរ​នាក់​កូនប្រុស​គាត់ និង​លើក​ទី​២​នេះ គឺជា​មួយ​មិត្ត​ភ័ក្ត្រ​គាត់​ម្នាក់​ឈ្មោះ​ចំរើន​»​។ បន្ថែម​ពីលើ​ជំនួយ​ជា​ថវិកា​ផ្ទាល់ខ្លួន លោក ខៃ ប្រសិទ្ធ ក៏​ប្រាប់​ពី​ការ​តាំងចិត្ត ក្នុង​ការស្វែងរក​អ្នក​មាន​ទឹកចិត្ត​ទាំងឡាយ នៅ​ប្រទេស​អូស្ត្រាលី ឲ្យចូល​រួមជួយ​ខ្មែរ ក្នុង​គម្រោង​ផ្ដល់​អណ្ដូង​ទឹកស្អាត​នេះ​ផង​ដែរ​។​ ​ការចេញមុខ​ស្វែងរក​មូលនិធិ​ពី​ទឹកដី​អូស្ត្រាលី​នេះ គឺ​បន្ទាប់ពី​មើលឃើញថា ការផ្ដល់​ជំនួយ​តាមរយៈ​គម្រោង​សាវិន​កម្ពុជា អាច​ផ្ដល់​អណ្ដូង​ទឹកស្អាត ដល់ដៃ​អ្នកក្រីក្រ ដែល​ក្រៅពី​ទទួល​ការកោតសរសើរ ក៏​ជា​ការ​សន្សំ​បុណ្យ​តាម​ជំនឿ​ព្រះពុទ្ធសាសនា​។ ប្រធាន​គម្រោង​សាវិន​កម្ពុជា ថ្លែងថា «​បង ខៃ ប្រសិទ្ធិ គាត់​ធ្វើឲ្យ​ខ្ញុំ​ភ្ញាក់ផ្អើល​មែន ព្រោះ​ក្រោយពី​ជួយ​អណ្ដូងទឹក​ហើយ ថែម​ទាំង​កៀងគរ​មិត្តភក្ដិ​គាត់ ឲ្យ​ស្គាល់​ពី​គម្រោង​ខ្ញុំ​ទៀត​។ គាត់​ប្រាប់​ខ្ញុំ​ថា គាត់​នឹង​រក​ម្ចាស់​ជំនួយ​ពី​អូស្ត្រាលី​ឲ្យបាន​ច្រើន ផ្ដល់​អណ្ដូងទឹក​ឲ្យ​ខ្មែរ​បាន​ប្រើ ។ ជា​លទ្ធផល មិត្តភ័ក្រ្តគាត់​មួយចំនួន​ហើយ​បាន​ទាក់ទង​មក​ខ្ញុំ​»​។  ​លោក សាវិន ហ្វី​លីព បញ្ជាក់ថា អណ្ដូង​លើក​ទី​១​របស់លោក ខៃ ប្រសិទ្ធ បាន​ជួយ​កាលពី​ខែ​កក្កដា នៅ​ភូមិ​ព្រះ​ដាក់​ខេត្តសៀមរាប ដើម្បី​ឧទ្ទិស​ដល់​វិញ្ញាណក្ខន្ធ​របស់​អ្នកនាង ពិសិដ្ឋ ពិ​លីកា គម្រប់​ខួប​១៥​ឆ្នាំ​។ អណ្ដូង​លើក​ទី​២ បាន​ជួយ​កាល​ថ្ងៃទី​២៣ សីហា ២០១៤ ដល់​អ្នកភូមិ​ក្រពើ ក្នុងស្រុក​បាគង ខេត្ត​សៀមរាប​ដូចគ្នា ដោយ​មាន​បុរស​ម្នាក់​ឈ្មោះ​ចំរើន ជា​មិត្ត​ភ័ក្ត្រ​ចូលរួម​ជាមួយ​។​ ​លោក សាវិន ហ្វី​លីព ប្រាប់ថា តាមរយៈ​ការសន្យា​របស់​លោក​ខៃ ប្រសិទ្ធ លោក​មាន​ជំនឿ​ថា ពលរដ្ឋ​ខ្មែរ​រស់នៅ​ប្រទេស​អូស្ត្រាលី ពិត​ជា​រួម​ចំណែក​កាន់តែច្រើន​ជួយ​អណ្ដូង​ទឹកស្អាត​នៅ​កម្ពុជា​។ មកទល់ពេលនេះ គម្រោង​សាវិន​កម្ពុជា បាន​ស្វែងរក​ជំនួយ​ជីក​អណ្ដូង​ឲ្យ​សហគមន៍​ក្រីក្រ​បាន​ចំនួន​៤៥​អណ្ដូង​ហើយ ដោយ​៣៥​អណ្ដូង ផ្ដល់​ឲ្យ​អ្នកភូមិ​ជើងគូន ក្នុង​ស្រុក​សំរោង​ទង ខេត្តតាកែវ និង​១០​អណ្ដូង​ចុងក្រោយ​ផ្ដល់​ឲ្យ​សហគមន៍​ក្រីក្រ​នៅ​ខេត្ត​សៀមរាប​។​ អត្ថបទកំសាន្ត​ផ្សេង​ទៀត  ​នី​កូ ប្ដូរ​អត្តចរិត​ដាក់​អ្នកកាសែត​ដើម្បី​កេរ្តិ៍ឈ្មោះ​   ​នាយ​កុយ សម្ងំ​នៅជប៉ុនដើម្បី​ពង្រឹង​ទីផ្សារ​ជំនួញពេលត្រឡប់​មកវិញ   កែវ នីសា ទូរទស្សន៍​បាយ័ន​ឲ្យ​តំណែង​ត្រូវ​ចិត្ត​  ​លោក សាវិន ហ្វី​លីព បន្តថា​គម្រោង​បន្ទាប់​នឹង​ងាក​ទៅកាន់​ទឹកដី​ខេត្ត​បាត់ដំបង បន្ទាប់ពី​លោក​បាន​ចេញ​សម្ដែង​រឿង​ដល់​ភូមិ​ស្រុក​មួយចំនួន ហើយ​មើលឃើញ​ថា ទីនោះ​ប្រឈម​នឹង​កង្វះ​ទឹកស្អាត​។ លោក​ខៃ ប្រសិទ្ធ ប្រាប់​តាម​រយៈ​លោក ហ្វី​លីព ថា​នឹង​ប្រឹង​ឲ្យអស់​ពី​សមត្ថភាព ជួយ​រក​សប្បុរ​ជន​ឲ្យ​ផ្ដល់​អណ្ដូង​ទឹកស្អាត​ទៅកាន់​តំបន់​ទាំងនេះ​នៅ​កម្ពុជា​។​ ​គួរបញ្ជាក់​ថា​លោក ខៃ ប្រសិទ្ធ បាន​ចាកចេញ​ពី​ប្រទេស​កម្ពុជា ក្រោយ​មរណភាព​របស់​អ្នកនាង​ពិសិដ្ឋ ពិលិ​កា កាល​ឆ្នាំ​១៩៩៩ ស្របពេល​ដែល​មាន​ការ​លើកឡើងថា​ជា​ហេតុផល​​សុវត្ថិភាព​។  បច្ចុប្បន្ន​លោក​រស់​នៅក្នុង​រដ្ឋ Brisbane  ប្រទេស​អូស្ត្រាលី ជាមួយ​កូន​ប្រុស​ច្បង​វ័យ​ប្រមាណ​ជា​២០​ឆ្នាំ ឈ្មោះ ខៃ សិទ្ធលី​ស័ក្ត ហៅ​ម៉ៃ​ឃើ​ល ជា​ដំណក់ឈាម​អ្នកនាង ពិសិដ្ឋ ពិ​លីកា និង​ភរិយា​ថ្មី ដែល​មាន​កូនប្រុស​ស្រី​ចំនួន​៣​នាក់​ទៀ​បន្ថែម​៕ សូមសរសេរ​មក​កាន់​លោក វង្ស សុ​ម៉ា​លីន តាមរយៈ vongsomalin@yahoo.com 

    [អានបន្ត]
  • ​នី​កូ ប្ដូរ​អត្តចរិត​ដាក់​អ្នកកាសែត​ដើម្បី​កេរ្តិ៍ឈ្មោះ​

    ថ្ងៃសុក្រ ទី22 សីហា 2014, 01:18 PM

    ​ក្រោយ​បោះជំហាន​ចូល​ផលិតកម្ម​សាន់ដេ តារាចម្រៀង នី​កូ ត្រូវ​គេ​មើលឃើញ​ថា​ប្រែប្រួល​១០០​អង្សារ ទាំង​កេរ្តិ៍ឈ្មោះ ឱកាស​ការងារ និង​អត្តចរិត​តែម្ដង​។ កាល​ជ្រក​នៅ​ផលិតកម្ម​M លោក​ជាប់​ឈ្មោះ​ជា​តារាឆ្មើង​ឆ្មៃ និង​មិន​សូវ​ស្វាគមន៍​អ្នកសារព័ត៌មាន​នោះទេ សូម្បី​តែ​សុំ​ថតរូប​។ កាល​ពេលនោះ កេរ្តិ៍ឈ្មោះ​របស់​លោក​ត្រូវ​បាន​វាយ​សន្ធាប់​ដោយ​រឿងអាស្រូវ​ភ្ជាប់​ជាមួយ​លោក អៀង វិឆ័យ ពិធីករ​ប្រចាំ​ទូរទស្សន៍​បាយ័ន​នោះ​ផង ទើប​រឹតតែ​ធ្វើឲ្យ​លោក​ខ្លាចរ​អាគ្រប់​បណ្ដាញអ្នក​សារព័ត៌មាន​។ បើទោះជា​លោក​មិន​ចូល​ចិត្ត​និយាយ​រឿង​ច្រើន​ជាមួយ​អ្នកកាសែត​នៅ​ឡើយ  ក៏​ការសួរនាំ​និង​ការសុំ​ថតរូប​ក្នុង​រយៈពេល​នេះ ត្រូវបាន​លោក​ឆ្លើយតប​។​ ​អ្នក​ចាត់ការ​ទូទៅ​របស់​ផលិតកម្ម​សាន់ដេ លោក ឡាយ សុខ​ចំរើន និយាយថា តារាចម្រៀង​របស់​សាន់​ដេរ មិន​អាច​រង​ការរិះគន់​ព្រោះតែ​រឿង​សុំ​សម្ភាសន៍​មិនបាន ឬ​សុំ​ថតរូប​មិនបាន​នោះទេ ដោយសារតែ​គោលការណ៍​របស់​ផលិតកម្ម​មិន​ត្រូវការ​លេចឮ​ដំណឹង​ថា តារា​នេះ​ពិបាក​សម្ភាសន៍ ឬ​តារា​នោះ​វាយឫក​ជាដើម​។ យ៉ាងណាក៏ដោយ លោក​ថា​ផលិតកម្ម​មិន​មាន​សិទ្ធិ​កំណត់​ឲ្យ​តារា​របស់​ខ្លួន​ត្រូវ​តែ​ផ្ដល់​សម្ភាសន៍​ពាក់ព័ន្ធ​នឹង​រឿង​ឯកជន​របស់​ពួកគេ ដោយ​សូម្បី​តែ​ពួកគេ​មិន​ត្រូវការ​លាតត្រដាង​នោះទេ គឺ​ផលិតកម្ម​គ្រាន់តែ​ស្នើ​ឲ្យ​ពួក​គេ​បង្កើត​ទំនាក់ទំនង​ល្អ​ជាមួយ​ក្រុមអ្នកកាសែត​ប៉ុណ្ណោះ​។​

    [អានបន្ត]
  • ​នាយ​កុយ សម្ងំ​នៅជប៉ុនដើម្បី​ពង្រឹង​ទីផ្សារ​ជំនួញពេលត្រឡប់​មកវិញ

    ថ្ងៃព្រហស្បតិ៍ ទី21 សីហា 2014, 09:30 AM

    ​ប្រមាណ​ជាង​កន្លះ​ខែ​មក​ហើយ ដែល​តារា​កំប្លែង​ល្បីឈ្មោះ លោក ជួង ជី ហៅ​នាយ​កុយ  ចេញ​សម្ដែង​នៅក្នុង​ប្រទេស​ជប៉ុន​។ ជាមួយភាពជោគជ័យ លោក​ក៏​ត្រូវ​កូនប្រុស​អះអាងថា​កំពុង​រៀប​ប្រើ​ពេល​ដែល​បាន​ចំណាយ​នៅ​ទីនោះ ក្នុង​បំណង​ពង្រឹង​ជំនួញ ក្រោយ​ត្រឡប់​មកវិញ​ផងដែរ​។ ​តារា​កំប្លែង​នាយក​យ ជា​កូនប្រុស​របស់​នាយ​កុយ និយាយថា លោក​មិន​សូវ​បានដឹង​លម្អិត​ពី​ដំណើរ​ចេញទៅ​សម្ដែង​របស់​នាយ​កុយ​ប៉ុន្មាន​ទេ ប៉ុន្តែ​អ្វី​ដែល​លោក​បាន​ដឹង គឺ​ឪពុក​ទៅ​ជប៉ុន​ក្នុង​បំណង​ពង្រីក​ជំនួញ និង​ដើម្បី​ទៅ​សម្ដែង​រ៉ៃ​អង្គាស​ប្រាស់​ជួយ​ក្មេង​កំព្រា​។ មកទល់ពេលនេះ ភាគី​អ្នក​ធានា​បាន​ស្នើ​អូសបន្លាយ​ពេល ដើម្បី​ទទូច​ឲ្យ​ឪពុក និង​តារា​ផ្សេងទៀត បន្ត​ការសម្ដែង​មួយ​រយៈពេល​ទៀត ព្រោះតែ​ការគាំទ្រ​។​

    [អានបន្ត]

ព័ត៌មានផ្សេងៗ

វីដេអូព័ត៌មានថ្មីៗ

មើលវីដេអូព័ត៌មានថ្មីៗទាំងអស់
  • សង្គមស៊ីវិលថាគណបក្សនយោបាយ មិនផ្តល់ឱកាសឲ្យយុវជនក្លាយជាអ្នកនយោបាយ (វីដេអូ) ថ្ងៃសុក្រ ទី29 សីហា 2014, 08:37 PM
  • លោកទៀ បាញ់ បញ្ជាឲ្យកងពលតូចដែលសហការបង្ក្រាបបាតុកម្មនៅផ្លូវវ៉េងស្រេងរើសទ័ពបន្ថែម (​វីដេអូ) ថ្ងៃសុក្រ ទី29 សីហា 2014, 08:30 PM
  • អាជ្ញាធរជ្រោយចង្វាររុញច្រានជនពិការនិងក្រុមអ្នកតវ៉ាដីធ្លីមិនឲ្យយកញត្តិដាក់រដ្ឋសភា (វីដេអូ) ថ្ងៃសុក្រ ទី29 សីហា 2014, 07:00 PM
  • បេក្ខជនប្រលងធ្លាក់សញ្ញាប័ត្រទុតិយភូមិមានជាង៧៤ភាគរយ (វីដេអូ) ថ្ងៃសុក្រ ទី29 សីហា 2014, 06:59 PM
  • សកម្មភាពពលរដ្ឋតវ៉ារឿងដីធ្លីមកពីបីខេត្តនៅមុខវត្តពោធិយារាមនាព្រឹកថ្ងៃសុក្រនេះ (វីដេអូ) ថ្ងៃសុក្រ ទី29 សីហា 2014, 03:53 PM
  • បទសម្ភាសន៍ លោក អ៊ុក វី ជនពិការភ្នែករងគ្រោះដីធ្លីខេត្តប៉ៃលិន (វីដេអូ) ថ្ងៃសុក្រ ទី29 សីហា 2014, 03:44 PM

ព័ត៌មានកីឡា

មើលព័ត៌មានកីឡាទាំងអស់
  • ឌុ​ន រដ្ឋា អត់​សំណាង​បំបាក់​កីឡាករ​ចិន​

    ថ្ងៃសុក្រ ទី29 សីហា 2014, 04:37 PM

    ​ក្នុង​ការប្រកួត​ប្រដាល់​អន្តរជាតិ​ទាំង​៣​គូ​នៅលើ​សង្វៀន​ទូរទស្សន៍​អាស៊ីអាគ្នេយ៍​ប្រចាំ​ខែ​សីហា​នេះ កីឡាករ​កម្ពុជា​មាន​តែ ឌុ​ន រដ្ឋា ម្នាក់​ប៉ុណ្ណោះ​ដែល​ទទួល​បរាជ័យ នៅក្រោយ​ការប្រកួត​ដ៏​ស្វិតស្វាញ​របស់ខ្លួន​។ លទ្ធផល​នេះ ផ្ទុយស្រឡះ​ទាំងស្រុង​ពី​ការប៉ាន់ស្មាន ហើយក៏​ជា​ការ​អាម៉ាស់​ផងដែរ​ក្នុង​ប្រវត្តិ​ដែល​កីឡាករ​រូបនេះ ប៉ះ​ជាមួយ​កីឡាករ​បរទេស​។ ​ការប្រកួត​ដ៏​កក្រើក  កាលពី​ល្ងាច​ថ្ងៃទី​២៨ ខែ​សីហា​នោះ  កីឡាករ​បរទេស​ទាំង​៣ សុទ្ធតែ​ខ្លាំង ហើយ​ធ្វើឲ្យ​កីឡាករ​កម្ពុជា​វេទនា ទាំង​អ្នកចាញ់ និង​អ្នកឈ្នះ​។ បើ​ទោះ​ជា​កីឡាករ​កម្ពុជា​២​រូប​ក្លាយជា​អ្នក​ធ្វើឲ្យ​គូបដិបក្ខត​ទៅ​មុខមិ​ន​រួច ក្នុង​ទឹក​ទី​៣​ដូច​គ្នា​ក៏​ដោយ ប៉ុន្តែ​ជ័យជម្នះ​របស់​អ្នក​ទាំង​ពីរ ត្រូវ​មហាជន​គិតថា​ជា​សំណាង​ខ្មោច​ឲ្យ​ទាំងស្រុង ព្រោះ​ការប្រកួត​ជាក់ស្ដែង ភាគី​ខាង​បរទេស​ឯណោះ​ទេ ជា​អ្នក​មាន​ប្រៀប​តាំងពី​ដើមទី​រហូតដល់​ចប់​។ 

    [អានបន្ត]
  • ​វង្ស ណ​យ ប្រកាស​ឈប់​ប្រដាល់

    ថ្ងៃចន្ទ ទី18 សីហា 2014, 11:00 AM

    ​គ្រាន់​តែ​ឈ្នះ​កីឡាករ ឡៅ ស៊ី​ណាត ក្នុងជំនួប​សងសឹក និង​ដណ្ដើមពាន​គូ​ប៊ូ​តា កាលពី​រសៀល​ថ្ងៃ​អាទិត្យ ទី​១៧ ខែ​សីហា ភ្លាម កីឡាករ​ជើង​ខ្លាំង វង្ស ណ​យ បានប្រកាស​លាឈប់​ពី​អាជីព​ប្រដាល់​តែម្ដង​ដោយ​គ្មាន​ការកែប្រែ​។ លោក​អះអាង​ថា ការសម្រេចចិត្ត​នេះ​មិន​ងាកក្រោយ​ទេ ដើម្បី​អនាគត​ខ្លួន និង​កូន​ប្រពន្ធ ។​ ​ជំនួប​ដោយផ្ទាល់​នៅ​ប៉ុន្មាន​ម៉ោង​ក្រោយ​ការ​ប្រដាល់​ឈ្នះ​ជើង​ខ្លាំង ឡៅ ស៊ី​ណាត កីឡាករ វង្ស ណ​យ បាន​បញ្ជាក់​ប្រាប់​VOD​ដោយ​មុតមាំ​ថា គេ​លាឈប់​ការ​ប្រដាល់​ហើយ ដោយ​បាន​ទាំង​អះអាងថា ការ​ប្រដាល់​ជាមួយ​កីឡាករ ឡៅ ស៊ី​ណាត ដែល​ទើបនឹង​សងសឹក​បាន​ក្ដៅៗ ជាការ​ប្រដាល់​លើក​ចុងក្រោយ​របស់​ខ្លួន​ទៀតផង​។ លោក​ថា ការសម្រេចចិត្ត​នេះ​គឺ​ដើម្បី​ប្រពន្ធ​កូន និង​ដើម្បី​ស្វែងរក​ផ្លូវ​មួយ​សម្រាប់​ជីវិត​ដែល​ប្រសើរ​ជាង​ការ​ប្រដាល់​។ លោក​និយាយថា លោក​សប្បាយចិត្ត​ណាស់ ដែល​ការ​ប្រដាល់​បិទ​អាជីព​របស់​លោក បានឈ្នះ ឡៅ ស៊ី​ណាត  ក្នុង​ទឹក​ទី​១ ដើម្បី​ទុកជា​ស្នាដៃ​មុន​បាត់​មុខ ។​

    [អានបន្ត]
  • សេន ប៊ុនថេន បរាជ័យ​លើ​រេញ​ប្រទេស​ថៃ​

    ថ្ងៃអាទិត្យ ទី17 សីហា 2014, 07:27 AM

    ការប្រកួត​ដ៏​កក្រើក​ដែល​មានឈ្មោះ​ថា Thai Fight Asia-Europe នៅក្នុង​ប្រទេស​ថៃ កាលពី​យប់​ថ្ងៃ​ទី​១៦ សីហា ឆ្នាំ​២០១៤  កីឡាករ​កម្ពុជា​សេន ប៊ុនថេន បានត្រឹមតែ​កំដរ​កីឡាករ​បារាំង​ដល់​ទឹក​ចុងក្រោយ​ប៉ុណ្ណោះ​។ សេន ប៊ុនថេន សុំទោស​មហាជន​ចំពោះ​ការបរាជ័យ បើទោះជា​តប​នឹង​ការទទួលខុសត្រូវ​របស់លោក គឺ​មាន​ការចោទប្រកាន់​ថា​នោះ​ជា​រឿង​ពាក់ព័ន្ធ​ការលក់ខ្លួន​។  ​ការប្រកួត​ដែល​បាន​បន្ត​ផ្ទាល់​នៅ​ប៉ុស្ដិ៍​លេខ​៣​ថៃ និង​ប៉ុស្ដិ៍​លេខ​៥​នៅ​កម្ពុជា​នោះ មាន​ការចូលរួម​ពី​សំណាក់​កីឡាប្រដាល់​ល្បីៗ​ផ្នែក​សេរី​ជាច្រើន​មក​ពី​ទ្វីបអឺរ៉ុប និង​ទ្វីបអាស៊ី​។ ការប្រកួត​នេះ មាន​ការធ្វើ​ឡើង​នៅក្នុង​ប្រទេស​ផ្សេងៗ​រួចទៅហើយ តាម​លំនាំ​ការ​ប្រដាល់​ដាក់​ទ្រុង​របស់​One FC នា​ពេលកន្លងមក​។ Thai Fight Asia- Europe ធ្លាប់​ធ្វើ​ឡើង​នៅ​ទីក្រុង​ប៉េង​កាំ​ង​ប្រទេស​ចិន ប្រទេស​ហ្វីលីពីន និង​បណ្ដា​ប្រទេស​ជាច្រើន​មក​ហើយ​នៅ​ទ្វី​អាស៊ី​។ យ៉ាងណា​ក៏​ដោយ​ព្រឹត្តិការណ៍​នេះ ច្រើន​ធ្វើឡើង​នៅ​ប្រទេស​ថៃ​ច្រើន​ជាង  ដោយ​ការប្រកួត​ដែល​មាន​កីឡាករ​សេន ប៊ុនថេន ចូលរួម​លើក​នេះ ធ្វើឡើង​នៅក្នុង​ខេត្ត​ណា​ក់​ខុន សា​វ៉ាន់ របស់​ប្រទេស​ថៃ​។  ​សេន ប៊ុនថេន ត្រូវ​គេ​ឲ្យ​ប្រកួត​ជា​មួយ​កីឡាករ​បារាំង​វ័យ​២៣​ឆ្នាំ ឈ្មោះ Antoine Pinto ដែល​ធ្លាប់​ប្រកួត​នៅលើ​រេញ​បាន​ប្រមាណ​ជាង​១០០​លើក​រួចមកហើយ​។ ការ​ប្រដាល់សេរី​ដែល​មាន​តំណាង​ជើង​ខ្លាំង មកពី​ប្រទេស​ដោយឡែកៗ​គ្នា​នេះ តម្រូវឲ្យ​វាយ​លុកគ្នា​ដោយ​សេរី មិន​ពាក់​ហ្គង់​ដៃ និង​ប្រយុទ្ធ​គ្នា​តែ​៣​ទឹក​ប៉ុណ្ណោះ​។ ក្នុង​ទឹក​ទី​១ កីឡាករ​កម្ពុជា និង​កីឡាករ​បារាំង ស្ថិតក្នុង​ភាព​ស្ទាបស្ទង់​គ្នា​នៅឡើយ​ទេ​។ ឈាន​ដល់​ទឹក​ទី​២ សេន ប៊ុនថេន ភ្លាត់​ឲ្យ​បារាំង រុញ​ដួល​ផ្ញារជើង​ផ្ទប់​រេញ ហើយ​ចាប់ផ្ដើម​បាក់​កម្លាំង និង​ចាញ់​ប្រៀប​យ៉ាង​ចម្លែក​។ អ្នកទស្សនា​ជា​ជនជាតិ​កម្ពុជា​សម្ដែង​ការខកចិត្ត​ទ្វេរ​ដង ក្នុង​ទឹក​ទី​៣ បន្ទាប់ពី​លោក​បណ្ដោយ​ឲ្យ​បារាំង​បោក​ដួល​ម្ដង​ជា​ពីរ​ដង និង​ត្រូវ​បារាំង​ម៉ាត់​ត្រូវ​ផង ធាក់​ត្រូវ​កណ្ដាល​មុខ​ផង មុន​ចប់​ទឹក​។  សេន ប៊ុនថេន បាន​ប្រតិកម្ម​មួយស្របក់​ដែរ តប​លោក​អាជ្ញាកណ្ដាល ដោយ​លើកឡើង​ថា​អាជ្ញាកណ្ដាល​ចាប់ខ្លួន​គ្រប់​លើក ធ្វើឲ្យ​លោក​បាត់​ឱកាស ពេល​មាន​បំណង​វាយលុក​គូប្រកួត​។  ​យ៉ាងណាមិញ តំណាង​កម្ពុជា បាន​ទទួល​ដឹងថា​ចាញ់​ពិន្ទុ​កីឡាករ​បារាំង តាំងពី​មុន​ការប្រកាស​ម្ល៉េះ ដោយសារតែ​២​ទឹក​ចុងក្រោយ គឺ​កីឡាករ​បារាំង​ពិតជា​មាន​កម្រិត​វាយលុក​ពិបាក​ទប់​។  ​សេន ប៊ុនថេន និយាយថា «​សូមទោស​បងប្អូន​ខ្មែរ​ទាំងអស់ ខ្ញុំ​ចាញ់ហើយ ធ្វើឲ្យ​បងប្អូន​អស់សង្ឃឹម​»​។ នេះ​ជា​សារ​ដែល​លោក​សរសេរ​បង្ហោះ នៅលើ​បណ្ដាញ​Facebook  បន្ទាប់ពី​ចប់​ការប្រកួត​តែ​ប៉ុន្មាន​នាទី នៅលើ​កញ្ចក់​ទូរទស្សន៍​។ តប​នឹង​ការសុំ​ទោស​របស់​លោក មាន​ការលើកឡើង​ភ្លាមៗ​ថា​នោះ ជា​បញ្ហា​ប្រកួត​មិន​អស់ដៃ ឬ​លក់​ខ្លួន​។ សេន ប៊ុនថេន មិនឃើញ​តប នឹង​ការវាយប្រហារ​នេះ​ទេ ប៉ុន្តែ​អ្នកគាំទ្រ​ផ្សេងទៀត បាន​ប្រឆាំង​តប​នឹង​ការលើកឡើង​នេះ​។ អ្នក​មាន​សុទិដ្ឋិនិយម​ទាំងនោះ សរសេរ​លើកទឹកចិត្ត​ថា ហេតុផល​ចាញ់​របស់​សេន ប៊ុនថេន គឺ​ដោយសារតែ​កីឡាករ​កម្ពុជា និង​បរទេស​ចាញ់​កម្លាំង​គ្នា​ដូច​មេឃ និង​ដី ព្រោះ​តែ​ស្ថានភាព​រស់នៅ និង​ប្រាក់​កម្រៃ​នោះ​តែប៉ុណ្ណោះ​។ សេន ប៊ុនថេន បានទទួល​ការចាប់អារម្មណ៍​ច្រើន​ពី​សំណាក់​ពិធីករ​ថៃ និង​អ្នកទស្សនា​ផ្ទាល់ ពិសេស​នៅ​ពេល​លោក​កាន់​ទង់ជាតិ​កម្ពុជា​ចេញ​មក​បង្ហាញ នៅមុន​ការប្រកួត​នោះ​៕ ​សរសេរ​មកកាន់​លោក វង្ស សុ​ម៉ា​លីន តាមរយៈ​vongsomalin@yahoo.com

    [អានបន្ត]
  • ឯម ខ្លឹម​ខ្មៅ ទទួល​សិទ្ធិ​​ប្រកួត​ក្រៅ​ប៉ុស្ដិ៍​

    ថ្ងៃអង្គារ ទី12 សីហា 2014, 12:10 PM

    ​ជា​រឿង​វិជ្ជមាន​ដែល​កីឡាករប្រដាល់​ជើង​ខ្លាំង ឯម ខ្លឹម​ខ្មៅ ត្រូវ​មន្ត្រី​ប្រចាំ​ទូរទស្សន៍​បាយ័ន សម្រេច​ផ្ដល់​សិទ្ធិ​ឲ្យ​ប្រកួត​ក្រៅ​ប៉ុស្ដិ៍  ផ្ទុយ​ពី​កុងត្រា​ដែល​បាន​កំណត់ឡើង​។ នេះ​ជា​ជំហរ​មិន​ធ្លាប់មាន ចាប់តាំងពី​លោក​មាន​ឈ្មោះ​បោះ​សំឡេង ក្លាយ​ជា​ជើង​ខ្លាំង​ប្រចាំ​សង្វៀន​ប្រដាល់​។  ​លោក ឯម ចាន់​សុផល មន្ត្រី​ផ្គូផ្គង​កីឡាប្រដាល់​ប្រចាំ​ទូរទស្សន៍​បាយ័ន និង​ជា​គ្រូបង្វឹក​ប្រចាំ​ក្លឹប​ឫទ្ធិ​ពោធិ​សែន​ជ័យ​បញ្ជាក់ថា ឯម ខ្លឹម​ខ្មៅ ជា​កូនសិស្ស​របស់​លោក នឹង​មាន​សិទ្ធិ​ចេញ​ប្រកួត លើ​សង្វៀន​ផ្សេង​ក្រៅ​ពី​ទូរទស្សន៍​បាយ័ន ចាប់ពី​ពេលនេះ​ទៅ​។ ការប្រកាស​នេះ ឆ្លើយតប​ការទទូច ដែល​ចង់​ឃើញ​កីឡាករ ឯម ខ្លឹម​ខ្មៅ មាន​សិទ្ធិ​ប្រកួត​នៅឯ​សង្វៀន​ប៉ុស្ដិ៍​ផ្សេង ដូចគ្នា​នឹង​កីឡាករ កែវ រំ​ចង់ ដែល​ជាប់​កុងត្រា​របស់​ប៉ុស្ដិ៍​បាយ័ន​នោះដែរ​។​ ​លោក​អះអាង​ថា ខ្លឹម​ខ្មៅ ទទួល​ប្រាក់ខែ​ជា​ប្រចាំខែ​ពី​បាយ័ន ជា​ថ្នូរ​នឹង​លក្ខខណ្ឌ​មិន​ឡើង​ប្រកួ​តនៅប៉ុស្ដិ៍​ផ្សេង ប៉ុន្តែ​ការរារាំង មិន​គួរ​នឹង​បន្ត​នោះ​ទេ ដើម្បី​កុំឲ្យ​ភាព​ខ្លាំង​របស់​កីឡាក​រម្នា​ក់ ប្រែជា​ចុះខ្សោយ​ព្រោះតែ​បាក់​ទឹកចិត្ត​។ កីឡាករ​ដែល​ស្ទុះ​ឡើង​កូដ មិន​អាច​ស្ទាក់​ជើង​ឲ្យនៅតែ​មួយ​កន្លែង​បានទេ ក្នុង​កាលៈទេសៈ ដែល​កេរ្តិ៍ឈ្មោះ​របស់​កីឡាករ​នោះ កាន់តែ​មាន​ការគាំទ្រ​ «​ពេលនេះ ខ្ញុំ​បាន​ស្នើ​ថ្នាក់លើ​រួចហើយឲ្យ ខ្លឹម​ខ្មៅ​បាន​ប្រកួត​ប៉ុស្ដិ៍​ផ្សេង​បើ​មាន​ការស្នើសុំ ព្រោះ​ខ្ញុំ​មិន​ចង់ឲ្យ​គេ​បាក់​ទឹកចិត្ត និង​បាត់បង់​ឱកាស​ពង្រី​កកេរ្តិ៍ឈ្មោះ​នោះទេ​!»​។ យ៉ាងណាក៏ដោយ ក្នុងនាម​ជា​គ្រូបង្វឹក និង​ជា​មន្ត្រី​ប្រចាំ​របស់​ទូរទស្សន៍​បាយ័ន លោក​ត្រូវ​ដឹង​ពី​គូបដិបក្ខ និង​ព្រឹត្តិ​ការណ៍​ដែល ឯម ខ្លឹម​ខ្មៅ ត្រូវ​ឡើង​ប្រកួត​នោះ​ជាមុន ដើម្បី​កុំឲ្យ​ការ​ប្រកួតរបស់​កូនសិស្ស​ខ្លួន ក្លាយជា​រឿង​បាត់បង់​ប្រជាប្រិយភាព​ទៅវិញ​ «​នៅ​បាយ័ន ខ្លឹម​ខ្មៅ អាច​ថា​ជា​តួឯក​ម្នាក់ ក្នុង​ប្រភេទ​ទម្ងន់​៦៣,៥​គីឡូក្រាម អ៊ីចឹង​បើ​ទៅ​ប៉ុស្ដិ៍​ផ្សេង​ក៏​ត្រូវតែ​អញ្ចឹង​ដែរ ទើប​យើង​ឲ្យទៅ​»​។ លោក​ថា​ការពិត​កីឡាករ​ដែល​ជាប់​កុងត្រា គឺ​មិន​អាច​ទទួល​សិទ្ធិ​ឡើង​ប្រកួត​ប៉ុស្ដិ៍​ផ្សេង​បាន​ទេ ប៉ុន្តែ​មក​ពី​មុន​នេះ កីឡាករ កែវ រំ​ចង់ ដែល​ជាប់​កុងត្រា​នៅ​បាយ័ន​ដូចគ្នា ក៏​ឡើង​ប៉ុស្ដិ៍​ផ្សេង​បានដែរ ទើប​យើង​ឲ្យមាន​ករណី​ពិសេស​ចំពោះ ខ្លឹម​ខ្មៅ ផងដែរ​។ ​យោង​តាម​ការ​ស្ទាបស្ទង់ ក្នុង​ប្រភេទ​ទម្ងន់​៦៣,៥​គីឡួក្រាម  ឯម ខ្លឹម​ខ្មៅ ស្ទើរតែ​រក​គូប្រកួត​ក្នុងស្រុក​លែងឃើញ ជាក់ស្ដែង​សូម្បីតែ​កីឡាករ ផល សោភ័ណ្ឌ ម្ចាស់​ខ្សែក្រវាត់​ស្រា​បៀ​កម្ពុជា​ក្នុង​ប្រភេទ​ទម្ងន់​មួយ​នេះ​ឆ្នាំ​២០១២ ក៏​ប្រកួត​មិន​ឈ្នះ​នោះដែរ កាលពី​ថ្ងៃ​ទី​២០ កក្កដា ២០១៤​។   ​ឯម ខ្លឹម​ខ្មៅ សប្បាយចិត្ត​ប្លែក បន្ទាប់ពី​ឮ​ថា​គ្រូបង្វឹក ដែល​ជា​មន្ត្រី​ប្រចាំ​ទូរទស្សន៍​បាយ័ន និង​ប្រចាំ​នៅក្នុង​សហព័ន្ធ​ប្រដាល់​កម្ពុជា​ផង យល់ព្រម​ទម្លាក់ចោល​លក្ខណ្ឌ​មិន​ឲ្យចេញ​ប្រកួត​ប៉ុស្ដិ៍​ផ្សេង ដែល​លោក​មិន​ធ្លាប់​គិត «​ការពិត​ខ្ញុំ​ចង់​ប្រកួត​ប៉ុស្ដិ៍​ផ្សេង​ណាស់ ព្រោះ​ចង់​រក​លុយ​បន្ថែម ហើយ​ខ្ញុំ​សង្ឃឹមថា ការលើកឡើង​របស់​លោក​គ្រូ នឹង​ជួយ​ឲ្យ​ខ្ញុំ​រីកចម្រើនជាង​មុន »​។​ ​យ៉ាងណាក៏ដោយ លោក​មិន​ហ៊ាន​សម្រេច​ខ្លួនឯង ពាក់ព័ន្ធ​នឹង​ការស្នើ​សុំ​ទៅ​ប៉ុស្ដិ៍​ខាងក្រៅ​នោះទេ បើ​គ្មាន​ចម្លើយ​ឯកភាព និង​ការចាត់ចែង​ដោយ​ផ្ទាល់​ពី​គ្រូ​របស់ខ្លួន​។ លោក​រំពឹង​ថា ខ្លួន​នឹង​មាន​ឱកាស​ឡើង​បង្ហាញមុខ​នៅ​ប៉ុស្ដិ៍​ផ្សេង​បាន​ឆាប់ បន្ទាប់​ពី​ការបើក​ច្រក​កុងត្រា ដែល​ធ្លាប់​បិទ​ជិតឈឹង​អស់​រយៈពេល​យ៉ាង​យូរ​។​ ​លោក​ថា​ប្រាក់ខែ​១០០​ដុល្លារ​ពី​ទូរទស្សន៍​បាយ័ន មិន​​គ្រប់គ្រាន់​​ទេ ក្នុងពេល​ដែល​ស្ថាប័ន​បាយ័ន​មិន​អាច​រៀបចំការ​ប្រកួត​​ឲ្យបាន​ញឹកញាប់​ក្នុង​មួយ​ខែៗ បន្ទាប់​លោក​ត្រូវ​បាយ័ន​ចាត់ទុកជា​ជើង​ខ្លាំង​។ លោក​ឯម ចាន់​សុផល ប្រាប់ថា  ខ្លឹម​ខ្មៅ  មាន​សិទ្ធិ​ចេញ​ប្រកួត​ប៉ុស្ដិ៍​ផ្សេង ប៉ុន្តែ​មិន​ញឹកញាប់​នោះទេ​ដើម្បី​កុំ​ឲ្យ​ឆាប់​សាប ហើយ​លុះត្រាតែ​ជា​ការប្រកួត​នោះ​ជា​ការប្រកួត​ប្រាក់​លាន ឬ​ការប្រកួត​អន្តរជាតិ​ធំៗ ទើប​លោក​ស្វាគមន៍​ចំពោះ​ការស្នើសុំ​ទាំងនោះ​៕  សូមសរសេរមកកាន់លោក វង្ស សុ​ម៉ា​លីន​ តាមរយៈ vongsomalin@yahoo.com ​

    [អានបន្ត]
  • ម៉ឺន សុភា ធ្វើឲ្យ កែវ រំ​ចង់ របូត​ពាន និង​ប្រាក់​លាន​

    ថ្ងៃចន្ទ ទី4 សីហា 2014, 08:55 AM

    ​លទ្ធផល​នៃ​ការប្រកួត​ប៉ះគ្នា​ដ៏​កក្រើក​វាង​កីឡាករ កែវ រំ​ចង់ និង ម៉ឺន សុភា នៅ​ស្ថានីយ៍​ទូរទស្សន៍​បាយ័ន​កាលពី​ល្ងាច​ថ្ងៃ​អាទិត្យ​ទី​០៣ សីហា ផ្ទុយ​ទាំងស្រុង​ពី​ការព្យាករណ៍​។ ម៉ឺន សុភា បាន​ក្លាយជា​អ្នកឈ្នះ និង​ក្លាយជា​គូបដិបក្ខ​ថ្មី​ដែល​អាច​បំបាក់ កែវ រំ​ចង់ ដែល​ចាញ់ វង្ស ណ​យ រហូត​បាន ប្រកាស​ឈប់​ប្រកួត​ជា​មួយ ។​ ​វិល​ទៅ​កាន់​រយៈពេល​កន្លះ​ឆ្នាំមុន កីឡាករ ម៉ឺន សុភា កុំ​ថា​មានឱកាស​ឡើង​ប្រកួត ជាមួយ​កីឡាករ​កែវ រំ​ចង់ គឺ​សូម្បី​តែ​មាន​អ្នក​គិត​ចង់​ផ្គូរ​ផ្គង​ឲ្យ​ប៉ះគ្នា ក៏​គ្មាន​ដែរ ដោយសារ​ទី​១ ម៉ឺន សុភា កាល​នោះ​នៅ​គីឡូ​ទាប និង​ទី​២ ដោយសារ កែវ រំ​ចង់ ល្បី​ខ្លាំងពេក ខណៈ ម៉ឺន សុភា ទើបតែ​ឡើង​សន្ទុះ​។​ ​បើ​ទោះ​ជា​មុន​នេះ កែវ រំ​ចង់ ធ្លាក់ខ្លួន​ចាញ់​វង្ស ណ​យ  និង​ឈ្នះ​កីឡាករ ព្រំ សំណាង ក្រោម​ការរិះគន់​ថា​ប្ដូរ​លទ្ធផល ក៏​ជំនឿ​ជឿជាក់​ថា​កីឡាករ​រូប​នេះ​នឹង​ឈ្នះ​នៅ​មាន​ច្រើន​។ យ៉ាងណាក៏ដោយ ការប្រកួត​ជាក់ស្ដែង មិន​ដូច​ការគិត​នោះទេ ទើប​នាំ​ឲ្យ​ការភ្ញាក់ផ្អើល ក្នុងពេល ម៉ឺន សុភា ស្រាប់តែ​មាន​ប្រៀប ហើយ​អាច​បំបាក់ កែវ រំ​ចង់ ក្នុងជំនួប​ដណ្ដើមពាន​រង្វាន់​ទូរទស្សន៍​បាយ័ន និង​រង្វាន់​ប្រាក់​លាន​។  ​ពេញ​៥​ទឹក កែវ រំ​ចង់ ដ្បិតថា​វ៉ៃ​រត់ៗ ប៉ុន្តែ​លោក​ក៏​បាន​វាយ​សំឡុត និង​វាយ​បុក​បានល្អ តែ ម៉ឺន សុភា នៅតែ​មិន​ចាញ់​សំឡុត​ហើយ​ទប់​ជំហរ​បាន​រឹងមាំ​។   ម៉ឺន សុភា កាន់តែ​ធ្វើឲ្យ​មាន​ការចាប់អារ​ម្មណ៍ បើទោះជា​កែវ រំ​ចង់ វាយ​ឲ្យ​រយះ​ថ្ងាស ដែល​អ្នកទស្សនា​ភាគច្រើន គិត​ថា​ស៊ូ​បន្ត​មិន​រួច​។​ ​នៅក្នុង​សង្វៀន​គេ​ឮ​សម្រែក​ស្រែក​ហ៊ោកញ្ជ្រៀវ​យ៉ាង​កងរំពង បន្ទរ​សន្ធាប់​តាម​សន្ទុះ​វាយ​ចេញ​ដ៏​រស់​រវើក​របស់​ម៉ឺន សុភា​។ នៅ​ទឹក​ចុងក្រោយ កែវ រំ​ចង់​ដែល​ដឹង​ថា ខ្លួន​ចាញ់​ប្រៀប បាន​ស្ទុះ​សម្រុក  ប៉ុន្តែ​ជា​ថ្នូរ​មក​វិញ បានត្រឹមតែ​រង​កណ្ដាប់​ដៃ កែង និង​រន្ទះ​ជើង ពី​គូបដិបក្ខ​។  ​ម៉ឺន សុភា លោតកញ្ឆេង​ស្ទើរហោះ ក្រោយ​ការប្រកាស​ថា​បានឈ្នះ​ពិន្ទុ ក្នុងពេល​ដែល​លោក​ហាក់​មិន​មាន​ជំនឿ​ចិត្ត ព្រោះ​ភ័យ​រឿង​កែវ រំ​ចង់ មាន​ខ្នងបង្អែក​ល្អ​ជាង​។ កែវ រំ​ចង់ ត្រូវ​គេ​ដឹងថា ក្រៅ​ពី​ជា​កីឡាករ​ដែល​មានក្រេ​ឌី​តជាង ក៏​ជា​បុគ្គលិក​ពេញសិទ្ធិ​ដែល​ស៊ីប្រាក់ខែ​ពី​ទូរទស្សន៍​បាយ័ន​ក្នុង​មួយខែ​៤០០​ដុល្លារ  ជា​ថ្នូរ​មិន​ចេញ​ប្រកួត​ប៉ុស្ដិ៍​ផ្សេង​។​ ព័ត៌មានកីឡាផ្សេង​ទៀត  ​កម្ពុជា​ឈ្នះ​កីឡាករ​ថៃ​ទាំងអស់​លើ​សង្វៀន​ SEATV   ឯម ខ្លឹម​ខ្មៅ បំបាក់​ផល សោភ័ណ្ឌ យកពាន និង​ប្រាក់​លាន   Pacquiao ប៉ះ​ជាមួយ​អ្នក​ប្រដាល់​មិន​ដែល​ចាញ់​Chris Algieri នៅ​ថ្ងៃ​ទី​២២​ខែវិច្ឆិកា​  ​ជ័យជម្នះ​នេះ ក្រៅពី​បង្កើន​ក្រេ​ឌី​ត ក៏​ត្រូវ​គេ​ចារ​ជា​មនុស្ស​ទី​២ ដែល​បាន​ឈ្នះ​កីឡាករ​រៀមច្បង កែវ រំ​ចង់ ផងដែរ​។ លោក​ទទួលបាន​ពាន​ប្រចាំ​ទូរទស្សន៍​បាយ័ន និង​ទឹកប្រាក់​ចំនួន ២.៨០០.០០០​រៀល ក្នុងពេលដែល កែវ រំ​ចង់ ដែល​ទទួល​បរាជ័យ បាន​ចុះចេញ​ពី​សង្វៀន​ព្រម​ជាមួយ​នឹង​ទឹកមុខ​ស្រពាប់​ស្រពោន ។ ​ម៉ឺន សុភា និយាយថា នេះ​ជា​ក្ដី​ស្រ​ម៉ៃ​ធំ​មួយ ដែល​ខ្លួន​មិន​ដែល​នឹក​ស្រ​ម៉ៃ​សោះ នៅមុន​ការប្រកួត​ចាប់ផ្ដើម​។ កែវ រំ​ចង់ មិនអាច​សុំ​ការបញ្ជាក់​បានទេ ប៉ុន្តែ​បរាជ័យ​លើក​នេះ កំពុង​បន្ថែម សម្ពាធ​យ៉ាង​ធ្ងន់ ដែល​រុញ​ឲ្យ​លោក​សម្រេច​ដើរចេញ​ពី​សង្វៀន​ប្រដាល់​មិនយូរ​មិនឆាប់ ក្នុងពេល​ដែល​មុននេះ លោក​បាន​ប្រកាស​រួច​ហើយ​ថា បើ​ការប្រកួត​នៅលើ​សង្វៀន​មិន​អាច​រីកចំរើន នោះ​នឹង​បោះបង់ ដើម្បី​បញ្ចប់​ការ​អាម៉ាស់​៕ សូមសរសេរមកកាន់លោក ​វង្ស សុ​ម៉ា​លីន តាមរយៈ vongsomalin@yahoo.com

    [អានបន្ត]
  • ​កម្ពុជា​ឈ្នះ​កីឡាករ​ថៃ​ទាំងអស់​លើ​សង្វៀន​ SEATV

    ថ្ងៃសុក្រ ទី1 សីហា 2014, 10:13 AM

    ​ជំនួប​ដ៏​កក្រើក​រវាង​កីឡាករ​កម្ពុជា និង​កីឡាករ​ថៃ កាលពី​ល្ងាច​ថ្ងៃទី​៣១​កក្កដា នៅលើ​សង្វៀន​អន្តរជាតិ​ប្រចាំខែ​របស់​ទូរទស្សន៍​អាស៊ីអាគ្នេយ៍ ភាគី​កម្ពុជា​ទទួល​ជ័យជម្នះ​ទាំងអស់ ដោយ​បាន​ទាំង​ផ្ដួល​ឲ្យ​កីឡាក​រថៃ សន្លប់​ទាំង​៣​រូប​ទៀត​ផង​។ យ៉ាងណាក៏ដោយ កីឡាករ​កម្ពុជា ក៏​ត្រូវ​គេ​មើលឃើញ​ថា ឈ្នះ​កីឡាករ​ថៃ ដោយ​វេទនា​មិន​តិច​ដែរ​។ កីឡាករ​ពេជ្រ សីហា មក​ពី​ក្លឹប​កីឡា​ប្រដាល់​ក្រសួង​ការពារជាតិ គឺជា​គូ​អន្តរជាតិ​ទី​១ ដែល បើកឆាក​ផ្ដួល​កីឡាករ TAVARAJ  របស់​ថៃ​ឲ្យ​សន្លប់​ក្នុង​ទឹក​ទី​៣​។ នៅក្នុង​ទឹក​ទី​១ កីឡាករ​បង្គោល​ខៀវ​របស់​ថៃ គឺជា​អ្នក​សង្កត់​បាន​មុន​នូវ​ភាព​នាំមុខ ក្នុងការ​វាយ​ម៉ាត់ និង​ទាត់​ធ្វេង​ស្ដាំ សន្ធប់​លើ​កីឡាករ ពេជ្រ សីហា​។ រហូត​ដល់​ចុង​ទឹក​ទី​២ ទើប​គេ​ឃើញ​កីឡាករ​បង្គោល​ក្រហម​របស់​កម្ពុជា មានឱកាស​វាយ​កែង​បក និង​អុក​ជង្គង់​តបត​។

    [អានបន្ត]

ព័ត៌មានផ្សេងៗ

បទយកការណ៍

បទយកការណ៍ផ្សេងទៀត

ព័ត៌មានបែបស៊ើបអង្កេត

ព័ត៌មានបែបស៊ើបអង្កេតផ្សេងទៀត

វិភាគព្រឹត្តិការណ៍

វិភាគព្រឹត្តិការណ៍ផ្សេងទៀត

បទសម្ភាសន៍

បទសម្ភាសន៍ ផ្សេងទៀត
To