ក្រសួងសុខាភិបាលនិងអង្គការសុខភាពពិភពលោកអំពាវនាវឲ្យប្រជាពលរដ្ឋមានការប្រុងប្រយ័ត្នក្នុងការបរិភោគអាហារនិងស្រាក្នុងអំឡុងពេលចូលឆ្នាំថ្មីខាងមុខនេះ ដោយអះអាងថាដើម្បីជៀសផុតពីការពុលអាហារ។
ក្នុងសេចក្ដីប្រកាសព័ត៌មានចុះថ្ងៃទី២២ ខែមីនា ក្រសួងសុខាភិបាល បានឲ្យដឹងថាការពុលអាហារគឺជាការបង្កឡើងដោយការរៀបចំអាហារឬទឹកមិនមានអនាម័យដែលមានមេរោគ បាក់តេរី វិរុស ប៉ារ៉ាស៊ីត ឬសារធាតុគឺមី។ ការពុលអាហានេះមានរោគសញ្ញាដូចជា ក្អួត ចង្អោរ រាក មួល ដែលអាចគ្រោះថ្នាក់ដល់ជីវិតបាន។
បើតាមសេចក្ដីប្រកាសព័ត៌មានដដែល ការពុលស្រាបង្កឡើងដោយជាតិមេតាណុលខ្ពស់ដែលស្រាទាំងនោះត្រូវបានផលិតឡើងតាមមូលដ្ឋានសហគមន៍មិនត្រឹមត្រូវតាមបច្ចេកទេស។ ការពុលស្រានេះបណ្ដាលឲ្យមានរោគសញ្ញាដូចជា ឈឺក្បាល ក្អួត ឈឺពោះ វិលមុខ ងងឹតភ្នែក សន្លប់ ពិបាកដកដង្ហើម និងអាចវិវត្តទៅជាស្លាប់បាន។
ក្រសួងសុខាភិបាលបានណែនាំឲ្យចំអិនអាហារឲ្យបានឆ្អិនល្អជាពិសេសសាច់សត្វស្លាប់ ស៊ុត និងអាហារសមុទ្រ ប្រើប្រាស់ទឹក និងវត្ថុធាតុដើមដែលមានសុវត្ថិភាព។ ទុកដាក់អាហារឆៅនិងឆ្អិនដាច់ដោយឡែកពីគ្នានិងរក្សាភាពស្អាតដោយលាងដៃមុនចាប់កាន់អាហារ។
បើតាមក្រសួងសុខាភិបាល កាលពីឆ្នាំ២០១៥កន្លងទៅមានករណីពុលអាហារចំនួន៣១លើកនិងឆ្នាំ២០១៦នេះ មានចំនួន៣លើកដែលបានរាយការណ៍មកនាយកដ្ឋានប្រយុទ្ធប្រឆាំងជំងឺឆ្លង។ ចំណែកឯករណីពុលស្រាមានលក្ខណៈជាបណ្ដុំចំនួន៤លើកនៅខេត្តក្រចេះក្នុងឆ្នាំ ២០១៥៕