លោកនាយករដ្ឋមន្ត្រី ហ៊ុន សែន បានផ្ញើសារទៅកាន់សាធារណជន ខណៈដែលកម្ពុជាកំពុងជួបអាកាសធាតុរាំងស្ងួតថា ក្នុងកាលៈទេសៈណាក៏ដោយនឹងមិនឲ្យប្រជាពលរដ្ឋខ្វះទឹកទទួលទានទេ។
លោក ហ៊ុន សែន បានសរសេរនៅលើបណ្តាញសង្គមផ្លូវការរបស់លោក ដែលបានបង្ហោះនៅប៉ុន្មានម៉ោងមុននេះថា ចំណាត់ការចែកចាយ និងផ្គត់ផ្គង់ទឹក គឺនៅបន្តផ្តល់ជូន ប្រជាពលរដ្ឋ នៅតាមតំបន់ដែលកំពុងខ្វះខាតទឹក។
លោក ហ៊ុន សែន បន្តថា រីឯចំណាត់ការចុះជីក និងស្តារអណ្តូង ស្រះទឹក គឺនៅបន្តធ្វើដោយគ្មានការធ្វេសប្រហែសបានឡើយ។
លោកបញ្ជាក់ថា ទោះបីក្នុងកាលៈទេសៈបែបណាក៏ដោយក៏មិនត្រូវឲ្យប្រជាពលរដ្ឋអត់ទឹកទទួលទានដាច់ខាត។
ទោះជាយ៉ាងណា នៅលើបណ្តាញសង្គម របស់លោកដែលបានបង្ហោះនៅថ្ងៃនេះ លោកមិនបាននិយាយដល់វិធានការ ផ្គត់ផ្គងទឹកសម្រាប់តម្រូវការដំណាំកសិកម្ម ដែលជាតម្រូវការចំបាច់របស់កសិករទេ។
កន្លងទៅអ្នកនយោបាយ ដែលមិនកាន់អំណាចធ្លាប់បានផ្តល់យោបល់ថា រដ្ឋាភិបាលគួបជំរុញ យន្តការពង្រីកប្រព័ន្ធធារាសាស្ត្រ ឲ្យបានច្រើនសម្រាប់ស្តុកទឹក ពេលរដូវភ្លៀងធ្លាក់ និងសម្រាប់ផ្គត់ផ្គង់ដល់តម្រូវការ ដាំដុះ របស់កសិករ ពេលរដូវប្រាំងចូលមកដល់ ជាជាងធ្វើយុទ្ធនាការចុះចែកទឹក ពេលអាកាសធាតុរាំងស្ងួត។
យ៉ាងណាក៏ដោយ ក្រៅបង្ហាញជំហយកចិត្តទុកដាក់មិនឲ្យពលរដ្ឋខ្វះទឹកទទួលទាន លោកបាន រំឭកមន្ត្រីក្រោមឱវាទ ឲ្យយកចិត្តទុកដាក់ពីការមើលថែទាំ និងជួសជុលសាលារៀន និងឲ្យយកចិត្តទុក្ខដាក់ថែទាំសុខភាពពលរដ្ឋ ដែលលោកថា បន្តចែកចាយថ្នាំពេទ្យជូនពលរដ្ឋផងដែរ។