អគ្គស្នងការនគរបាលជាតិបានឲ្យដឹងថា សមត្ថកិច្ចបានឃាត់ខ្លួនមនុស្សជាង ៥ ០០០នាក់ពាក់ព័ន្ធនឹងគ្រឿងញៀន ដែលចំនួនជិត១០០នាក់ជាជនបរទេស។
ក្នុងកិច្ចប្រជុំបូកសរុបការងារប្រយុទ្ធប្រឆាំងបទល្មើសគ្រឿងញៀននៅថ្ងៃសុក្រនេះ ប្រធានមន្ទីរប្រឆាំងគ្រឿងញៀន លោក ខៀវ សាម៉ន បានឲ្យដឹងថាក្នុងរយៈពេល៩ខែដើមឆ្នាំ២០១៦នេះ សមត្ថកិច្ចបានឃាត់ខ្លួនមនុស្សបានចំនួន៥០៥៧នាក់ ស្រី៤៧៦នាក់ ដែលមានជនបរទេស៩៩នាក់ ក្នុងនោះ៦០នាក់ជាជនជាតិវៀតណាម និងរឹបអូសបានគ្រឿងញៀនសរុបទម្ងន់៦៥,៥គីឡូក្រាម។
អគ្គស្នងការនគរបាលជាតិ លោក នេត សាវឿន បានថ្លែងក្នុងពីធីនេះ ដោយជំរុញឲ្យសមត្ថកិច្ចធ្វើការតាមដានករណីនេះនៅពន្ធនាគារទៅលើទណ្ឌិត ដើម្បីស្រាវជ្រាវរកអ្នកពាក់ព័ន្ធបន្ថែម។
តាមរបាយការណ៍៦ខែដើមឆ្នាំ២០១៥ អជ្ញាធរជាតិប្រយុទ្ធប្រឆាំងគ្រឿងញៀនបានឃាត់ខ្លួនជនសង្ស័យសរុប៣២៦១នាក់ ដែលមានជនសង្ស័យពាក់ព័ន្ធនឹងគ្រឿងញៀន៨នាក់ជានគរបាល ៣នាក់ជាមន្ត្រីពន្ធនាគារ ១នាក់ជាអង្គរក្ស និងអ្នកកាសែត២នាក់៕
