ក្រសួងមហាផ្ទៃអះអាងថា ខ្លួនត្រូវការពេលបន្ថែមទៀត ដើម្បីចុះស៊ើបអង្កេត មុនសម្រេចឲ្យ គ.ជ.ប លុបឈ្មោះ ជនណាម្នាក់ចេញពីបញ្ជីបោះឆ្នោត ដែលបក្សប្រឆាំងចោទថាជាជនជាតិវៀតណាមកាន់ឯកសារមិនស្របច្បាប់ ដើម្បីបានបោះឆ្នោតជ្រើសរើសមេដឹកនាំជំនួសខ្មែរនោះ។
មន្ត្រីគណបក្សសង្គ្រោះជាតិឲ្យVODដឹងថា គិតត្រឹមថ្ងៃទី២០ ខែមករា គណបក្សនេះបានប្តឹងជំទាស់ទៅ គ.ជ.ប ឲ្យលុបឈ្មោះជនបរទេស ដែលគេសង្ស័យថាជាវៀតណាម ចំនួនជាង២ពាន់នាក់(២១៧៣) ចេញពីបញ្ជីបោះឆ្នោតវិញ ដោយថាអ្នកទាំងនោះបានកាន់អត្តសញ្ញាណប័ណ្ណសញ្ជាតិខ្មែរ មិនបានបំពេញលក្ខខណ្ឌតាមច្បាប់ស្តីពីការចូលសញ្ជាតិខ្មែរ។
ប៉ុន្តែលិខិតចុះថ្ងៃទី២១ ខែមករា ក្រសួងមហាផ្ទៃប្រាប់ទៅ គ.ជ.ប ថាមនុស្ស១៧៩នាក់ដែល គ.ជ.ប ស្នើសុំបញ្ជាក់ពីភាពត្រឹមត្រូវឬមិនត្រឹមត្រូវនៃការចូលសញ្ជាតិនោះ ក្រសួងបញ្ជាក់ថា១៥២នាក់ ពួកគេមានអត្តសញ្ញាណប័ណ្ណគំរូថ្មីត្រឹមត្រូវ មានទិន្ន័យរក្សាទុកក្នុងម៉ាស៊ីនមេក្នុងនាយកដ្ឋានអត្តសញ្ញាណប័ណ្ណសញ្ជាតិខ្មែរ។
ចំណែក២៧នាក់ផ្សេងទៀត ក្រសួងមហាផ្ទៃបញ្ជាក់ថា ខ្លះមានអត្តសញ្ញាណប័ណ្ណគំរូចាស់ និងខ្លះទៀតប្រើប្រាស់លិខិតបញ្ជាក់អត្តសញ្ញាណ ដែលក្រសួងថាពុំមានប្រព័ន្ធព័ត៌មានវិទ្យាសម្រាប់គ្រប់គ្រង។
ក្រសួងអះអាងទៀតថា អ្នកទាំង២៧នាក់នេះ ក្រសួងត្រូវការពេលពេលវេលាសមរម្យមួយដើម្បីបានចុះទៅស្រាវជ្រាវដល់មូលដ្ឋានជាមុនសិន ទើបអាចបញ្ជាក់ថាពួកគេបានចូលសញ្ជាតិត្រឹមត្រូវឬក៏អត់។
កន្លងទៅមជ្ឈដ្ឋានមួយចំនួនដាក់ការព្រួយបារម្ភថា ការលុបឈ្មោះជនបរទេសដែលមិនស្រប់ច្បាប់ចេញពីបញ្ជីបោះឆ្នោត គ.ជ.ប អាចនឹងបរាជ័យ បើគ្មានឯកសារផ្លូវការពីក្រសួងមហាផ្ទៃអំពីចំនួនជនបរទេសដែលបានចូលសញ្ជាតិត្រឹមត្រូវ សម្រាប់ផ្ទៀងផ្ទាត់ទៅនឹងអ្នកដែលបានជាប់បណ្តឹងពីគណបក្សនយោបាយដែលបានប្តឹងជំទាស់នោះ។
អ្នកនាំពាក្យក្រសួងមហាផ្ទៃលោក ខៀវ សុភ័គ អះអាងថា ក្រសួងអាចឲ្យទិន្ន័យអ្នកចូលសញ្ជាតិទៅ គ.ជ.ប ដើម្បីផ្ទៀងផ្ទាត់បាន បើមានលិខិតស្នើសុំជាផ្លូវការពី គ.ជ.ប។
លោកថា៖ «អត់មានអីពីបាកទេ បើ គ.ជ.ប ចង់សុំធ្វើលិខិតសុំមក មានពិបាកអី? ប៉ុន្តែឥឡូវនេះ គ.ជ.ប គាត់សុំ សុំតែឈ្មោះដែលគេប្តឹង ដែលជាប់បណ្តឹងប៉ុន្មានរយនាក់នោះ។ ហើយយើងៗមើលឃើញថា អ្នកខ្លះជាខ្មែរពិតប្រាកដ អ្នកខ្លះវាមិនពិតប្រាកដ ខ្លះត្រូវយើងទៅជួបផ្ទាល់»។
លោក ខៀវ សុភ័គ អះអាងទៀតថា មកដល់ពេលនេះ លោកមិនចាំថាមានជនបរទេសសរុបប៉ុន្មាននាក់ដែលបានចូលសញ្ជាតិតាមលក្ខខណ្ឌច្បាប់ស្ថិតក្នុងដៃក្រសួងមហាផ្ទៃពិតប្រាកដទេ ដោយជំរុញឲ្យទាក់ទងទៅអគ្គនាយកដ្ឋានអន្តោប្រវេសន៍។
ប៉ុន្តែលោកបញ្ជាក់ដូចនេះ៖ «រហូតមកដល់ពេលនេះ ការចូលសញ្ជាតិហ្នឹងហាក់ដូចជាមានការកើនឡើងច្រើន ។ ហើយឃើញនយោបាយ ការអភិវឌ្ឍ ការរីកចម្រើន ហើយអ្នកដែលសុំចូលសញ្ជាតិហ្នឹងជាប្រចាំខែ យ៉ាងតិចណាស់ក៏មាន២០នាក់ដែរក្នុង១ខែ»។
អ្នកនាំពាក្យ គ.ជ.ប លោក ហង្ស ពុទ្ធា ស្ទាក់ស្ទើរក្នុងការបញ្ជាក់ថា តើកន្លងទៅ គ.ជ.ប ធ្លាប់ដាក់លិខិតផ្លូវការ ស្នើទៅក្រសួងមហាផ្ទៃសុំឲ្យបង្ហាញឈ្មោះអ្នកដែលបានចូលសញ្ជាតិតាមលក្ខខណ្ឌច្បាប់ សម្រាប់ផ្ទៀងផ្ទាត់ នៅពេលដោះស្រាយបណ្តឹងជំទាស់របស់គណបក្សនយោបាយឬក៏យ៉ាងណានោះទេ។
លោកថា៖ «ចូលសញ្ជាតិហ្នឹង ខ្ញុំអត់ច្បាស់ទេណា ចាំសួទៅខាងនេះសិន។ ប៉ុន្តែជាស្មារតី យើងបានសម្រេចថា ឲ្យខាងអគ្គលេខាធិការដ្ឋានសុំទៅ។ ប៉ុន្តែខ្ញុំអត់ច្បាស់ថាសុំទៅឬអត់។ ចាំខ្ញុំឆែកសិន»។
ប្រធាននាយកដ្ឋានកិច្ចការបោះឆ្នោតនិងនីតិកម្មនៃគណបក្សសង្គ្រោះជាតិ លោក ស្រី ម៉េង សុភារី មានប្រសាសន៍ថា លោកស្រីចង់ឲ្យក្រសួងមហាផ្ទៃស៊ើបអង្កេតដោយតម្លាភាពទៅលើចុងចម្លើយ ដែលខ្លួនបានដាក់ពាក្យប្តឹងសុំឲ្យលុបឈ្មោះចេញពីបញ្ជីបោះឆ្នោត។
ប៉ុន្តែលោកស្រីថា គិតត្រឹមថ្ងៃទី២៣នេះ មិនទាន់ដឹងថាបណ្តឹងជំទាស់របស់គណបក្សសង្គ្រោះជាតិនោះត្រូវ គ.ជ.ប សម្រេចលុបឈ្មោះជនបរទេសចេញពីបញ្ជីឈ្មោះបោះឆ្នោតវិញប៉ុន្មាននាក់ទេ ដោយថាមួយរយៈនេះ គ.ជ.ប ដោះស្រាយបណ្តឹងតាមសវនាការសង្ខេប ដោយមិនបានអញ្ជើញគូភាគីចូលជជែកទល់មុខគ្នាដូចពេលមុនៗ។ ប៉ុន្តែសវនាការសាធារណៈ៣ថ្ងៃដំបូង លោកស្រីថាបណ្តឹងសុំលុបឈ្មោះជនជាតិវៀតណាមភាគច្រើនត្រូវបានច្រានចោល។
លោកស្រីថា៖ «ខ្ញុំយល់ថា បើទោះបីជាហូសពេលនៃការបោះឆ្នោតក្រុមប្រឹក្សាឃុំសង្កាត់នេះក៏ដោយ។ ក៏ប៉ុន្តែឲ្យតែមានការស្រាវជ្រាវឲ្យបានល្អិតល្អន់ របាយការណ៍ជាវិជ្ជមានណាមួយដែលបង្ហាញថា អ្នកនោះឯងពិតជាមិនទាន់បានចូលសញ្ជាតិខ្មែរស្របតាមច្បាប់ស្តីពីសញ្ជាតិទេ នោះគាត់ពិតជាមិនត្រូវបានបោះឆ្នោតនៅអាណត្តិក្រោយៗទៀតបានទេ»។
តាមប្រតិទិន គ.ជ.ប នឹងបិទបញ្ជាប់ការដោះស្រាយបណ្តឹងរបស់គណបក្សនយោបាយនៅថ្ងៃទី២៧សប្តាហ៍នេះ ដើម្បីទុកពេលឲ្យភាគីពាក់ព័ន្ធប្តឹងទៅក្រុមប្រឹក្សាធម្មនុញ្ញ។ ចំណែកក្រុមប្រឹក្សាធម្មនុញ្ញមានរយៈពេល១០ថ្ងៃសម្រាប់ដោះស្រាយបណ្តឹងសារទុក្ខ។ លុះដល់ថ្ងៃទី១២ខែកុម្ភៈ គ.ជ.ប នឹងផ្តល់សុពលភាពបញ្ជីបោះឆ្នោតថ្មី។
សមាជិកសម្ព័ន្ធកំណែទម្រង់ការបោះឆ្នោតឆ្នោត លោក យង់ គិមអេង លើកឡើងថា គ.ជ.ប គួរតែសហការជាមួយក្រសួងមហាផ្ទៃលាងជម្រះមន្ទិលសង្ស័យពីបញ្ហាវត្តមានជនបរទេសមិនស្របច្បាប់ទៅបោះឆ្នោតជ្រើសរើសមេដឹកនាំជំនួសខ្មែរពីពេលនេះ ដើម្បីផ្តល់ជំនឿដល់មហាជនទូទៅ ជាងជាងគេចយករួចខ្លួន ហើយទុកបញ្ហានេះឲ្យនៅបន្តកើតមានក្នុងសង្គមខ្មែរ៕
