បន្ទាប់ពីលោក ហ៊ុន សែន ព្រមានរឹបអូសទ្រព្យសម្បត្តិរបស់មេដឹកនាំគណបក្សប្រឆាំងដែលកំពុងជាប់បណ្តឹងទារសំណង១លានដុល្លារនោះ លោក សម រង្ស៊ី បានឆ្លើយតបថាបក្សកាន់អំណាចកំពុងតែភ័យពីការចាញ់ឆ្នោតនៅពេលខាងមុខ។
នៅប៉ុន្មានម៉ោងក្រោយពីការថ្លែងរបស់លោកនាយករដ្ឋមន្រ្តី ហ៊ុន សែន មេដឹកនាំគណបក្សសង្រ្គោះជាតិ លោក សម រង្ស៊ី ដែលកំពុងនៅក្រៅប្រទេស បានសរសេរលើហ្វេសប៊ុកលោកថា៖ «ការគំរាមកំហែងទាំងនេះ បង្ហាញពីភាពស្លន់ស្លោរបស់លោក ហ៊ុន សែន នៅពេលដែលការបោះឆ្នោតឃុំ-សង្កាត់ ក្នុងខែមិថុនា ឆ្នាំ២០១៧ និងការបោះឆ្នោតរដ្ឋសភា ក្នុងខែកក្កដា ឆ្នាំ២០១៨ កាន់តែឈានចូលមកជិត»។
លោក សម រង្ស៊ី បន្តថា លោក ហ៊ុន សែន បានយល់ច្បាស់ថា បក្សកាន់អំណាច «មិនអាចរារាំងឆន្ទៈប្រជារាស្ត្រខ្មែរ ដែលចង់ឲ្យមានការផ្លាស់ប្តូរ គាត់បែរជាមករករឿងកាន់តែសាហាវឡើង មកលើរូបខ្ញុំ ពីព្រោះខ្ញុំជានិមិត្តរូបនៃការតស៊ូប្រឆាំងអំណាចផ្តាច់ការ និងពុករលួយ របស់គាត់ និងក្រុមគ្រួសារគាត់»។
បើតាមលោក សម រង្ស៊ី «ការគំរាមកំហែងរបស់លោក ហ៊ុន សែន នេះ មិនមានប្រសិទ្ធភាពទេ ហើយនឹងនាំមកនូវបរាជ័យកាន់តែឆាប់ឡើង ចំពោះគណបក្សកាន់អំណាចសព្វថ្ងៃ ដែលកំពុងតែជ្រួលច្របល់ពីការចាញ់ឆ្នោតខាងមុខ»។
កាលពីម្សិលមិញ លោកនាយករដ្ឋមន្រ្តី ហ៊ុន សែន បានព្រមានថា នឹងរឹបអូសទ្រព្យសម្បត្តិរបស់មេដឹកនាំគណបក្សប្រឆាំងរួមទាំងទីស្នាក់ការបក្សផង បន្ទាប់ពីលោកបានប្តឹងទាមទារសំណងជម្ងឺចិត្តពី លោក សម រង្ស៊ី ចំនួន១លានដុល្លារក្នុងសំណុំរឿងបរិហាកេរ្តិ៍។
កាលពីចុងឆ្នាំ២០១៦ សារឆ្លងឆ្លើយដែលគេជឿថាជាសាររបស់លោក ហ៊ុន សែន និង ធី សុវណ្ណថា ត្រូវបានគេផ្សព្វផ្សាយដោយក្នុងការសន្ទនានោះ ភាគីទាំងពីរបានប្រើពាក្យថា “តានិងចៅ” ដែលបាននិយាយពីរឿងផ្ទាល់ខ្លួនមួយចំនួន ប៉ុន្តែភាគច្រើនផ្តោតសំខាន់លើយុទ្ធសាស្ត្របំបែកបំបាក់គណបក្សប្រឆាំង។
កិច្ចសន្ទនានោះក៏បាននិយាយផងដែរ ពីការផ្តល់លុយខ្ទង់មួយ១លានដុល្លារដល់ ធី សុវណ្ណថា ដើម្បីបំបែកបំបាក់មេដឹកនាំគណបក្សសង្រ្គោះជាតិ។ ប៉ុន្តែកាលពីពាក់កណ្តាលខែមករាឆ្នាំ២០១៧នេះ លោក ហ៊ុន សែន បានប្តឹងលោក សម រង្ស៊ី ដោយទារសំណងជំងឺចិត្តចំនួន១លានដុល្លារ ខណៈកញ្ញា ធី សុវណ្ណថា ក៏បានប្តឹងមេបក្សប្រឆាំងរូបនេះ ដោយទារជំងឺចិត្ត២៥ម៉ឺនដុល្លារ ទាក់ទងនឹងការលើកឡើងថា «លោក ហ៊ុន សែន សូកលុយ១លានដុល្លារដល់កញ្ញា ធី សុវណ្ណថា ឲ្យបំបែកគណបក្សសង្រ្គោះជាតិ»៕