អគ្គរដ្ឋទូតកម្ពុជាប្រចាំប្រទេសបារាំង ទាមទារឲ្យអ្នកនយោបាយបារាំងមួយរូប សុំទោសប្រជាជនខ្មែរ ជុំវិញសម្ដីមើលងាយរបស់អ្នកនយោបាយបារាំងរូបនោះ។
អភិបាលក្រុង Chantilly លោក Eric Woerth ត្រូវបានគេដងស្រង់សម្ដីក្នុងកិច្ចសម្ភាសមួយ កាលពីថ្ងៃទី១០ ខែឧសភានេះ។ ក្នុងកិច្ចសម្ភាសនោះ លោកបានលើកឡើងថា ប្រធានាធិបតីជាប់ឆ្នោតថ្មីរបស់បារាំង លោក អេម៉ានុយអ៊ែល ម៉ាក្រុន មានឥរិយាបថដូច “ខ្មែរ”។
ទីភ្នាក់ងារព័ត៌មានកម្ពុជា AKP បានចុះផ្សាយថា មួយថ្ងៃក្រោយពីអ្នកនយោបាយបារាំងថ្លែងដូច្នេះ អគ្គរដ្ឋទូតខ្មែរប្រចាំទីក្រុងប៉ារីស លោក ចែម វិឌ្យា បានផ្ញើលិខិតទៅលោក Eric Woerth ដោយបានទាមទារឲ្យមានការសុំទោសប្រជាជនខ្មែរ។
បើតាម AKP លោក Eric Woerth បានរៀបរាប់នៅលើបណ្ដាញសង្គម នូវការសោកស្ដាយ និងការសុំទោសរបស់លោក៕