អតីតមេដឹកនាំបក្សសង្គ្រោះជាតិ លោក សម រង្ស៊ី ដែលនិរទ្ទេសខ្លួននៅឯក្រៅប្រទេសនោះ បានអំពាវនាវទៅដល់សមាជិកក្រុមប្រឹក្សាឃុំសង្កាត់របស់បក្សប្រឆាំង កុំឲ្យចាញ់បោកការសន្យារបស់មេដឹកនាំបក្សកាន់អំណាច ដែលធានារក្សាតំណែង បើចុះចូលមុនបក្សប្រឆាំងរលាយនោះ។
អតីតមេដឹកនាំបក្សប្រឆាំងរូបនេះ បានអំពាវតាមរយៈទំព័រហ្វេសប៊ុករបស់លោក កុំឲ្យតំណាងរាស្រ្ត និង ក្រុមប្រឹក្សាឃុំសង្កាត់របស់ CNRP ចុះចូលជាមួយនឹងគណបក្សកាន់អំណាច ដែលលោកថា នោះគ្រាន់តែជាការបោកប្រាស់តែប៉ុណ្ណោះ។
លោក សម រង្ស៊ី លើកឡើងថា៖ «ម្សិលមិញ ហ៊ុន សែន ប្រកាសឲ្យសមាជិកក្រុមប្រឹក្សាឃុំសង្កាត់ចុះចូលគាត់ ប៉ុន្តែយើងអំពាវនាវថា មិនត្រូវចុះចូលទេ វាគ្មានន័យ វាបាត់តម្លៃ ហើយបើយើងពន្យល់គ្នាយើងឲ្យច្បាស់ ហ៊ុន សែន ថា គេរំលាយគណបក្ស ភរសុទ្ធហ្មងបងប្អូន។ ខ្ញុំសូមបញ្ជាក់អត់មានរំលាយទេ ទៅអត់រួចទេ ចឹងអ្វីដែលគេអូសទាញយើងគឺភរសុទ្ធ»។
ជាមួយគ្នានោះដែរលោក សម រង្ស៊ី ក៏បញ្ជាក់ដែរថា គណបក្សសង្រ្គោះជាតិ នឹងមិនត្រូវរំលាយនោះទេ ហើយបើសមាជិកណាទៅចុះចូលជាមួយគណបក្សកាន់អំណាច នោះអាចនឹងខូចប្រយោជន៍ផ្ទាល់ខ្លួន ដោយលោកថា ជាការលក់ឧត្តមគតិ បាត់បង់កិត្តិយស និងបាត់តួនាទីទាំងនៅគណបក្សសង្គ្រោះជាតិ និងមិនបានដំណែងតាមការសន្យារបស់លោក ហ៊ុន សែន នោះឡើយ។
កាលពីម្សិលមិញលោកនាយករដ្ឋមន្រ្តី ហ៊ុន សែន បានថ្លែងអំពាវនាវឲ្យតំណាងរាស្ត្រ និងក្រុមប្រឹក្សាឃុំសង្កាត់មកពីគណបក្សសង្គ្រោះជាតិចុះចូលជាមួយរដ្ឋាភិបាលមុនបក្សប្រឆាំងត្រូវបានរំលាយ ដែលលោកថា នឹងរក្សាមុខតំណែងរៀងខ្លួន ដើម្បីបម្រើពលរដ្ឋ៕
