ចៅក្រមស៊ើបសួរសាលាដំបូងរាជធានីភ្នំពេញ នឹងបើកសវនាការពាក់ព័ន្ធនីតិវិធីពន្យារពេលឃុំខ្លួនលោក កឹម សុខានៅពន្ធនាគារត្រពាំងផ្លុង នៅថ្ងៃទី៣០ខែសីហា។
តាមលិខិតមួយច្បាប់របស់ចៅក្រម គី ឫទ្ធី អញ្ញើញមេធាវីរបស់លោក កឹម សុខា គឺលោក ផែង ហេង ឲ្យចូលរួមសវនាការនៅវេលាម៉ោង៩ព្រឹក នៅបន្ទប់មួយក្នុងពន្ធនាគារត្រពាំងផ្លុង ឬ ហៅថា មណ្ឌលអប់រំកែប្រែទី៣ ដើម្បីដំណើរការនីតិវិធី។
ការបើកសវនាការនេះ ដើម្បីពិនិត្យថា តើលោក កឹម សុខា ត្រូវពន្យារពេលឃុំខ្លួនបន្តទៀត ឬ ឲ្យនៅក្រៅឃុំ បន្ទាប់ពីឃុំខ្លួនអស់១២ខែ។
ចាប់តាំងពីលោក កឹម សុខា ជាប់ឃុំនៅពន្ធនាគារត្រពាំងផ្លុងកាលពីខែកញ្ញាឆ្នាំមុនមក ចៅក្រមស៊ើបសួរបានទៅជួបលោក កឹម សុខា ចំនួន៣លើករួចមកហើយ។