ក្រុមអ្នកការពារសិទ្ធិមនុស្សបានបង្ហាញការព្រួយបារម្ភថា អ្នកស្វែងរកសិទ្ធិជ្រកកោនជាង១៦០នាក់ ភាគច្រើនជាជនជាតិភាគតិចដែលកំពុងជាប់ឃុំនៅថៃ កំពុងតែប្រឈមមុខការបញ្ជូនត្រឡប់ទៅកាន់ប្រទេសកំណើតវិញរួមមានវៀតណាមនិងកម្ពុជា។
សមាគមមេធាវីការពារសិទ្ធិមនុស្សនៅក្នុងប្រទេសថៃ បានធ្វើសេចក្តីប្រកាសមួយកាលពីថ្ងៃព្រហស្បតិ៍ម្សិលមិញថា កាលពីដើមសប្តាហ៍នេះអាជ្ញាធរថៃបានដឹកជញ្ជូនអ្នកស្វែងរកសិទ្ធិជ្រកកោនដែលរងការចោទប្រកាន់ទាំងអស់ប្រមូលផ្តុំនៅភាគខាងជើងនៃទីក្រុងបាងកក។ នេះបើតាមសារព័ត៌មាន The Star។
អ្នកស្វែងរកសិទ្ធិជ្រកកោនទាំងនោះភាគច្រើនជាជនជាតិភាគតិច ហើយប្រឈមនឹងការកាត់ទោសផ្សេងៗពេលបញ្ជូនទៅប្រទេសកំណើតវិញ។ ក្នុងចំណោមអ្នកទាំងនោះក៏មានអ្នកដែលទទួលបានប័ណ្ណសម្គាល់ខ្លួនជាជនស្វែងរកសិទ្ធិជ្រកកោនពីអង្គការសហប្រជាជាតិដែរ។
ក្នុងចំណោមអ្នកស្វែងរកសិទ្ធិជ្រកកោនទាំងជាង១៦០នាក់នោះ មាន៣៨នាក់ដែលបញ្ជូនមកកម្ពុជាវិញដោយផ្ទាល់តាមកិច្ចព្រមព្រៀងរបស់ប្រទេសទាំងពីរ ប៉ុន្តែសម្រាប់ការបញ្ជូនទៅវៀតណាមមិនមានកិច្ចព្រមព្រៀងទេ ទើបអាជ្ញាធរថៃកំពុងស្វែងរកនីតិវិធី។