ក្រុមសហជីពបានប្រជុំសម្រេចលើសំណើប្រាក់ឈ្នួលអប្បរមារបស់កម្មករក្នុងវិស័យកាត់ដេរចំនួនប្រហែលជាង ២០០ដុល្លារ ដើម្បីចរចារដំឡើងឲ្យកម្មករសម្រាប់ឆ្នាំ២០១៩ខាងមុខ។
ប្រាប់VODតាមទូរសព្ទបន្ទាប់ពីបញ្ចប់ការប្រជុំជាមួយសហជីពជាង ៣០នៅថ្ងៃនេះ ប្រធានសហភាពការងារម្ពុជា លោក អាត់ ធន់ ឲ្យដឹងថា ក្រុមសហជីពបានសម្រេចយកប្រាក់ឈ្នួលអប្បរមាចំនួន ២១១,៩៤ដុល្លារ ដើម្បីដាក់ស្នើក្នុងកិច្ចប្រជុំត្រីភាគីដែលមានសហជីព សមាគមរោងចក្រកាត់ដេរ និងរដ្ឋាភិបាលនៅថ្ងៃ១០កញ្ញាខាងមុខនេះ។
លោក អាត់ ធន់ ពន្យល់ថា មូលហេតុដែលសហជីពសម្រេចជ្រើសរើសតួលេខនេះ គឺយោងទៅលើតម្រូវការរស់នៅដោយគិតទៅលើការបូកបញ្ចូលប្រាក់ឈ្នួលបច្ចុប្បន្ន សោហ៊ុយធ្វើដំណើរ ប្រាក់រង្វាន់ អតិផរណា កំណើនលទ្ធភាព និងកម្រិតចំណេញក្នុងវិស័យកាត់ដេរ។
លោក អាត់ ធន់ សង្ឃឹមថា ការចរចារទាមទារដំឡើងប្រាក់ឈ្នួលគោលកម្មករកើនឡើង ដោយថា រដ្ឋាភិបាលបានសន្យាជាមួយកម្មករ និងថា អន្តរជាតិកំពុងឃ្លាំមើលការវិវត្តបញ្ហានេះដែរ។
ប្រាក់ឈ្នួលគោលរបស់ក្រុមកម្មករក្នុងវិស័យកាត់ដេរ ត្រូវបានសម្រេចដំឡើងដល់ចំនួន ១៧០ដុល្លារក្នុងមួយខែ សម្រាប់ឆ្នាំ២០១៨នេះ៕
