អ្នករាយការណ៍ពិសេសអង្គការអង្គការសហប្រជាជាតិទទួលបន្ទុកកិច្ចការសិទ្ធិមនុស្សប្រចាំកម្ពុជា លោកស្រី រ៉ូណា ស្មីត នឹងបង្ហាញរបាយការណ៍របស់លោកស្រី នៅចំពោះមុខក្រុមប្រឹក្សាសិទ្ធិមនុស្សរបស់អង្គការពិភពលោកមួយនេះ នៅសប្ដាហ៍ក្រោយនេះ។ នេះបើតាមឧត្តមស្នងការទទួលបន្ទុកសិទ្ធិមនុស្សប្រចាំកម្ពុជា។
ការិយាល័យឧត្តមស្នងការទទួលបន្ទុកសិទ្ធិមនុស្សប្រចាំកម្ពុជា បានឲ្យដឹងថា នាថ្ងៃទី២៦ ខែកញ្ញា ឆ្នាំ២០១៨ លោកស្រី រ៉ូណា ស្មីត នឹងបង្ហាញទៅក្រុមប្រឹក្សាសិទ្ធិមនុស្សអង្គការសហប្រជាជាតិនូវរបាយការណ៍ប្រចាំឆ្នាំ និងរបាយការណ៍បន្ថែមមួយទៀតរបស់លោកស្រី ដែលនិយាយអំពីបញ្ហាសិទ្ធិមនុស្ស លទ្ធិប្រជាធិបតេយ្យ និងការបោះឆ្នោតនៅកម្ពុជា។
ក្នុងរបាយការណ៍បន្ថែមដែលមានកម្រាស់ ២២ទំព័រនោះ លោកស្រី រ៉ូណា ស្មីត រកឃើញថា ការបោះឆ្នោតជ្រើសតាំងតំណាងរាស្ដ្រនីតិកាលទី៦ កាលពីថ្ងៃទី២៩កក្កដាកន្លងទៅ គឺពោរពេញដោយរឹតត្បិត និងបង្ខិតបង្ខំពលរដ្ឋឲ្យចេញទៅបោះឆ្នោតនៅក្នុងខេត្តមួយចំនួន ការយាយីក្រុមអង្គការសង្គមស៊ីវិល ការគ្រប់គ្រងបណ្ដាញសារព័ត៌មាន និងការរារាំងអតីតគណបក្សប្រឆាំងដ៏ធំមួយមិនឲ្យចូលរួមប្រកួតប្រជែង ដោយថា ការបោះឆ្នោតបែបនេះ គឺគ្មានភាពសេរី ត្រឹមត្រូវ និងយុត្តិធម៌ឡើយ៕
