មន្ត្រីជាន់ខ្ពស់គណបក្ស ហ្វ៊ុន ស៊ិនប៉ិច បានឲ្យដឹងថា ស្ថានភាពព្រះរាជសុខភាពសម្តេចក្រុមព្រះមានភាពរីកចំរើន ហើយគ្រោងនឹងវិលត្រឡប់មកកម្ពុជាវិញ ឆាប់ៗនេះ បន្ទាប់ពីវះយកដែកចេញពីព្រះបាទ(ជើង)។
អ្នកនាំពាក្យគណបក្ស ហ្វ៊ុន ស៊ិនប៉ិច លោក ណុប សុធារិទ្ធិ ប្រាប់វីអូឌីនៅព្រឹកនេះថា សម្តេចក្រុមព្រះ នរោត្តម រណឫទ្ធិ កំពុងបន្តស្នាក់នៅព្យាបាលនៅឯមន្ទីរពេទ្យក្រៅប្រទេស ហើយព្រះរាជសុខភាពមានភាពរីកចំរើនឡើង និងថាព្រះអង្គនឹងវិលត្រឡប់មកកម្ពុជាវិញ ឆាប់ៗនេះ បន្ទាប់ពីគ្រូពេទ្យវះយកដែកចេញពីព្រះបាទ។
អ្នកនាំពាក្យរូបនេះឲ្យដឹងដែរថា ព្រះអង្គទ្រង់ជ្រាបពីមរណភាពរបស់មហេសី អ្នកម្នាង ផល្លា ក្នុងហេតុការណ៍គ្រោះថ្នាក់ចរាចរណ៍លើកចុងក្រោយនេះហើយ។
សម្ដេចក្រុមព្រះនិងអ្នកម្នាង បានជួបប្រទះនឹងគ្រោះថ្នាក់ចរាចរណ៍កម្រិតធ្ងន់ម្ដងរួចមកហើយកាលពីឆ្នាំ២០១៥ អំឡុងពេលធ្វើដំណើរត្រឡប់មកពីជួបអ្នកគាំទ្រគណបក្សរាជានិយមនៅឯខេត្តកំពង់ចាម។
កាលពីថ្ងៃទី ថ្ងៃទី ១៧ ខែមិថុនា ឆ្នាំ២០១៨ នៅក្នុងគ្រោះថ្នាក់ចរាចរណ៍លើកទីពីរបានឆក់យកជីវិតអ្នកម្នាង អ៊ុក ផល្លា នៅពេលដែលទ្រង់ស្ថិតក្នុងដំណើរចុះទៅជួបសំណេះសំណាលជាមួយសមាជិកគណបក្សហ៊្វុនស៊ិនប៉ិចនៅឯខេត្តកំពតនិងបន្តដំណើរទៅខេត្តព្រះសីហនុ។