តំណាងមូលនិធិសហប្រជាជាតិសម្រាប់ប្រជាជនប្រចាំកម្ពុជា UNFPA បានលើកឡើងថាស្ត្រីខ្មែរម្នាក់ក្នុងចំណោម៨នាក់ត្រូវបានក្លាយជាម្ដាយទាំងវ័យក្មេង ដែលបញ្ហានេះបណ្ដាលមកពីកង្វះការយល់ដឹងពីសុខភាពផ្លូវភេទ។
តំណាងមូលនិធិសហប្រជាជាតិសម្រាប់ប្រជាជនUNFPA ប្រចាំកម្ពុជាលោកស្រី រីហ្សាវីណា ឌឺអាល់វីស បានលើកឡើងប្រាប់ក្រុមអ្នកសារព័ត៌មានបន្ទាប់ពីពិធីផ្សព្វផ្សាយរបាយការណ៍ស្ថិតិរបាយប្រជាជនពិភពលោកឆ្នាំ២០១៨ នៅថ្ងៃនេះ ថាស្ត្រីខ្មែរម្នាក់ក្នុងចំណោម៨នាក់បានក្លាយជាម្ដាយទាំងវ័យមិនទាន់គ្រប់ការក្រោម១៨ឆ្នាំ ដោយសារកង្វះចំណេះដឹងផ្នែកផ្លូវសុខភាពផ្លូវភេទ ដែលជាហេតុធ្វើឲ្យប៉ះពាល់ដល់សុខភាព ឱកាសសិក្សា និងកម្លាំងពលកម្មក្នុងសង្គម។
លោកស្រីមានប្រសាសន៍ថា៖ « អ្នកខ្លះមានកូនលើកទីមួយរួចទៅហើយ ហើយអ្នកខ្លះកំពុងតែមានផ្ទៃពោះលើកដំបូងក្នុងវ័យជំទង់ បានន័យថាយុវវ័យ អាយុនៅក្មេង នេះគឺបង្ហាញពីបញ្ហាមួយចំនួនដែលយើងត្រូវយកចិត្តទុកដាក់។ ជួនកាលមកពីគាត់មិនបានទទួលព័ត៌មានគ្រប់ជ្រុងជ្រោយ ដែលអាចធ្វើឲ្យគាត់ធ្វើការសម្រេចចិត្តនៅក្នុងការរួមភេទមួយទៀតមកពីការផ្ដល់សេវារបស់យើងហ្នឹងមិនបាន ផ្ដោតសំខាន់ទៅលើក្មេងវ័យជំទង់ដែលអាចធ្វើឲ្យគាត់គ្មានឱកាសទទួលយកការផ្ដល់សេវាដែលត្រឹមត្រូវ » ។
លោកស្រីក៏បានឲ្យដឹងផងដែរថាបច្ចុប្បន្ននេះUNFP ជាមួយអង្គការពាក់ព័ន្ធបានសហការជាមួយរដ្ឋាភិបាលក្នុងការបញ្ជ្រាបការយល់ដឹងពីសុខភាពផ្លូវភេទនេះទៅកាន់យុវវ័យ ក៏ដូចជាសិស្សឲ្យមានលទ្ធភាពយល់ដឹងបានច្រើនផងដែរ។
រដ្ឋលេខាធិការក្រសួងផែនការ លោក ប៉ូច ប៊ុនណាក់ ថាលោកមិនទាន់បានពិនិត្យទៅលើរបាយការណ៍នេះនៅឡើយទេ តែលោកបានបដិសេធចំពោះអ្វីដែលថាស្ត្រីខ្មែរអាយុក្រោម១៨ឆ្នាំបានក្លាយជាម្ដាយទាំងវ័យក្មេងនោះ។
លោកថា៖ « ព្រោះតាមច្បាប់របស់យើងស្ត្រីក្រោមអាយុ១៨ឆ្នាំអត់មានសិទ្ធិរៀបការទេ! គាត់មិនបានបញ្ជាក់ទេថាវ័យក្មេងនោះកម្រិតអាយុប៉ុន្មាន។ ជាការពិតនិន្នាការស្ត្រីរបស់យើងដែលនៅវ័យក្មេង ជាពិសេសនៅជនបទបន្ទាប់ពីរៀបការហើយភាគច្រើនគាត់មានកូនភ្លាមតែម្ដង។ កន្លែងហ្នឹងជាកន្លែងដែលយើងគួរតែ ពិនិត្យដែលធ្វើយ៉ាងម៉េច ក្នុងចំណោមគ្រួសារដែលរៀបការហើយវ័យក្មេង។ តើគួរតែផ្ដល់ជម្រើសសម្រាប់ពួកគាត់ជ្រើសរើស ក្នុងការពន្យារការមានកូនបន្តិចសិន តែនេះជាជម្រើសរបស់ពួកគាត់ តែយើងគ្រាន់តែពិនិត្យមើលលទ្ធភាពដើម្បីផ្ដល់ជូនគាត់ធ្វើសេចក្ដីសម្រេច » ។
យោងតាមគេហទំព័រ countrymeters.infoប្រជាជនកម្ពុជាមានជាង១៦លាននាក់ក្នុងនោះស្ត្រីមានជាង៥១ភាគរយនៃប្រជាជនសរុប ខណៈចំនួនស្ត្រីអាយុចាប់ពី ១៥ឆ្នាំចុះមានជាង២លាន៥សែននាក់៕
