រដ្ឋាភិបាលកម្ពុជាបានព្រមានថា អាចនឹងដកខ្លួនចេញពីអង្គការអន្តរជាតិគ្រប់ពេល ដោយ លើកហេតុផលថា ដើម្បីការពារផលប្រយោជន៍ជាតិបើសិនជាមានការជ្រៀតជ្រែកពីអង្គការ ទាំងនោះ។
នៅក្នុងសេចក្តីបំភ្លឺរបស់ការិយាល័យអ្នកនាំពាក្យរដ្ឋាភិបាលកម្ពុជាចេញផ្សាយកាលពីម្សិលមិញលើកឡើងពីការខិតខំប្រឹងប្រែងរបស់រដ្ឋាភិបាលក្នុងការអភិវឌ្ឍ លើកស្ទួយប្រជាធិបតេយ្យ និងកិច្ចសន្ទនានយោបាយជាមួយគណបក្សផ្សេងៗទៀត។
ក្នុងលិខិតបំភ្លឺទៅសហភាពអន្តរសភា(IPU)កម្ពុជាបញ្ជាក់ថា នឹងដកខ្លួនចេញពីអង្គការ អន្តរជាតិណាមួយបើសិនជាមានការជ្រៀតជ្រែក។
សេចក្តីបំភ្លឺ៖«កម្ពុជារក្សាសិទ្ធិពេញលេញនិងគ្រប់ពេលវេលា ក្នុងការដកបេក្ខភាពរបស់ខ្លួន ចេញពីអង្គការអន្តរជាតិណាមួយនោះ បើសិនជាមានការឈ្លានពាន ឬជ្រៀតជ្រែកធ្ងន់ធ្ងរ ណា មួយលើដែនអធិបតេយ្យភាពនិងផលប្រយោជន៍របស់កម្ពុជា។»
សហភាពអន្តរសភា IPU ដែលមានសមាជិក១៧៣ប្រទេស កាលពីថ្ងៃទី១៨ខែតុលា បានជំរុញដល់អាជ្ញាធរកម្ពុជាឲ្យដោះលែង លោក កឹម សុខា អតីតប្រធានគណបក្សសង្គ្រោះជាតិ ឲ្យមានសេរីភាពពេញលេញវិញ ដោយថា ការចាប់ខ្លួនអតីតមេដឹកនាំគណបក្សប្រឆាំងរូបនេះមិនមានភស្តុតាងគ្រប់គ្រាន់ទេ។
កាលពីថ្ងៃទី១៩ខែតុលា តំណាងជាន់ខ្ពស់សហភាពអឺរ៉ុប ក៏បានជំរុញឲ្យកម្ពុជាធ្វើយ៉ាណា ឲ្យមានភាពប្រសើរឡើងនៃស្ថានភាពនយោបាយដែលថា បើមិនដូច្នោះទេអាចប្រឈម ការដកប្រព័ន្ធអនុគ្រោះពន្ធ។
សុន្ទរកថា របស់លោកស្រី Federica Mogherini ថ្លែងក្នុងសន្និសីទសារព័ត៌មានកាល ពីថ្ងៃទី ១៩ខែតុលាបានបញ្ជាក់ថា លោកស្រី បានជួបជាមួយភាគីកម្ពុជានិង មីយ៉ាន់ម៉ាដាច់ ដោយឡែកពីគ្នា ជជែកពីការដកប្រព័ន្ធអនុគ្រោះពន្ធ។
សម្រាប់ភាគីកម្ពុជាលោកស្រីបញ្ជាក់ថា បានជួបជាមួយលោកនាយករដ្ឋមន្ត្រីហ៊ុន សែន និងមន្ត្រីរបស់កម្ពុជាផ្សេងទៀត។
លោកស្រី Federica Mogherini៖« ជាមួយកម្ពុជា យើងបានសម្រេច ដំណើរការបណ្តោះ អាសន្នហើយលើការដកប្រពន្ធអនុគ្រោះពន្ធEBA។ ខ្ញុំបានពិភាក្សាជាមួយលោកនាយករដ្ឋ មន្ត្រីហ៊ុន សែន និងក្រុមការងាររបស់លោក។ អ្វីដែលយើងរំពឹងនោះគឺកម្ពុជាអាចចៀសផុត ពីការដកប្រព័ន្ធអនុគ្រោះពន្ធ ត្រូវធ្វើឲ្យមានភាពប្រសើរឡើងលើដំណើរការនយោបាយ តាមបែបប្រជាធិបតេយ្យ។»
លោកស្រីក៏បានលើកឡើងពីក្តីកង្វល់ដោយថា ការរំលាយគណបក្សប្រឆាំងកាលពីខែវិច្ឆិកា ឆ្នាំមុន និងមានការរឹតត្បិតបរិយាកាសប្រជាធិបតេយ្យលើមន្ត្រីអង្គការសង្គមស៊ីវិល និងក្រុមអ្នក នយោបាយប្រឆាំង។
អត្ថបទទាក់ទង៖