ក្រោយពីមានការទន្ទឹងចាំថាការប្រកួតជម្រើសជើងរដូវកាលថ្មី ក្នុងព្រឹត្តិការណ៍ TV5 BOXING KNOCK OUT By K-CEMENT តើនឹងផ្ដល់ឱកាសអោយកីឡាករក្នុងប្រភេទទម្ងន់ធ្ងន់ ឬ ស្រាល ពេលនេះលទ្ធផលត្រូវបានបង្ហាញឡើងហើយ ដោយកីឡាករក្នុងប្រភេទទម្ងន់ស្រាល៥៧គីឡូក្រាម គឺជាអ្នកមានមុខឡើងដណ្ដើមយកពានជើងឯកនិងប្រាក់លាន។
លោក សេង កដិកា អ្នករៀបចំការប្រកួត បានថ្លែងបញ្ជាក់ក្នុងពិធីសន្និសីទកាសែតកាលពីថ្ងៃទី២៧ ខែតុលា ថា ការប្រកួតរដូវកាលនេះ លោកសម្រេចចិត្តជម្រើសយកសមាសភាពស្ថិតក្នុងប្រភេទស្រាលវិញម្ដង ដោយលោកយល់ថាការប្រកួតជម្រើសជើងឯកចេញពីកីឡាករទម្ងន់ស្រាល គឺងាយរកបានកីឡាករថ្មីៗល្អៗ ហើយអាចបណ្ដុះអោយក្លាយជាកីឡាករស្នូលសម្រាប់វិស័យប្រដាល់។
លោកថាការប្រកួតចាប់ទម្ងន់៦០គីឡូឡើង ច្រើនតែត្រូវសម្រាប់កីឡាករដែលមានឈ្មោះកេរ្តិ៍ឈ្មោះបោះសំឡេងរួចហើយ ហើយដំណើរស្វែងរកអ្នកស្ថិតក្នុងប្រភេទទម្ងន់ធ្ងន់បែបហ្នឹងក៏ពិបាករកផងដែរ ដោយសារតែស្ថិតក្នុងប្រភេទទម្ងន់ស្ទើរមាន និង ស្ទើរមិនមាន សម្រាប់ចំនួន៣២កីឡាករ ដែលត្រូវជ្រើសអោយប្រកួត។
ជាក់ស្ដែងវត្តមានកីឡាករកាលពីរដូវកាលមុនៗ ដែលស្ថិតក្នុងប្រភេទទម្ងន់៦៥ និង ៦៣,៥គីឡូក្រាម លោកថាប៉ុស្ដិ៍លេខ៥ ស្វែងរកបាន៣២រូបយ៉ាងលំបាកបំផុត ដោយមានកីឡាករខ្លះ ត្រូវបង្ខំអោយសម្រកទម្ងន់ និងខ្លះអោយតំឡើងទម្ងន់ ដើម្បីអោយគ្រប់៣២រូបនោះ។
លោកអះអាងថា ខ្លួនមិនចង់បានសមាសភាពដែលខ្វះតុល្យភាពបែបហ្នឹងនោះទេ ទើបសម្រេចចិត្តបើកការប្រកួតក្នុងប្រភេទទម្ងន់៥៧គីឡូក្រាមនៅក្នុងរដូវកាលនេះ ដែលលោកបញ្ជាក់ថា នេះប្រភេទទម្ងន់សំបូរដោយសមាសភាពកីឡាករថ្មីៗក្មេងៗ ថ្វីដ្បិតថា មិនមែនជាកីឡាករដែលមានបទពិសោធន៍ក្រាស់ក្រែល។
លោកនិយាយថា៖ «យើងចំណាយលុយជ្រើសរើសជើងឯក ចឹងអត់ចង់យកកីឡាករ ដែលមានឈ្មោះ ហើយមកប្រកួតដណ្ដើមពានទេ អ៊ីចឹងហើយទើបយើងសម្រេចចិត្តធ្វើការប្រកួតក្នុងប្រភេទទម្ងន់៥៤ ឬ ៥៧ អីអ៊ីចឹងវិញ ទើបដូចជួយបណ្ដុះពួកក្មេងៗអស់ នឹងអោយគ្នាមានមុខនៅក្នុងវិស័យកីឡាផង»។
យ៉ាងណាមិញ លោកថាកីឡាករទាំងអស់មិនបានបង្ហាញខ្លួនទាំង៣២រូបក្នុងថ្ងៃប្រកាសវគ្គថ្មីនោះទេ ដោយមានតែចំនួនប៉ុន្មានរូបប៉ុណ្ណោះ ធ្វើការបង្ហាញខ្លួន។ ក្នុងនោះក្នុងចំណោមកីឡាករថ្មីៗ ក៏មានកីឡាករដែលមានកេរ្តិ៍ឈ្មោះបោះសំឡេងមួយចំនួននក្នុងវិស័យប្រដាល់ស្រាប់ចូលប្រកួតផងដែរ ដោយគ្រាន់តែលោករំពឹងថា សមាសភាពកីឡាករថ្មីៗគឺជាទិសដៅដែលប៉ុស្ដិ៍លេខ៥គិតថា ប្រឹងប្រកួតល្អជាង បើធៀបនឹងកីឡាករចាសៗ។
លោកឧត្តមសេនីយ៍ទោ សិន សុផាត តំណាងស្ថានីយទូរទស្សន៍ប៉ុស្ដិ៍លេខ៥ បានថ្លែងបញ្ជាក់ថា សម្រាប់រដូវកាលទី៤នេះ សមាសភាពកីឡាករថ្មីៗ ក្រុមការងារប៉ុស្ដិ៍លេខ៥ និងសហព័ន្ធប្រដាល់ បានជម្រើសចេញពីបណ្ដាក្លិបនៅទូទាំងប្រទេសតែម្ដង ដោយក្នុងចំណោមកីឡាករដែលជម្រើសបានទាំង៣២រូប គឺភាគច្រើនជាសមាសភាពកីឡាករជើងថ្មី។
យ៉ាងណាមិញ លោកថា កីឡាករជើងចាស់មិនអាចមើលស្រាលកីឡាករថ្មីៗនោះទេ ដោយសារតែការបប្រកួតកាលពីរដូវកាលមុន កីឡាករជើងថ្មី លាភ រដ្ឋា និង លន បញ្ញា ដែលជាកីឡាករថ្មីៗ សុទ្ធតែបានគ្រងតំណែងលេខ១ និងលេខ២ ខណៈដែលកីឡាករចាស់ៗ ត្រូវគេទម្លាក់ចេញអោយហាលអាវគ្មានសល់៕