ក្រសួងឧស្សាហកម្ម និងសិប្បកម្ម បើកវគ្គបណ្ដុះបណ្ដាលដល់មន្ត្រីថ្នាក់ក្រោមជាតិ និងម្ចាស់សិប្បកម្មនៅខេត្តក្រចេះ អំពីបច្ចេកទេសក្នុងការផលិតស្រា «ស» អង្ករ និងគ្រឿងបរិភោគផ្សេងទៀត ឲ្យមានស្តង់ដារ ដើម្បីការពារកុំឲ្យមានផលប៉ះពាល់ដល់សុខភាពអ្នកទទួលទាន។
អ្នកនាំពាក្យក្រសួងសិប្បកម្ម និងឧស្សាហកម្ម លោក អ៊ំ សុផា មានប្រសាសន៍ថា ដើមចមដែលនាំឲ្យក្រសួងបើកវគ្គបណ្ដុះបណ្ដាលដល់ម្ចាស់សិប្បកម្ម និងមន្ត្រីភូមិ ឃុំ ស្រុក ខេត្តក្រចេះ រួមទាំងមន្ត្រីមកពីនាយកដ្ឋានស្តង់ដារកម្ពុជា ស្ដីពីបទដ្ឋានបច្ចេកទេសក្នុងការផលិតស្រា«ស»អង្ករ និងគ្រឿងបរិភោគផ្សេងទៀតដូចជា ទឹកត្រី និងទឹកស៊ីអ៊ីវជាដើម ឲ្យមានស្តង់ដារ ដោយសារមានករណីពុលស្រា«ស»ស្លាប់មនុស្សនៅខេត្តក្រចេះនាពេលថ្មីៗនេះ។
លោក សុផា បន្តថា វគ្គបណ្តុះបណ្តាលនេះនឹងជួយឲ្យម្ចាស់សិប្បកម្មនិងមន្ត្រីពាក់ព័ន្ធទាំងអស់យល់ដឹងអំពីអត្ថប្រយោជន៍ការបិទស្លាកលើផលិតផលឲ្យបានត្រឹមត្រូវ ដើម្បីការពារកុំឲ្យប៉ះពាល់សុខភាពអ្នកទទួលទាន។
លោកមានប្រសាសន៍ថា៖ «យើងជួយលើកកម្ពស់ការការពារមិនមែនត្រឹមតែប្រជាពលរដ្ឋទេ សមត្ថកិច្ចនៅតាមអង្គភាពមូលដ្ឋាន អាជ្ញាធរ គាត់មិនទាន់យល់អស់ច្បាប់ស្តង់ដារកម្ពុជា។ យើងពន្យល់គាត់ ទំនិញបែបណា ដែលអនុលោមតាមស្តង់ដារ ទំនិញបែបណាដែលយើងសង្ស័យថាទំនិញមិនស្របច្បាប់ ដូចជាទំនិញមិនមានអាសយដ្ឋាន មិនមានបិទស្លាកសញ្ញាត្រឹមត្រូវឲ្យប្រជាពលរដ្ឋយល់ យើងរួមគ្នាងាកចេញពីការប្រើប្រាស់ផលិតផលហ្នឹង បញ្ជៀសគ្រោះថ្នាក់ និងប៉ះពាល់សុខភាពរបស់យើង»។
មន្ត្រីក្រសួងឧស្សាហកម្មនិងសិប្បកម្មរូបនោះអះអាងថា វគ្គបណ្តុះបណ្តាលនេះ ក្រសួងធ្វើបានចំនួន៨ខេត្តរួចហើយ រួមមាន កោះកុង កំពង់ចាម ស្វាយរៀង តាកែវ និងខេត្តក្រចេះជាដើម ខណៈខេត្ត១៧ខេត្តផ្សេងទៀត លោកថា ក្រសួងគ្រោងធ្វើឲ្យចប់នៅចុងឆ្នាំ២០១៨នេះ។
នាយកប្រតិបត្តិនៃអង្គការចលនា ដើម្បីសុខភាពកម្ពុជា លោក មុំ គង់ ពន្យល់ជាទូទៅថា គ្រឿងបរិភោគផ្សេងៗ ដូចជា ទឹកត្រី និងទឹកស៊ីអ៊ីវជាដើម ទោះជាការផលិតមិនមានស្តង់ដារក៏មិនប៉ះពាល់សុខភាពលឿនដូចគ្រឿងស្រវឹងដែរ។ ករណីនេះ លោកថា រដ្ឋាភិបាលគួរតែបង្កើតច្បាប់គ្រប់គ្រងគ្រឿងស្រវឹងដាច់ចេញពីគ្រឿងបរិភោគផ្សេងទៀត ទើបទទួលបានផលវិជ្ជមាន។
លោកមានប្រសាសន៍ថា៖ «ស្រាអត់ដូចចំណីអាហារទេ។ គួរតែមានច្បាប់ដាច់ដោយឡែក សម្រាប់និយាយតែរឿងស្រា តាំងពីការចរាចរ តាំងពីការផលិត ការប្រើប្រាស់ តាំងពីការរកទីផ្សារជាដើម គួរតែនៅក្នុងច្បាប់មួយដាច់ដោយឡែកពីចំណីអាហារ»។
កាលពីថ្ងៃទី១៩ ខែតុលា ឆ្នាំ២០១៨ ប្រជាពលរដ្ឋមកពីឃុំចំនួន៤ គឺឃុំបឹងចារ ឃុំសំបូរ ឃុំក្បាលដំរី និងឃុំកោះខ្ញែ ស្ថិតនៅស្រុកសំបូរ ខេត្តក្រចេះ បានពុលស្រា«ស»ស្លាប់ចំនួន៥នាក់ និង៨៩នាក់បញ្ជូនទៅព្យាបាលនៅមន្ទីរពេទ្យខេត្ត។ ក្រោយពីផ្ទុះករណីនេះ អាជ្ញាធរខេត្តក្រចេះ បានបិទសិប្បកម្មផលិតស្រា«ស»ជាង៧០០ កន្លែង និងផ្អាកការលក់ដូរជាបណ្ដោះអាសន្ននៅទូទាំងខេត្តនេះ ៕