ការប្រកួតជ្រើសរើសឯក TV5 KNOCK OUK Series By K-Cement ក្នុងរដូវកាលទី៤ ដែលប្រកាសអោយកីឡាករ៥៧គីឡូក្រាម៣២រូប ប្រកួតគ្នានៅប៉ុស្ដិ៍លេខ៥ នៅព្រែកកំពឹស លើកនេះ គេឃើញវត្តមានកីឡាករ អេ រដ្ឋា ដែលកាលពីការប្រកួតកាលពីការប្រកួតជ្រើសជើងឯកលើកមុនឈានដល់វគ្គ៨នាក់ បង្ហាញខ្លួនជាថ្មី។ ជាមួយនឹងលទ្ធផលទម្លាក់គូប្រកួតក្នុងវគ្គទី១នេះ កីឡាករ អេ រដ្ឋា បានអះអាងថាខ្លួនមានពន្លឺសម្រាប់ការប្រកួតជម្រើសជើងឯករដូវកាលថ្មីទៀតហើយ បើទោះជាមិនទាន់ដឹងថាតើខ្លួនបានចូលទៅដល់វគ្គ៨នាក់ដូចការចូលប្រកួតកាលពីលើកមុន ឬយ៉ាងណា?
អេ រដ្ឋា និយាយថានេះ ជាលើកទី២ហើយ ដែលលោកបានចូលប្រកួតជ្រើសជើងឯកនៅប៉ុស្ដិ៍លេខ៥ ដោយការប្រកួតលើកមុនលោកបានឈានដល់ក្នុងវគ្គ៨នាក់ ប៉ុន្តែត្រូវធ្លាក់ហាលអាវក្នុងវគ្គពាក់កណ្ដាលផ្ដាច់ព្រ័ត្រ ក្រោយពីប៉ះអ្នកខ្លាំងជាគូប្រកួតនៅលើសង្វៀន។
លោកសម្ដែងអារម្មណ៍សប្បាយយ៉ាងខ្លាំង ដែលការប្រកួតកាលពីថ្ងៃទី៣ ខែវិច្ឆិកា ហើយបានឈ្នះពិន្ទុលើកីឡាករ ង៉ែត វុធ បង្គោលក្រហមដោយពិន្ទុ ដែលមានន័យថាលោកបានឆ្លងផុតវគ្គ៣២នាក់ ហើយបានឡើងទៅវគ្គ១៦នាក់តាមការចង់បាន។ ដ្បិតថាខ្លួនធ្លាប់បានបង្ហាញខ្លួនចូលប្រកួតព្រឹត្តិការណ៍មួយនេះកាលពីរដូវកាលមុនរួចម្ដង តែលោកនៅតែអះអាងថាមិនទាន់គ្រប់គ្រាន់សម្រាប់បទពិសោធន៍ ដោយលោកយល់ថាឱកាសបានឈ្នះជាថ្មី កាលពីថ្ងៃសៅរ៍មុននេះ គឺជាពន្លឺសម្រាប់ការសម្រេចចិត្តចូលប្រកួតជាលើកទី២របស់ខ្លួន។
លោកនិយាយថា«ដោយសារតែខ្ញុំប្រកួតកាលពីរដូវកាលមុនធ្លាប់បានឡើងដល់វគ្គ៨នាក់ម្ដងនឹងហើយ ទើបខ្ញុំចង់សាកប្រកួតលើកហ្នឹងម្ដងទៀត! ហើយខ្ញុំពិតជាមានកម្លាំងចិត្តបន្ទាប់ពីបានឡើងក្នុងវគ្គទី១លើកនេះ!»។
លោកថា មិននឹកស្មានថាខ្លួនដណ្ដើមបានកៅអីទៅកាន់វគ្គបន្តដូចការគ្រោងទុកនោះទេ បន្ទាប់ពីសាកកណ្ដាប់ដៃជាមួយ ង៉ែត វុធ ហើយកត់សម្គាល់ឃើញថាគូប្រកួតរបស់លោកខ្លាំងទាំងកែង ម៉ាត់ និងទាត់ ពិបាកវាយចូល។ ឱកាសដណ្ដើមបានទីតាំងមួយ ក្នុងវគ្គជម្រុះបើកឆាកនេះ ធ្វើអោយកីឡាក អេ រដ្ឋា មានកម្លាំងចិត្តទ្វេរដង ដោយបានទាំងអះអាងថាការសម្រេចចិត្តប្រកួតរបស់ខ្លួនក្នុងព្រឹត្តិការណ៍ TV5 KNOCK OUK Series By (K-Cement) ជារឿងសម្រេចចិត្តត្រូវនោះផង។
លោកមិនទាន់ដឹងថាតើអាចបន្តទៅវគ្គ៨នាក់ដូចមុន ឬយ៉ាងណានោះទេ ប៉ុន្តែលោកថានឹងប្រឹងអោយអស់ពីលទ្ធភាព ដើម្បីឆ្ពោះទៅកាន់ឱកាសកាន់ពាន កុំអោយភ្លាត់ស្នៀតដូចរដូវកាលមុន។ លោកថាបើការប្រកួតកាលពីថ្ងៃសៅរ៍នោះ មិនទទួលជោគជ័យ នោះលោកនឹងបាក់កម្លាំងចិត្តនៅក្នុងវិស័យប្រដាល់តែម្ដង ដោយសារតែប្រឹងហ្វឹកហាត់ម្លឹងដែរ នៅតែមិនអាចទៅរួចនោះ។
លោក សេង កដិកា អ្នករៀបចំកម្មវិធីបានអះអាងថា នេះជាការប្រកួតក្នុងសប្ដាហ៍ទី២ ក្នុងវគ្គជម្រុះពី៣២នាក់យក១៦នាក់ សម្រាប់រដូវកាលថ្មី បន្ទាប់ពីកីឡាករប្រភេទទម្ងន់៥៧គីឡូក្រាមរហូតដល់៣២រូបត្រូវបានជម្រើសមក។
លោកសរសើរថា អេ រដ្ឋា ធ្វើបានល្អមិនអន់ជាងកាលបង្ហាញខ្លួនកាលពីលើកមុនទេ ក្នុងពេលដែល កីឡាករ ង៉ែត វុធ បានបញ្ចេញថ្វីដៃយ៉ាងល្អ ទាំងម៉ាត់ កែង និងជង្គង់។ ការប្រកួតក្នុងវគ្គបន្តនឹងកាន់តែល្អមើល បើត្រឹមប្រកួតជំហានទី១ភាគីម្នាក់ៗបញ្ចេញឡើងអស់សមត្ថភាពបែបនេះហើយ៕
