លោកនាយករដ្ឋមន្ត្រី ហ៊ុន សែន បានប្រកាសពីលទ្ធភាពដកខ្លួនឈប់ឈរឈ្មោះជានាយករដ្ឋមន្ត្រី សម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៨ខាងមុខ ដោយលោកថា លោកឈានដល់វ័យចំណាស់។
លោក ហ៊ុន សែន បានថ្លែងឲ្យដឹងបែបនេះ ក្នុងពិធីជួបជាមួយសិស្សប្រឡងជាប់និទ្ទេស A នៅរាជធានាភ្នំពេញនាថ្ងៃនេះ។
លោក ហ៊ុន សែន ថ្លែង៖ «តាឈរតែឆ្នាំ២០២៣ទេ។ ២០២៨ មិនទាន់ធ្វើការសម្រេចទេ។ ប៉ុន្តែ ពេលនោះ អាយុជាង ៧០ហើយ ដូច្នេះ ច្រើនណាស់ អញ្ចឹងប្រហែលជាលទ្ធភាពច្រើននឹងដកថយ»។
លោក ហ៊ុន សែន បានកាន់ដំណែងជានាយករដ្ឋមន្ត្រីកម្ពុជាអស់រយៈ ៣៣ឆ្នាំមកហើយ ចាប់ពីឆ្នាំ១៩៨៥មក ដែលធ្វើឲ្យលោក្លាយជានាយករដ្ឋមន្ត្រីកាន់តំណែងយូរជាងគេបំផុតមួយនៅលើពិភពលោក។
របាយការណ៍អង្គការឃ្លាំមើលសិទ្ធិមនុស្សអន្តរជាតិកាលពីដើមឆ្នាំ២០១៥ បានលើកឡើងថា អំឡុងពេលកាន់អំណាចជាង ៣០ឆ្នាំមកនេះ លោក ហ៊ុន សែន បានគ្រប់គ្រងប្រទេសតាមរយៈការប្រើអំពើហិង្សា ការបង្ក្រាប និងអំពើពុករលួយ៕
