អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា លោកស្រី រ៉ូណា ស្មីត អំពាវនាវជាថ្មីទៀតទៅរដ្ឋាភិបាលកម្ពុជា ឲ្យដោះលែងមេដឹកនាំអតីតគណបក្សសង្គ្រោះជាតិ លោក កឹម សុខា ដោយថា ការបន្តឃុំខ្លួនមេដឹកនាំបក្សប្រឆាំងរូបនេះ សេរីភាពគាត់នៅតែបន្តរឹតត្បិត។
ប្រាប់ក្រុមអ្នកសារព័ត៌មាននៅការិយាល័យឧត្តមស្នងការអង្គការសហប្រជាជាតិ ក្នុងរាជធានីភ្នំពេញ ក្រោយពីបញ្ចប់បេសកកម្ម១១ថ្ងៃនៅកម្ពុជានៅថ្ងៃនេះ លោកស្រី រ៉ូណា ស្មីត លើកឡើងថា លោកស្រីមានការកង្វល់អំពីលោក កឹម សុខា ដែលត្រូវបានដាក់ឲ្យស្ថិតនៅក្រោមការឃុំខ្លួនក្នុងផ្ទះ បន្ទាប់ពីលោកត្រូវបានចាប់ដាក់ឃុំខ្លួនក្នុងពន្ធនាគារត្រពាំងផ្លុងអស់រយៈពេលជាង ១ឆ្នាំកន្លងមក។ លោកស្រីហៅការឃុំខ្លួននេះថា បានរឹតត្បិតសេរីភាពរបស់លោក កឹម សុខា។
លោកស្រីបន្តថា៖ «ខ្ញុំក៏សូមអំពាវនាវឲ្យមានការដោះលែងលោក កឹម សុខា ពីការឃុំឃាំងដ៏រឹតត្បិត និងបញ្ចប់ការស៊ើបអង្កេតឲ្យបានឆាប់នៅក្នុងសុំណុំរឿងរបស់គាត់ ដើម្បីធានាពីសិទ្ធិរបស់គាត់ក្នុងការទទួលបានការកាត់ក្តីរយៈពេលសមស្របមួយដោយឈរលើការវាយតម្លៃពីភស្តុតាងមួយច្បាស់លាស់ និងមានតម្លាភាព ឬបើមិនដូច្នេះ ត្រូវទម្លាក់បទចោទប្រឆាំងនឹងរូបគាត់»។
លោកស្រី រ៉ូណា ស្មីត បានអះអាងទៀតថា កង្វល់នេះ ក៏ត្រូវបានលោកស្រីលើកយកទៅជជែកជាមួយក្រសួងយុត្តិធម៌ និងគណៈកម្មាធិការសិទ្ធិមនុស្សរបស់រដ្ឋាភិបាលផងផងដែរ។
ទោះជាយ៉ាងណា អ្នកជំនាញសិទ្ធិមនុស្សអង្គការសហប្រជាជាតិរូបនេះ បានបង្ហាញការខកចិត្តទៅនឹងចៅក្រមដែលមិនអនុញ្ញាតិឲ្យលោកស្រី បានជួបលោក កឹម សុខា ដែលកំពុងត្រូវបានបង្គាប់ឲ្យឃុំខ្លួនក្នុងផ្ទះ។
លោកស្រីថា៖ «ក្នុងនាមខ្ញុំជាអ្នកជំនាញរបស់អង្គការសហប្រជាជាតិឯករាជ្យ ដែលតែងតាំងដោយរដ្ឋជាសមាជិក គឺខ្ញុំមានសិទ្ធិចូលគ្រប់កន្លែងទាំងអស់ ដែលមានការឃុំឃាំង។ នេះជាសិទ្ធិរបស់ខ្ញុំ ហើយសិទ្ធិមនុស្សត្រូវបានបដិសេធចោល ហើយអ្វីដែលខ្ញុំត្រូវធ្វើបន្ត គឺខ្ញុំត្រូវរាយការណ៍ទៅក្រុមប្រឹក្សាសិទ្ធិមនុស្សអំពីការបដិសេធនេះ»។
លោកស្រីរ៉ូណា ស្មីត ក៏អំពាវនាវឲ្យទម្លាក់បទចោទលើមន្ត្រីការពារសិទ្ធិមនុស្សអាដហុក និងសកម្មជនដីធ្លីអ្នកស្រី ទេព វន្នី ផងដែរ៕