ក្រសួងបរិស្ថាននឹងដាក់ពង្រាយមន្ត្រី ឲ្យបណ្ដុះបណ្ដាលពលរដ្ឋ ឲ្យយល់ដឹងពីផលប៉ះពាល់នៃថង់ប្លាស្ទិកទៅលើបរិស្ថាន ខណៈអ្នកចោលសំរាមពាសវាលពាសកាលក្នុងឱកាសពិធីបុណ្យអុំទូក អាចប្រឈមនឹងការផាកពិន័យផងដែរ។
អ្នកនាំពាក្យក្រសួងបរិស្ថាន លោក នេត្រ ភក្រ្តា បានឲ្យVODដឹងថា ក្នុងឱកាសពិធីបុណ្យអុំទូកខាងមុខ ក្រសួងបានរៀបចំមន្ត្រីដើម្បីចុះផ្សព្វផ្សាយ និងអប់រំពលរដ្ឋ ឲ្យយល់ដឹងពីផលប៉ះពាល់នៃសំរាម និងថង់ប្លាស្ទិក ទៅលើបរិស្ថាន ខណៈក្រសួងក៏មានវិធានការបន្តបន្ទាប់លើអ្នកដែលបោះសំរាមចោលគ្មានសណ្ដាប់ធ្នាប់ផងដែរ ប៉ុន្តែ លោកថា ការផាកពិន័យ គឺជាវិធានការចុងក្រោយប៉ុណ្ណោះ។
លោកថា៖ «ប្រជាពលរដ្ឋយើងមានចំនួនច្រើន ការផាកពិន័យ គឺជាវិធានការមួយហើយ តែយើងត្រូវប្រើប្រាស់ឲ្យអស់លទ្ធភាពក្នុងការណែនាំពួកគាត់ ដើម្បីឲ្យចូលរួមក្នុងការសម្អាត ព្រោះបងប្អូនយើងមួយចំនួនដែលគាត់អញ្ជើញមកពីជនបទ ពួកគាត់ខ្លះគាត់មិនបានដឹងអំពីវិធានការច្បាប់ការផាកពិន័យក្នុងការបោះសំរាមដោយផ្ដេសផ្ដាសទេ! អញ្ចឹង គឺយើងប្រើប្រាស់ក្នុងរូបភាពនេះ គឺធ្វើការណែនាំច្រើនជាងផាកពិន័យ»។
ទោះជាយ៉ាងណា លោក ភក្ត្រា មិនទាន់អាចបញ្ជាក់បានទេថា ក្រសួង និងដាក់ពង្រាយមន្ត្រីប៉ុន្មាននាក់ដើម្បីអនុវត្តវិធានការនេះនោះទេ។
VOD មិនទាន់អាចទាក់ទងអ្នកនាំពាក្យសាលារាជធានីភ្នំពេញ លោក ម៉េត មាសភក្ដី ដើម្បីបញ្ជាក់បន្ថែមពីវិធានការរបស់សាលារាជធានីភ្នំពេញលើករណីនេះបាននៅឡើយទេ។
នាយកប្រតិបត្តិសម្ព័ន្ធគណនេយ្យភាពសង្គម លោក សន ជ័យ យល់ថា វិធានការរបស់ក្រសួងបរិស្ថាននេះ គ្មានប្រសិទ្ធិភាពនោះទេ ដោយលោកលើកឡើងថា វិធានការនេះថ្មីទើបយកមកអនុវត្តន៍ មនុស្សចូលរួមច្រើន ហើយការអនុវត្តន៍ច្បាប់នៅខ្សោយ។
លោកបន្ថែមថា៖ «ការអប់រំក្នុងបរិយាកាសដូចជាមានក្នុងពិធីបុណ្យអីធំៗ គ្រាន់តែផ្នែកមួយដែលទាក់ទាញការចាប់អារម្មណ៍ ហើយក៏មិនមានប្រសិទ្ធភាពប៉ុន្មានដែរ ហើយខ្ញុំក៏មិនសង្ឃឹមឃើញថា អ្នកដើរលេងទាំងអស់នោះ គេនឹងស្ដាប់ការអប់រំទូន្មានដែរ! តែការរៀបចំឲ្យមានច្បាប់ដើម្បីធ្វើការផាកពិន័យធ្ងន់ធ្ងរដល់អ្នកចោលសំរាមផ្ដេសផ្ដាស គឺជារឿងមួយល្អ»។
បើតាមលោក សន ជ័យ ដើម្បីដោះស្រាយបញ្ហាចោលសំរាមពាសវាលពាសកាលរបស់ពលរដ្ឋនេះ រដ្ឋាភិបាលគួរតែដាក់បញ្ចូលការសិក្សាពីបញ្ហានេះទៅឲ្យពលរដ្ឋបានយល់ដឹងចាប់តាំងពីក្មេងមក ខណៈពង្រឹងការអនុវត្តន៍ច្បាប់ឲ្យខ្លាំងក្លា។
ក្នុងពិធីបុណ្យអុំទូកឆ្នាំ២០១៧កន្លងទៅ អាជ្ញាធរសាលារាជធានីភ្នំពេញ បានដាក់ពង្រាយធុងសំរាមជាង ២៤០០ធុង នៅតាមទីកន្លែងដែលប្រារព្វពិធី ប៉ុន្តែ សំរាមនៅតែត្រូវបានបោះចោលតាមទីសាធារណៈដដែល។
យោងតាមមាត្រា៤២ នៃអនុក្រឹត្យស្ដីពី«ការគ្រប់គ្រងសំរាម សំណល់រឹងនៅទីប្រជុំជន» អ្នកដំណើរ អ្នកទេសចរណ៍ ដែលបោះចោលសំរាមនៅទីសាធារណៈ តាមដងផ្លូវ ទីវាល ដីកម្មសិទ្ធិ ឬទីដែលរដ្ឋបាលរាជធានី ក្រុង ស្រុក ខណ្ឌ ហាមឃាត់ ត្រូវពិន័យជាប្រាក់ចំនួន ២ម៉ឺនរៀល ហើយត្រូវប្រមូលសំអាតសំរាមដែលខ្លួនចោលនោះ យកទៅដាក់ក្នុងធុងសំរាម ហើយបើមិនរាងចាល ត្រូវទទួលការពិន័យប្រាក់ទ្វេដងនៃប្រាក់លើកមុន៕
