ក្រសួងមហាផ្ទៃបានកំណត់ចំនួនអគ្គនាយករង និងអនុប្រធាន សម្រាប់បម្រើការនៅតាមអគ្គលេខាធិការដ្ឋាន ស្នងការដ្ឋាននរគបាលជាតិ និង អគ្គនាយកដ្ឋាននានា ចំនួន១០ ដោយថាការតែងតាំងនេះ ធ្វើឡើងផ្អែកតាមលក្ខណៈសម្បត្តិ ដែលកំណត់ដោយក្រសួងមហាផ្ទៃ។
សេចក្តីប្រកាសរបស់ក្រសួងមហាផ្ទៃចុះផ្សាយកាលពីថ្ងៃទី២៦ ខែតុលា ឆ្នាំ២០១៨ បានឲ្យដឹងថា រដ្ឋមន្ត្រីក្រសួងមហាផ្ទៃ លោក ស ខេង បានសម្រេចផ្តល់មុខតំណែងដល់មន្ត្រីរបស់ខ្លួនចំនួន៩៣នាក់ ដើម្បីបំរើការងារជាអគ្គស្នងការរង អគ្គនាយករង និងថ្នាក់ប្រហាក់ប្រហែលក្នុងក្របខ័ណ្ឌមន្ដ្រីនគរបាលជាតិកម្ពុជា ក្របខ័ណ្ឌមន្ដ្រីពន្ធនាគារ និងអគ្គនាយកដ្ឋានអន្តោរប្រវេសន៍ជាដើម។
សេចក្តីប្រកាសក្រសួងមហាផ្ទៃបញ្ជាក់ថា មន្ត្រីដែលចូលបំរើតាមស្ថាប័នទាំង១០នោះរួមមាន អគ្គលេខាធិការដ្ឋាន មានអគ្គលេខាធិការរង៨នាក់ អគ្គស្នងការដ្ឋាននគរបាលជាតិ មានអគ្គស្នងការរង១៦នាក់ អគ្គាធិការដ្ឋាន មានអគ្គធិការរង៨រូប អគ្គនាយកដ្ឋានពន្ធនាគារ មានអគ្គនាយករង៨រូប អគ្គនាយកដ្ឋានអន្តោប្រវេសន៍ មានអគ្គនាយករង១០រូប អគ្គនាយកដ្ឋានអត្តសញ្ញាណកម្ម មានអគ្គនាយករង ៩នាក់ អគ្គនាយកដ្ឋានភស្តុភារ និងហិរញ្ញវត្ថុ មានអគ្គនាយករង១១នាក់ បណ្ឌិត្យសភានគរបាលកម្ពុជា មានអនុប្រធាន១០នាក់ អគ្គនាយកដ្ឋានសវនកម្មផ្ទៃក្នុងមានអគ្គនាយករង៦នាក់ និងក្រុមប្រឹក្សានីតិកម្ម មានអនុប្រធាន៧នាក់៕
