ពលរដ្ឋមានប័ណ្ណក្រីក្រមួយចំនួន បានអះអាងថា បុគ្គលិកពេទ្យដែលបម្រើការងារនៅមន្ទីរពេទ្យរុស្ស៊ី មិនបានយកចិត្តដាក់ចំពោះពួកគេនោះឡើយ ខណៈដែលពលរដ្ឋទាំងនោះទៅរកសេវាព្យាបាលនៅទីនោះ។
ពលរដ្ឋម្នាក់រស់នៅភ្នំពេញ អ្នកស្រី អ៊ំ សំបូរ បានប្រាប់វីអូឌីថា អ្នកស្រីបានទៅរកសេវាព្យាបាលភ្នែកនៅមន្ទីរពេទ្យខ្មែរ-សូវៀត ហៅមន្ទីរពេទ្យរុស្ស៊ី កាលពីដើមសប្តាហ៍នេះ ដោយមានប័ណ្ណបញ្ជាក់ភាពក្រីក្រ។ អ្នកស្រីបន្តថា ពេលបង្ហាញប័ណ្ណក្រីក្រនោះទៅពេទ្យ គឺក្រុមគ្រូពេទ្យនៅទីនោះ មិនសូវយកចិត្តទុកដាក់មើលគាត់ឡើយ និងបានទាមប្រាក់ថ្លៃថ្នាំពីគាត់ថែមទៀត។
អ្នកស្រីបន្ថែមថា៖ «ពេទ្យនៅហ្នឹងវាឈ្លើយអញ្ចឹងហ្មង គេបញ្ជាក់ឲ្យយើងថា យើងក្រីក្រហើយវានៅតែមិនចង់មើលយើង ដោយរុញពីមួយទៅមួយ មិនដឹងមួយណាជាអ្នកទទួលខុសត្រូវពិតប្រាកដ ទុកយើងចោល មិនដឹងមួយទទួលខុសត្រូវរឿងថ្នាំដែលត្រូវឲ្យយើងហ្នឹង ដល់អញ្ចឹងខ្ញុំឡប់សតិតាមពួកវាដែរ ដើរឡើងចុះឡើងមួយថ្ងៃ ហើយទារលុយពីយើងទៀត នេះមិនមែនជាលើកទី១ទេ»។
ពលរដ្ឋម្នាក់ទៀតមកពីខេត្តកំពង់ធំ អ្នកស្រី សុខ សាក់ ដែលអះអាងថា ពិការដៃជើង និងមានស្វាមីពិការភ្នែកផងនោះ បានប្រាប់វីអូឌីតាមទូរស័ព្ទថា អ្នកស្រីក៏មិនទទួលបានការផ្ដល់សេវាល្អពីមន្ទីរពេទ្យផងដែរ នៅពេលអ្នកស្រីនាំស្វាមីទៅព្យាបាលភ្នែកនៅទីនោះដោយប្រើប័ណ្ណក្រីក្រី។
អ្នកស្រីបានឲ្យដឹងបន្ថែមថា អ្នកស្រីសម្រេចនាំស្វាមីពិការភ្នែកត្រឡប់ទៅផ្ទះវិញទាំងពុំបានព្យាបាលភ្នែកនោះឡើយ បន្ទាប់ពីក្រុមគ្រូពេទ្យនៅមន្ទីរពេទ្យរុស្ស៊ីទាមទារតម្លៃវះកាត់ ក្រោយឆ្លងកាត់ការពិនិត្យ។
អ្នកស្រីប្រាប់ថា៖ «ខ្ញុំអត់មានលុយឲ្យគេ គេក៏អត់បានវះកាត់ឲ្យដែរ ហើយខ្ញុំអត់លុយ ខ្ញុំមកផ្ទះសិន។ គេទារយក ៨ម៉ឺន ហើយខ្ញុំថា ខ្ញុំគ្មានលុយទេ រួចហើយគេធ្វើសំបុត្រឲ្យខ្ញុំមកបើកថ្នាំ។ កន្លែងលោកគ្រូពេទ្យមួយកន្លែងទៀត លោកគ្រូពេទ្យថា អត់មានថ្នាំបើកឲ្យទេ ឲ្យខ្ញុំទៅទិញថ្នាំ«ហ៉្វាម៉ាស៊ី»មុខហ្នឹង តែខ្ញុំអត់លុយក៏យកប្តីមកផ្ទះវិញ។ ខ្ញុំមានប័ណ្ណក្រីក្រ។ ខ្ញុំឆ្ងល់ ខ្ញុំមានប័ណ្ណក្រីក្រដែរ ហេតុអីបានជាគេចេះតែទារយកលុយ»។
ប្រធានមន្ទីរពេទ្យរុស្ស៊ី លោក យ៉ៃ យ៉េង បានច្រានចោលចំពោះការចោទប្រកាន់ពីពលរដ្ឋដែលមានប័ណ្ណក្រីក្រ ដោយថា ការផ្តល់សេវាព្យាបាលនៅមន្ទីរពេទ្យរុស្ស៊ី ត្រូវបានផ្ដល់ទៅឲ្យប្រជាពលរដ្ឋគ្រប់រូបដោយស្មើភាពគ្នា និងគ្មានការរើសអើងនោះឡើយ។
លោកបន្ថែមថា៖ «ខ្ញុំមិនដឹងថា អត់យកចិត្តទុកដាក់ហ្នឹងយ៉ាងម៉េច? ខ្ញុំអត់យល់ដែរ។ នៅក្នុងប្រអប់សំបុត្រទាំងអស់ គាត់អាច Comment [រាយការណ៍]ចូល ឬហ្វេសប៊ុក ប្រអប់សំបុត្រគេមានដាក់ទាំងអស់ដូចជាការផ្តល់សេវាខ្វះខាត ឬយ៉ាងម៉េចៗ? សូម្បីតែមន្រ្តីដែលធ្វើការឬផ្តល់អាកប្បកិរិយាមិនល្អគាត់មានប៉ាក់ស្លាកឈ្មោះនៅក យើងអាចកត់ឈ្មោះគាត់មក។ គេមានក្រុមប្រឹក្សាវិន័យគេ គេនឹងកោះហៅដើម្បីនិយាយរឿងហ្នឹង និងដាក់ពិន័យ»។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ ប្រសិនបើនៅមន្ទីររុស្ស៊ីមានករណីនេះដូចពលរដ្ឋលើកឡើងមែននោះ លោកថា ជាសកម្មភាពផ្ទុយពីគោលនយោបាយសាធារណៈរបស់រដ្ឋាភិបាល។
លោកបន្ថែមថា៖ «ចំណុចនេះ បើនិយាយពីកម្រិតគោលនយោបាយវិញ គឺរដ្ឋាភិបាលបានយកចិត្តដាក់រហូតដល់បង្កើតឲ្យមានប្រភេទប័ណ្ណសមធម៌សុខភាព។ អញ្ចឹង ការរើសអើងដែលបានកើតឡើង ខ្ញុំយល់ថា វាជាការប្រឆាំងទៅនឹងគោលនយោបាយសាធារណៈដែលមានស្រាប់ ហើយជាមួយគ្នានោះដែរ ស្ថាប័នដែលចេញប័ណ្ណនោះ គួរតែបង្កើតយន្តការដោះស្រាយបញ្ហានេះ ប្រសិនបើមានការរើសអើង»។
រដ្ឋាភិបាលមានគោលនយោបាយសាធារណៈមួយដោយបង្កើតឲ្យមានប័ណ្ណសមធម៌ ឬហៅសាមញ្ញថា ប័ណ្ណក្រីក្រី ក្នុងគោលបំណងជួយសម្រួលដល់ពលរដ្ឋក្រីក្រទទួលបានសេវាសាធារណៈដោយឥតគិតថ្លៃ។
ប្រព័ន្ធសុខាភិបាលកម្ពុជា បានរងការរិះគន់ជាបន្តបន្ទាប់ ប៉ុន្តែ លោកនាយករដ្ឋមន្ត្រី ហ៊ុន សែន បានអះអាងកាលពីដើមឆ្នាំ២០១៦កន្លងមកថា គ្រូពេទ្យកម្ពុជាមិនអាក្រក់ភាគច្រើននោះឡើយ៕