លោក នួន ជា មានជំងឺមិនអាចស្តាប់សាលក្រមបាន

លោក នួន ជា អតីតមេដឹកនាំជាន់ខ្ពស់នៃរបបខ្មែរក្រហម បញ្ជាក់ថា លោកមានជំងឺមិនអាចអង្គុយក្នុងបន្ទប់សវនាការ ដើម្បីស្តាប់សាលក្រមលើរូបលោកបានទេនៅព្រឹកនេះ។​

នៅព្រឹកនេះ លោក នួន ជា បានបង្ហាញខ្លួននៅក្នុងបន្ទប់សវនាការប្រមាណ៥នាទីក្រោយមក លោកក៏ស្នើសុំទៅបន្ទប់សម្រាកវិញដោយបញ្ជាក់ថា មានបញ្ហាសុខភាព។​

លោក និល ណុន ប្រធានអង្គជំនុំជម្រះបានថ្លែងថា យោងតាមការបញ្ជាក់របស់គ្រូពេទ្យគឺ លោក នួន ជា មានអាការៈវិលមុខ អស់កម្លាំង ឈឺចង្កេះ ឈឺខ្នង និង មានបញ្ហាចង្វាក់បេះដូង។​ លោក និល ណុន បញ្ជាក់ថា យោងតាមអាការៈនេះលោកសម្រេចឲ្យលោក នួន ជា ទៅបន្ទប់របស់លោកវិញ ដោយអាចតាមដានការប្រកាសសាលក្រមតាមទូរទស្សន៍ ផ្សាយផ្ទាល់។​

លោក នួន ជា កើតនៅឆ្នាំ១៩២៦ នៅក្នុងខេត្តបាត់ដំបង បច្ចុប្បន្នលោក មានអាយុ ៩២ឆ្នាំ។​

ចំណែកជនជាប់ចោទមួយរូបទៀតគឺលោក ខៀវ សំផន អាយុ៨៧ឆ្នាំ អតីតប្រមុខរដ្ឋក្នុង សម័យខ្មែរក្រហមចូលរួមស្តាប់សាលក្រមនៅព្រឹកនេះ។​