អគ្គស្នងការនគរបាលជាតិបានព្យួរការងារអធិការក្រុងដូនកែវ ខេត្តតាកែវ ដោយចោទថា លោកបានប្រើប្រាស់ហិង្សាវាយដំប្រពន្ធ។
គេហទំព័រអគ្គស្នងការដ្ឋាននគរបាលជាតិបានឲ្យដឹងថា កាលពីយប់ថ្ងៃទី១៥ខែវិច្ឆិកា លោក ឆាយ សាវុធ អធិការក្រុងដូនកែវ បានទះកំភ្លៀងប្រពន្ធក្នុងជម្លោះស្នេហាត្រីកោណ។ ក្រោយមកប្រពន្ធរបស់លោកបានបង្ហោះរូបដែលរងរបួសនោះលើបណ្តាញសង្គមហ្វេសប៊ុក។
បើតាមអគ្គស្នងការដ្ឋាននគរបាលជាតិឲ្យដឹងថា លោក នេត សាវឿន បានផ្អាកការងារមន្ត្រីរូបនេះដើម្បីស៊ើបអង្កេត និងសម្រុះសម្រួលក្នុងគ្រួសារ ហើយថា បើសម្របសម្រួលមិនបានទេនឹងបញ្ជូនសំនុំរឿងនេះទៅតុលាការ។