សាលារាជធានីភ្នំពេញអំពាវនាវដល់ក្រុមហ៊ុន អ្នកលក់ដូរ និងប្រជាពលរដ្ឋដែល ដើរកំសាន្ត ក្នុងពិធីបុណ្យអុំទូកជួយទុកដាក់សំរាមឲ្យបានត្រឹមត្រូវ ដើម្បីបរិស្ថាននិងសោភ័ណភាពក្នុង រាជធានី។
នៅក្នុងសេចក្តីជូនដំណឹងរបស់សាលារាជធានីចុះថ្ងៃទី១៦ខែវិច្ឆិកាស្តីពីការចូលរួមថែរក្សា អនាម័យ បរិស្ថាន ក្នុងឱកាសបុណ្យអុំទូក បណ្តែតប្រទីប និងសំពះព្រះខែ អកអំបុកនោះគឺ បានក្រើនឭកឲ្យម្ចាស់ស្តង់លក់ទំនិញ ម្ចាស់ទីតាំងប្រគំតន្ត្រី អ្នកលក់ដូររួមទាំងកីឡាករ ប្រណាំងទូក និង ប្រជាពលរដ្ឋដើរកំសាន្ត ត្រូវចូលរួមថែរក្សាអនាម័យទុកដាក់សំរាមឲ្យបាន ត្រឹមត្រូវ។
កាលពីថ្ងៃទី១៣ខែវិច្ឆិកា លោក នេត្រ ភត្រ្តា អ្នកនាំពាក្យក្រសួងបរិស្ថានប្រាប់វីអូឌីថា ក្រសួងនឹងដាក់ពង្រាយមន្ត្រីអប់រំពលរដ្ឋពីការទុកដាក់សំរាមឲ្យបានត្រឹមត្រូវ។ ទន្ទឹមនឹងនេះ លោកថា អាចនឹងមានវិធានការផាកពិន័យផងដែរចំពោះការចោលសំរាមធ្វើឲ្យខូចសោភ័ណ ភាព។
របាយការណ៍ក្រសួងបរិស្ថានឲ្យដឹងថា នៅរាជធានីភ្នំពេញមានសំរាមជាកាកសំណល់ពីការ ប្រើប្រាស់ក្នុង១ថ្ងៃជាង២៣០០តោន។