លោក ដូណាល់ ត្រាំ ចាញ់ក្តី CNN

ចៅក្រមរដ្ឋសហព័ន្ធបានបញ្ជាឲ្យរដ្ឋការរបស់លោកដូណាល់ ត្រាំ ត្រូវផ្តល់សុពលភាពជា បន្ទាន់ឲ្យប្រធានក្រុមការងាររបស់សារព័ត៌មាន CNN លោក Jim Acosta អាចចូលយកព័ត៌ មាននៅសេតវិមានធម្មតាវិញ។

ចៅក្រម Timothy Kelly ប្រកាសសេចក្តីសម្រេចក្រោយពេលសវនាការកាលពីម្សិលមិញថា  សុពលភាពរបស់លោក Jim Acosta ត្រូវតែផ្តល់ឲ្យវិញ ហើយសេតវិមានត្រូវ តែអនុញ្ញាតឲ្យបុគ្គលិករបស់ CNN រូបនេះចេញចូលបំពេញការងារបានធម្មតា។​ នេះបើតាមទីភ្នាក់ងារព័ត៌មាន AP។​

កាលពីថ្ងៃទី៧ខែវិច្ឆិកាលោក ត្រាំ បានតិះដៀលប្រធានក្រុមអ្នកសារព័ត៌មានរបស់ CNN ប្រចាំនៅសេតវិមានថា ជាមនុស្សឈ្លើយ ក្រអើតក្រទម មិនយល់ពិធីការនិងបានបញ្ជាឲ្យដកក្បាលមេក្រូបញ្ឈប់ការសួរភ្លាមៗ។ ហេតុការណ៍នេះកើតឡើងនៅពេលដែល​ប្រធានក្រុមអ្នកសារព័ត៌មានរបស់ CNN លោក Jim Acosta  សួរជុំវិញដំណើរការស្ថាប័នច្បាប់ស៊ើបអង្កេតលើលោក ត្រាំ ករណីពាក់ព័ន្ធជាមួយរុស្ស៊ី និង សួរពីបញ្ហាលោកត្រាំបញ្ជាឲ្យមានការបង្ក្រាបលើជនអន្តោប្រវេសន៍ចូលទឹកដីអាមេរិក។

នៅថ្ងៃដដែលនោះ សេតវិមានបានសម្រេចដកប័ណ្ណព័ត៌មានដោយមិនអនុញ្ញាតឲ្យលោក Jim Acosta  ចេញចូលសេតវិមានបានទេ។​

ក្រោយមកនៅថ្ងៃទី១៣ខែវិច្ឆិកា សារព័ត៌មាន CNN បានដាក់ពាក្យប្តឹងលោក ដូណាល់ ត្រាំ និង មន្ត្រីជំនិត៥រូបផ្សេងទៀតលើករណីនេះ។​

ចៅក្រមក៏បានចាត់ទុកថា សកម្មភាពរបស់សេតវិមានបណ្តេញចេញ និងរារាំងនេះ ជាសកម្មភាពខុសច្បាប់ ហើយធ្វើឲ្យប៉ះពាល់ដល់លោក​ Jim Acosta។​

CNN គឺជាស្ថាប័នព័ត៌មានរបស់ក្រុមហ៊ុនអាមេរិកបង្កើតឡើងកាលពីឆ្នាំ១៩៨០ ល្បីទាំង នៅ អាមេរិក និងពិភពលោកក្នុងការផ្សាយព័ត៌មាន​២៤ម៉ោងក្នុងថ្ងៃតាមទូរទស្សន៍ និងកំពុងផ្សាយ តាមបណ្តាញផ្សព្វផ្សាយផ្សេងៗទៀតផងដែរ។