អាមេរិកបានអះអាងថា ព្រះអង្គម្ចាស់ ម៉ូហាម៉េដ ប៊ីន សាល់ម៉ាន់ រាជទាយាទនៃប្រទេសអារ៉ាប៊ីសាអ៊ូឌីត បានបញ្ជាឲ្យសម្លាប់អ្នកសារព័ត៌មាន លោក ចាម៉ាល់ ខាហ្សូហ្គី។
ទីភ្នាក់ងារព័ត៌មានរ៉យទ័រ បានដកស្រង់សម្ដីអ្នកនាំពាក្យសេតវិមានអាមេរិក អ្នកស្រី Sarah Haspel ដែលបានថ្លែងថា ខណៈកំពុងហោះហើរទៅកាន់រដ្ឋកាលីហ្វ័រនីញ៉ានោះ ប្រធានាធិបតី លោក ដូណាល់ ត្រាំ បានបង្ហាញឲ្យដឹងខ្លះៗអំពីឃាតកម្មទៅលើអ្នកសារព័ត៌មានជនជាតិអារ៉ាប៊ីសាអ៊ូឌីត លោក ចាម៉ាល់ ខាហ្សូហ្គី បន្ទាប់ពីការវាយតម្លៃរបស់ទីភ្នាក់ងារចារកម្មអាមេរិក។
អ្នកនាំពាក្យសេតវិមានអាមេរិករូបនេះ បានប្រាប់អ្នកសារព័ត៌មានថា លោក ត្រាំ បានជជែកតាមទូរស័ព្ទជាមួយនាយកទីភ្នាក់ងារ CIA អ្នកស្រី Gina Haspel និងរដ្ឋមន្ត្រីការបរទេស លោក Mike Pompeo អំពីរបាយការណ៍វាយតម្លៃរបស់ទីភ្នាក់ងារ CIA។
ទីភ្នាក់ងារព័ត៌មានរ៉យទ័របានចុះផ្សាយបន្តថា ប្រភពព័ត៌មានបានប្រាប់ថា ទីភ្នាក់ងារ CIA បានរាយការណ៍ប្រាប់ទៅរដ្ឋាភិបាល និងរដ្ឋសភា អំពីរបាយការណ៍វាយតម្លៃរបស់ខ្លួន ដែលនឹងធ្វើឲ្យលោក ត្រាំ កាន់តែស្មុគស្មាញថែមទៀត ក្នុងការរក្សាទំនាក់ទំនងជាមួយប្រទេសអារ៉ាប៊ីសាអ៊ូឌីត ដែលជាសម្ព័ន្ធមិត្តដ៏សំខាន់របស់អាមេរិក។
លោក ចាម៉ាល់ ខាហ្សូហ្គី ដែលជាអ្នកសរសេរអត្ថបទឲ្យសារព័ត៌មាន Washington Post មានមូលដ្ឋាននៅអាមេរិកនោះ ត្រូវបានខ្មាន់កាំភ្លើងបាញ់សម្លាប់កាលពីខែតុលាកន្លងមកនេះនៅក្នុងស្ថានកុងស៊ុលអារ៉ាប៊ីសាអ៊ូឌីត ស្ថិតនៅក្នុងទីក្រុងអ៊ីស្តង់ប៊ុល ប្រទេសតួកគី នៅពេលលោកទៅទីនោះដើម្បីទទួលឯកសារមួយសម្រាប់គម្រោងអាពាហ៍ពិពាហ៍របស់លោក។
លោក ខាហ្សូហ្គី គឺជាបុគ្គលឈានមុខដែលហ៊ានរិះគន់ព្រះអង្គម្ចាស់រាជទាយាទ ម៉ូហាម៉េដ ប៊ីន សាល់ម៉ាន់ និងរដ្ឋាភិបាលប្រទេសអារ៉ាប៊ីសាអ៊ូឌីត៕
