ក្រសួងការពារជាតិ បានច្រានចោលព័ត៌មានបរទេសមួយដែលបានចុះផ្សាយថា បរទេសកំពុងប្រើប្រាស់ទឹកដីកម្ពុជា ធ្វើជាមូលដ្ឋានយោធា ដែលថា ឈានទៅបង្កើតជាសង្គ្រាមត្រជាក់រវាងចិន និងសហរដ្ឋអាមេរិក។
ក្នុងសេចក្ដីថ្លែងការណ៍កាលពីថ្ងៃម្សិលមិញ ក្រសួងការពារជាតិបានចាត់ទុកព័ត៌មានដែលចុះផ្សាយដោយសារព័ត៌មានបរទេស Asian Times ថា ជាព័ត៌មានក្លែងក្លាយ ប៉ះពាល់ដល់កិត្យានុភាពវិស័យយោធា និងគោលការណ៍អព្យាក្រឹតរបស់កម្ពុជា។
ក្រសួងការពារជាតិអះអាងក្នុងសេចក្ដីថ្លែងការណ៍ថា កម្ពុជាមិនបានចូលរួមជាមួយសង្គ្រាមត្រជាក់ ឬអនុញ្ញាតឲ្យបរទេសណាមួយ ប្រើប្រាស់ទឹកដីរបស់ខ្លួនធ្វើជាមូលដ្ឋានយោធានោះឡើយ។
សេចក្ដីប្រកាសព័ត៌មានរបស់ក្រសួងការបរទេសកម្ពុជា ឲ្យដឹងថា ក្នុងជំនួបមួយជាមួយរដ្ឋមន្ដ្រីការបរទេស លោក ប្រាក់ សុខុន កាលពីថ្ងៃទី១៥ ខែវិច្ឆិកា នៅក្រៅកិច្ចប្រជុំកំពូលអាស៊ាននៅប្រទេសសិង្ហបុរីនោះ អនុរដ្ឋមន្ដ្រីការបរទេសអាមេរិក លោក John Sullivan ក៏បានលើកពីបញ្ហានេះទៅកាន់ភាគីកម្ពុជាផងដែរ ដោយថា វានឹងធ្វើឲ្យប៉ះពាល់ធ្ងន់ធ្ងរដល់ទំនាក់ទំនងប្រទេសទាំងពីរ។
ប៉ុន្ដែ លោក ប្រាក់ សុខុន ក៏បានច្រានចោលដោយថា គ្មានការរៀបចំមូលដ្ឋានកងទ័ពជើងទឹកនៅតំបន់ឆ្នេរសមុទ្រកម្ពុជានោះទេ។ លោកចាត់ទុកថា នេះជាពាក្យចចាមរាមដែលកើតចេញពីទំហំវិនិយោគដ៏ធំរបស់ចិននៅក្នុងតំបន់នេះតែប៉ុណ្ណោះ៕
