អ្នកជំនាញគោលនយោបាយ បានព្រមានអំពីផលប៉ះពាល់នៃឥទ្ធិពលចិនទៅលើឯករាជ្យភាពរបស់កម្ពុជា បន្ទាប់ពីរដ្ឋាភិបាលកម្ពុជាដឹកនាំដោយលោកនាយករដ្ឋមន្ត្រី ហ៊ុន សែន នៅតែរក្សាជំហររឹងមាំនៅចំពោះមុខការជំរុញរបស់ប្រទេសលោកសេរី ឲ្យងាកទៅគោពសិទ្ធិមនុស្ស និងលទ្ធិប្រជាធិបតេយ្យ។
កាលពីថ្ងៃម្សិលមិញនេះ លោកនាយករដ្ឋមន្ដ្រី ហ៊ុន សែន បានអះអាងថា មូលហេតុដែលគេព្រមានកាត់ផ្ដាច់ប្រព័ន្ធអនុគ្រោះពន្ធនោះ គឺបណ្ដាលមកពីសេដ្ឋកិច្ចរបស់កម្ពុជាបន្ដកើនឡើង ហើយគេចាំចាច់ត្រូវដកហូតប្រព័ន្ធអនុគ្រោះពន្ធពីកម្ពុជាទៅវិញ ដើម្បីយកទៅជួយដល់ប្រទេសក្រីក្រ ដែលមានសេដ្ឋកិច្ចអន់ថយជាងកម្ពុជា។
លោក ហ៊ុន សែន ក៏បានប្រកាសផងដែរថា រដ្ឋាភិបាលរបស់លោកបានត្រៀមខ្លួនរួចជាស្រេច ដើម្បីទទួលយកការទទួលខុសត្រូវ ប្រសិនបើកម្ពុជាត្រូវបាត់បង់ប្រព័ន្ធអនុគ្រោះពន្ធណាមួយមែននោះ។
លោក ហ៊ុន សែន បន្ដថា៖ «ទាក់ទងនឹងជំនួយបរទេសក៏ដូចគ្នា គឺលក្ខខណ្ឌសេដ្ឋកិច្ចរបស់កម្ពុជាកើនឡើង តម្រូវឲ្យគេដកថយជំនួយនោះដើម្បីយកទៅប្រគល់ទៅឲ្យប្រទេសដទៃ ដែលមិនមានលក្ខខណ្ឌអនុគ្រោះដូចយើង […] ភាពអនុគ្រោះទាំងឡាយត្រូវបានផ្ដល់ទៅប្រទេសអភិវឌ្ឍតិចតួចតែប៉ុណ្ណោះ ពេលដែលមានការកើនឡើងនៃសេដ្ឋកិច្ចនៃប្រទេសនោះ គឺគេនឹងដកថយដើម្បីផ្ទេរជំនួយនោះទៅកាន់ទីកន្លែងផ្សេងដែលមានការលំបាកជាងយើង»។
អ្នកជំនាញផ្នែកសេដ្ឋកិច្ច លោក យ៉ង ប៉ាក់ បានលើកឡើងថា ការព្រមានដកប្រព័ន្ធអនុគ្រោះពន្ធពីកម្ពុជា មួយផ្នែកអាចបណ្ដាលមកពីការធ្លាក់ចុះនៃបញ្ហាសិទ្ធិមនុស្សក្នុងប្រទេស ប៉ុន្ដែ មួយផ្នែកទៀត អាចបណ្ដាលមកពីសង្គ្រាមពាណិជ្ជកម្មរវាងចិន និងអាមេរិកផងដែរ។
លោក យ៉ង ប៉ាក់ បានព្រមានថា ការដកប្រព័ន្ធអនុគ្រោះពន្ធពីកម្ពុជា អាចបង្កផលប៉ះពាល់ធ្ងន់ធ្ងរដល់វិស័យកសិកម្ម និងវាយនភណ្ឌរបស់កម្ពុជា ដោយថា សហគមន៍អឺរ៉ុបជាទីផ្សារនាំចេញដ៏ធំសម្រាប់ផលិតផលកម្ពុជា។
លោកបន្ដថា៖ «វាមិនទាក់ទងនឹងរឿងគោរពសិទ្ធិមនុស្សតែមួយមុខទេ វាជាផ្នែកតូចមួយទេ។ អ្វីដែលខ្ញុំមើលឃើញ គឺរឿងសង្គ្រាមពាណិជ្ជកម្មរវាងអាមេរិក និងចិន។ ឲ្យតែទាំងពីរនាក់ហ្នឹងបន្ធូរដៃបន្ដិច យើងមិនមានបញ្ហាអីទេ។ ខ្ញុំបារម្ភតែមួយទេ គឺរបៀបគ្រប់គ្រងរបស់យើង តម្លាភាពនៃការគ្រប់គ្រងរបស់យើង វាធ្វើឲ្យមានបញ្ហាដែរឬអត់។ បើនិយាយពីទំនាក់ទំនងនយោបាយការទូត យើងចំណេញច្រើនជាង បើយើងគ្រប់គ្រងការទូតយើងបានល្អ»។
អ្នកជំនាញផ្នែកគោលនយោបាយ និងកិច្ចការពិភពលោកនៅមហាវិទ្យាល័យ Occidental សហរដ្ឋអាមេរិក លោក អ៊ា សុផល បានប្រាប់ថា ប្រទេសចិននឹងជួយកម្ពុជាឲ្យផុតពីវិបត្តសេដ្ឋកិច្ច ប្រសិនបើកម្ពុជាពិតជាទទួលរងការដាក់ទណ្ឌកម្មណាមួយមែននោះ។
ខណៈដែលអះអាងថា ការបាត់បង់ប្រព័ន្ធអនុគ្រោះពន្ធក៏នឹងជំរុញឲ្យរដ្ឋាភិបាលលោក ហ៊ុន សែន កាន់តែពឹងផ្អែកខ្លាំងទៅលើប្រទេសចិនកុម្មុយនីស្ដនោះ អ្នកជំនាញគោលនយោបាយរូបនេះ បានព្រមានថា កម្ពុជាអាចក្លាយជារដ្ឋអាណានិគមរបស់ប្រទេសនេះថែមទៀតផង។
លោក អ៊ា សុផល ប្រាប់ VOD តាមរយៈសារអេឡិចត្រូនិចថា៖ «កម្ពុជាបានក្លាយជារដ្ឋអាណានិគមរបស់ចិន ដូចដែលកម្ពុជាធ្លាប់បានធ្វើជាអាណានិគមជាមួយបារាំង និងវៀតណាម […] ពិតណាស់ កម្ពុជានឹងព្យាយាមរកប្រាក់ដើម្បីយកទៅឲ្យចិន»។
កាលពីខែដើមខែតុលា ឆ្នាំ២០១៨ សហគមន៍អឺរ៉ុបបានជូនដំណឹងដល់រដ្ឋាភិបាលអំពីការចាប់ផ្ដើមដំណើរការដកប្រព័ន្ធអនុគ្រោះ EBA ពីកម្ពុជា និងជំរុញឲ្យរដ្ឋាភិបាលកែលម្អបញ្ហាសិទ្ធិមនុស្សរបស់ខ្លួនដើម្បីបន្ដទទួលបានប្រព័ន្ធអនុគ្រោះពន្ធនេះ។
ទិន្នន័យរបស់ធនាគារពិភពលោក បានឲ្យដឹងថា កម្ពុជាបាននាំចេញទំនិញមានតម្លៃដល់ទៅ ៤ពាន់ ១២៦លានដុល្លារ ទៅកាន់ទីផ្សារអឺរ៉ុប ដែលភាគច្រើនលើសលប់ដល់ទៅ ៩៨.៨៤ភាគរយ គឺជាផលិតផលសម្រេចមានតម្លៃស្មើនឹង ៤.០៧៨ពាន់លានដុល្លារ។
ទិន្នន័យនោះក៏បានឲ្យដឹងទៀតថា ផលិតផលសម្រេចដែលកម្ពុជានាំចេញច្រើនទៅកាន់ទីផ្សារអឺរ៉ុប គឺជាផលិតផលកាត់ដេរសម្លៀកបំពាក់ និងស្បែកជើង ដែលមានតម្លៃដល់ទៅជាង ៣ពាន់ ៥៣១លានដុល្លារ ឬស្មើនឹង ៨៥.៥៨ភាគរយយ នៃតម្លៃទំនិញសរុបដែលកម្ពុជានាំចូលទីផ្សារអឺរ៉ុប៕