អាជ្ញាធរខេត្តត្បូងឃ្មុំ បានឃាត់ខ្លួនស្ត្រីម្នាក់ជាអ្នកលក់ម្ហូបអាហារនៅក្នុងបរិវេណសាលារៀនបឋមសិក្សាទន្លេបិទ ដើម្បីសួរនាំ បន្ទាប់ពីសិស្សានុសិស្ស ៤០នាក់ បានធ្លាក់ខ្លួនឈឺ និងត្រូវបានបញ្ជូនទៅសង្គ្រោះនៅមន្ទីរពេទ្យបង្អែកខេត្តនេះ។
មេឃុំទន្លេបិទ លោក ភឹន ឈុន បានប្រាប់វីអូឌីនៅថ្ងៃនេះថា កុមារាកុមារី ៤០នាក់ ដែលរៀននៅសាលាបឋមសិក្សាទន្លេបិទ បានធ្លាក់ខ្លួនឈឺ ក្អួតចង្អោ វិលមុខ និងអស់កម្លាំងទន់ដៃទន់ជើង ហើយត្រូវបានបញ្ជូនទៅសង្គ្រោះនៅមន្ទីរពេទ្យភ្លាមៗ បន្ទាប់ពីហូបបាយស្រូបរបស់ភិរយាគ្រូបង្រៀនម្នាក់ ដែលលក់ម្ហូបអាហារនៅក្នុងបរិវេណសាលារៀននោះ កាលពីសប្ដាហ៍មុន។
មេឃុំរូបនេះ បានឲ្យដឹងថា រហូតមកដល់ដើមសប្ដាហ៍នេះ កុមារទាំងនោះ ត្រូវបានបញ្ជូនត្រឡប់ទៅផ្ទះវិញអស់ហើយ ក្រោយពីសម្រាកព្យាបាលនៅមន្ទីរពេទ្យរយៈពេល ១ថ្ងៃ។
ដោយបដិសេធផ្ដល់ឈ្មោះស្ត្រីលក់ចំណីអាហារម្នាក់នោះ ប៉ុន្តែ មេឃុំរូបនេះបានឲ្យដឹងបន្ថែមថា សមត្ថកិច្ចបានសម្រេចដកហូតភេសជ្ជៈ និងចំណីអាហារពីតូបលក់របស់ស្ត្រីម្នាក់នោះហើយ ដើម្បីបញ្ជូនទៅស្ថាប័នជំនាញរាជធានីភ្នំពេញពិសោធន៍។
ក្រោយពីកើតហេតុ មេឃុំរូបនោះអះអាងថា សមត្ថកិច្ចបានឃាត់ខ្លួនអ្នកលក់បាយនោះបញ្ជូនទៅអធិការស្រុកត្បូងឃ្មុំ ដើម្បីសួរនាំជុំវិញករណីនេះ ប៉ុន្តែ លោកថា រហូតមកដល់ថ្ងៃទី១៩នេះ មិនដឹងថា សមត្ថកិច្ចដោះលែងវិញឬយ៉ាងណានៅឡើយ។
លោកមានប្រសាសន៍ថា៖ «ខាងជំនាញគេហៅអ្នកគ្រូសួរនាំ តែខ្ញុំអត់ទាន់បានសួរអភិបាលស្រុកដែរថា គេរកឃើញពុលដោយសារអ្វី អត់ទាន់ទេ»។
វីអូឌី មិនអាចសុំការបំភ្លឺពីអធិការស្រុកត្បូងឃ្មុំ លោក សួស ស៊ាងលី បានទេនៅថ្ងៃនេះ ដោយទូរសព្ទចូលមិនមានអ្នកទទួល។
ប្រធានមន្ទីរសុខាភិបាលខេត្តត្បូងឃ្មុំ លោក កែវ វណ្ណៈ បានឲ្យបង្ហាញមន្ទិលសង្ស័យថា កុមារទាំង ៤០នាក់នោះ ពុលចំណីអាហារ ប៉ុន្តែ លោកថា លោកមិនទាន់ទទួលបានលទ្ធផលពិសោធន៍នៅឡើយទេរហូតមកដល់ថ្ងៃនេះ ក្រោយពីសំណាកចំណីអាហារ ត្រូវបានបញ្ជូនទៅឲ្យថ្នាក់លើត្រួតពិនិត្យនោះ។
លោកមានប្រសាសន៍ថា៖ «អត់អីទេជាស្រួលអស់ហើយ ជំងឺខុសចំណីអាហារ ប៉ុន្តែ មិនដឹងថាម៉េចដែរ ខ្ញុំផ្ញើទៅក្រសួងហើយ ដើម្បីវិភាគ ហើយខាងកាំកុងត្រូលក៏គេវិភាគលើចំណីអាហារហ្នឹងដែរ ហើយលទ្ធផលមិនទាន់ដឹងទេ»។
ទីប្រឹក្សាអង្គការសេដាក លោក សម វិទូ បានព្រមានអំពីគ្រោះថ្នាក់នៃបន្លែផ្លែឈើគីមី និងកង្វះអនាម័យចំណីអាហារ ទៅលើសុខភាពរបស់មនុស្សគ្រប់វ័យ ជាពិសេសកុមារនៅតាមតំបន់ជនបទ។
លោក វិទូ បានអំពាវនាវទៅរដ្ឋាភិបាល និងស្ថាប័នពាក់ព័ន្ធ ឲ្យរឹតបន្តឹងការអនុវត្តច្បាប់លើការនាំចូលផលិតផលគីមី និងធ្វើការអប់រំប្រជាពលរដ្ឋឲ្យបានទូលំទូលាយជុំវិញការប្រើប្រាស់ថ្នាំគីមីនេះ ដោយថា ដើម្បីទប់ស្កាត់បញ្ហាប៉ះពាល់សុខភាពពលរដ្ឋ។
លោកអំពាវនាវថា៖ «ត្រូវមានការអន្តរាគមន៍ពីរដ្ឋាភិបាល ដើម្បីធ្វើការទប់ស្កាត់ ឬក៏ការត្រួតពិនិត្យទៅលើប្រភេទថ្នាំពុល ដើម្បីយកទៅកម្ទេចចោល ទាក់ទងបញ្ហាសុវត្ថិភាព ហើយទីពីរសុវត្ថិភាពទៅលើអ្នកបរិភោគ អ្នកទទួលទាននូវផលិតផលរបស់គាត់»។
កាលពីដើមឆ្នាំ២០១៧កន្លងមក កុមារាកុមារីកម្ពុជាជាង ៣០០នាក់ នៅឯស្រុកភ្នំក្រវ៉ាញ ខេត្តពោធិ៍សាត់ បានធ្លាក់ខ្លួនឈឺ និងត្រូវបានបញ្ជូនទៅសង្គ្រោះនៅមន្ទីរពេទ្យជាបន្តបន្ទាប់ បន្ទាប់ពីពួកគេបរិភោគចំណីអាហារដែលត្រូវបានក្រុមការងារគណបក្សប្រជាជនកម្ពុជានៅឃុំសំរោងចែកជូនពួកគេ។
សិស្សសាលាជាង ៥០នាក់ទៀត នៅឯអនុវិទ្យាល័យមួយក្នុងស្រុកស្ទោង ខេត្តកំពង់ធំ កាលពីថ្ងៃទី ០៥ វិច្ឆិកា ២០១៨ បានក្អួតចង្អោរ ទន់ដៃជើង ហើយក៏ត្រូវបានបញ្ជូនទៅសង្គ្រោះនៅមន្ទីរពេទ្យផងដែរ ក្រោយពីពួកគេបិរភោគអាហារដែលលក់នៅក្នុងសាលារៀននោះ៕
