មន្ត្រីយោធាជាន់ខ្ពស់កម្ពុជា បានឲ្យដឹងថា រុស្ស៊ីនឹងបង្ហាញឧទ្ធម្ភាគចក្រទំនើប ២គ្រឿងនៅកម្ពុជានៅថ្ងៃស្អែកនេះ ដោយថា ដើម្បីផ្សព្វផ្សាយឲ្យរដ្ឋាភិបាលកម្ពុជាពិចារណាទិញទៅប្រើប្រាស់សម្រាប់ដឹកជញ្ជូនអ្នកដំណើរ ឬក៏សម្ភារៈយោធា។
អ្នកនាំពាក្យកងទ័ពជើងអាកាសកម្ពុជា លោក ប្រាក់ សុខា បានប្រាប់វីអូឌីនៅថ្ងៃនេះថា ឧទ្ធម្ភាគចក្ររុស្ស៊ី ២គ្រឿង ដែលផលិតឡើងនៅឆ្នាំ២០១៨នេះ ត្រូវបាននាំមកដល់ប្រទេសកម្ពុជានៅថ្ងៃនេះ ដើម្បីដាក់តាំងបង្ហាញនៅថ្ងៃទី២០ ខែវិច្ឆិកានេះ។ លោកបានបន្ថែមថា ឧទ្ធម្ភាគចក្រទាំង ២គ្រឿងនេះ ត្រូវបានប្រទេសរុស្ស៊ីនាំយកមកបង្ហាញនៅមូលដ្ឋានកងទ័ពជើងអាកាសនៅរាជធានីភ្នំពេញ ដើម្បីឲ្យកម្ពុជាពិចារណាទិញយកទៅប្រើប្រាស់។
មន្ត្រីយោធាកម្ពុជារូបនេះ បានឲ្យដឹងថា ឧទ្ធម្ភាគចក្រមួយគ្រឿងជាប្រភេទសម្រាប់ដឹកជញ្ជូនភ្ញៀវទេសចរ និងមួយគ្រឿងទៀតសម្រាប់ដឹកជញ្ជូនសម្ភារៈយោធា ប៉ុន្តែ លោកបដិសេធផ្ដល់ព័ត៌មានលម្អិតអំពីលក្ខណៈសម្បត្តិនៃឧទ្ធម្ភាគចក្រទាំង ២គ្រឿងនោះ។
លោក ប្រាក់ សុខា បានបញ្ជាក់ថា រដ្ឋាភិបាលកម្ពុជានឹងពិនិត្យពីលក្ខណៈពិសេស និងគុណសម្បត្តិជាមុនសិន មុននឹងសម្រេចទិញយកទៅប្រើប្រាស់ ឬក៏មិនទិញ។
អ្នកនាំពាក្យរូបនេះ បានអះអាងថា ការតាំងបង្ហាញឧទ្ធម្ភាគចក្រទាំង ២គ្រឿងនោះ គឺជាផ្នែកមួយនៃការផ្សព្វផ្សាយរបស់រុស្ស៊ីទៅកាន់ប្រទេសនានា ឲ្យដឹងអំពីបច្ចេកវិទ្យាអាកាសចរណ៍ដ៏ទំនើបរបស់ខ្លួន។
កាលពីដើមឆ្នាំ២០១៨នេះ លោកនាយករដ្ឋមន្ត្រី ហ៊ុន សែន បានជំរុញទៅឧកញ៉ាធំៗនៅកម្ពុជា ឲ្យទិញឧទ្ធម្ភាគចក្រប្រើប្រាស់ ដោយថា ដើម្បីបញ្ចៀសការកកស្ទះចរាចរណ៍។
យោធាកម្ពុជាបានសម្រេចទិញឧទ្ធម្ភាគចក្រចិនធុន Z-៩ ចំនួន ១២គ្រឿងកាលពី២០១៣កន្លងមក តាមរយៈប្រាក់កម្ចីរបស់ចិនទំហំ ១៩៥លានដុល្លារកាលពីឆ្នាំ២០១១។ ឧទ្ធម្ភាគចក្រមួយគ្រឿងក្នុងចំណោមទាំង ១២គ្រឿងនោះ បានធ្លាក់កាលពីខែកក្កដា ឆ្នាំ២០១៤ នៅឯជាយរាជធានីភ្នំពេញ ដោយបានសម្លាប់ទាហានជើងអាកាស ៤នាក់ និងរបួយម្នាក់។
របាយការណ៍សង្ខេបរបស់ក្រសួងសេដ្ឋកិច្ច និងហិរញ្ញវត្ថុ បានឲ្យដឹងថា រដ្ឋាភិបាលកម្ពុជាគ្រោងបង្កើនកញ្ចប់ថវិកាជាតិដល់ទៅចំនួនប្រហែល ៦០០លានសម្រាប់វិស័យការពារជាតិនៅឆ្នាំ២០១៩ខាងមុខនេះ ដោយបានកើនឡើងដល់ទៅ ១៣៧ភាគរយ បើធៀបនឹងទំហំចំណាយលើវិស័យការពាររបស់កម្ពុជាកាលពីឆ្នាំ២០១៣កន្លងមក៕
