មន្ត្រីតុលាការខេត្តតាកែវ បានឲ្យដឹងថា តុលាការខេត្តនេះ នៅមិនទាន់មានចំណាត់ការទៅលើម្ចាស់ស្ថានីយ៍ប្រេងឥន្ធនៈចំនួន ១៤កន្លែងនៅឡើយទេ បន្ទាប់ពីមន្ត្រីកាំកុងត្រូលបានរកឃើញថា ម្ចាស់ស្ថានីយ៍ប្រេងទាំងនោះ បានលក់ប្រេងមិនគ្រប់បរិមាណ និងគុណភាព។
អ្នកនាំពាក្យសាលាដំបូងខេត្តតាកែវ លោក ផាន់ សុភ័ក្រ បានប្រាប់វីអូឌីនៅរសៀលថ្ងៃនេះថា កាលពីម្សិលមិញ សាខាកាំកុងត្រូលខេត្តតាកែវបានបញ្ជូនសំណុំរឿងកេងបន្លំប្រេងសាំងនៃស្ថានីយប្រេងដែលកាំកុងត្រូលពិនិត្យឃើញថា បានលក់ប្រេងមិនគ្រប់បរិមាណ និងគុណភាពមកកាន់តុលាការខេត្តរួចហើយ ប៉ុន្តែ លោកថា តុលាការខេត្តនេះ នៅមិនទាន់មានចំណាត់ការនៅឡើយ ដោយរង់ចាំការបែងចែកពីប្រធានអយ្យការខេត្តសិន។
លោកថា៖ «អត់ទាន់ទេ(ឃាត់ខ្លួន)គេស៊ើបអង្កេតសិន! ព្រោះបទល្មើសអត់ជាក់ស្ដែង យើងអត់អាចឃាត់ខ្លួនបានភ្លាមទេ»។
កាលពីសប្ដាហ៍មុន សាខាកាំកុងត្រូលខេត្តតាកែវ បានរកឃើញស្ថានីយ៍ប្រេង និងដេប៉ូសាំងចំនួន ១៤កន្លែង ដែលមានទីតាំងនៅក្នុងក្រុងដូនកែវ ស្រុកបាទី និងស្រុកត្រាំកក់ បានលក់ប្រេងសាំងមិនអនុលោមតាមគុណភាព និងបរិមាណ។
មាត្រា៤៥ នៃច្បាប់ស្ដីពីមាត្រាសាស្ត្រកម្ពុជា ចែងថា ជនណាដែលបង្កើន បន្ថយ ឬបន្លំទម្ងន់ ឬរង្វាស់រង្វាល់នៃឧបករណ៍មាត្រាសាស្ត្រដែលបានដាក់សញ្ញាត្រួតពិនិត្យរួច ត្រូវផ្តន្ទាទោសដាក់ពន្ធនាគារពី ៦ថ្ងៃដល់ ១ខែ ឬផាកពិន័យពី ១លានដល់ ៥លានរៀល៕