មេដឹកនាំបក្សកាន់អំណាច លោក ហ៊ុន សែន បានបង្ហើបពីយុទ្ធសាស្ត្រនយោបាយ «រុញទូកបណ្តោយទឹក» ដែលលោកថា ដើម្បីទៅដល់គោលដៅដែលបានប្រមើលទុក។
សារនយោបាយនេះ គាប់ជួនសហរដ្ឋអាមេរិក និងសភាពអឺរ៉ុប បាននាំមុខគេជំរុញម្តងហើយម្តងទៀត ឲ្យដោះលែងអតីតមេដឹកនាំបក្សប្រឆាំងលោក កឹម សុខា បើកផ្លូវឲ្យគណបក្សសង្គ្រោះជាតិ ដែលរំលាយកាលពីចុងឆ្នាំមុន បានដំណើរឡើងវិញ ជាថ្នូរនឹងការរក្សាទុកអំណោយផលផ្នែកពាណិជ្ជកម្ម និងទំនាក់ទំនងល្អជាមួយកម្ពុជា។
មុនពិធីបុណ្យអុំទូកមួយថ្ងៃ ពោលគឺនៅថ្ងៃអង្គារម្សិលមិញនេះ លោក ហ៊ុន សែន បានសរសេរលើហ្វេសប៊ុករបស់លោកថា៖
«មានកាលៈទេសៈច្រើនណាស់នៅក្នុងជីវិតដឹកនាំ ដែលយើងត្រូវប្រើវិធីសាស្រ្តរុញទូកបណ្ដោយទឹក។ ប៉ុន្តែមានកត្តា២ ដែលក្មួយៗចៅៗត្រូវដឹង ទី១ តើពេលណា ត្រូវរុញបណ្ដោយទឹក ? ហើយតើពេលណាត្រូវចាំសិន ទម្រាំខ្សែទឹកឡើងគ្រប់ល្បឿន។ ? ទី២ ទោះជារុញទូកបណ្ដោយទឹកក្តី តែចង្កូត យើងជាអ្នកកាន់ ហើយត្រូវកាន់ឱ្យជាប់ និងមានទស្សនវិស័យវែងឆ្ងាយ ដើម្បីបត់បែនទូកឱ្យទៅដល់គោលដៅដែលបានប្រមើលទុកជាមុន»។
មេដឹកនាំរូបនេះ ក្រើនរំឭកទៀតថា ពេលវេលាជាឱកាស មនុស្សឆ្លាតចេះមើលឱកាស ចេះប្រើឱកាស និងចេះបង្តើតឱកាស។ លោកថា បើរុញទូកបណ្ដោយទឹកពេលទឹកឡើងខ្លាំង ឬព្យុះភ្លៀង ទូកនឹងលិច។
អតីតតំណាងរាស្ត្រគណបក្សប្រឆាំងលោក អ៊ូ ច័ន្ទរ័ត្ន វិភាគលើសារនយោបាយនេះថា បក្សកាន់អំណាច អាចទទួលយកការជំរុញរបស់អន្តរជាតិ ដើម្បីកាត់បន្ថយសម្ពាធ។
លោកថា៖ «ជាជំហានមួយល្អ ត្រង់ថាយើងបានអាចផ្សះផ្សាជាតិឡើងវិញ បង្រួបបង្រួមជាតិឡើងវិញ ហើយបើសិនគណបក្សប្រឆាំងអាចមានយុទ្ធសាស្ត្រ ឬគោលនយោបាយល្អ ដើម្បីទាក់ទាញ ហើយរៀបចំធ្វើច្បាប់ធ្វើទម្លាប់អី ដើម្បីការពារហើយកសាងទំនុកចិត្តរវាងខ្មែរនិងខ្មែរទៅថ្ងៃក្រោយ អាចនឹងមានការផ្លាស់ប្តូរ អាចគណបក្សផ្សេងមកកាន់អំណាចហើយ។ អាហ្នឹង យើងឃើញថា ជាប្រយោជន៍នៅពេលក្រោយ»។
លោក អ៊ូ ច័ន្ទរ័ត្ត វិភាគទៀតថា តាមរយៈសារនយោបាយនេះ លោក កឹម សុខា អាចនឹងត្រូវដោះលែងឆាប់ៗ នឹងមានការផ្សះផ្សាជាតិឡើងវិញ ប៉ុន្តែថាសារនេះ ក៏បានបង្ហាញថា មេដឹកនាំបក្សកាន់អំណាចនៅតែមានមហិច្ឆិតា បន្តគ្រប់គ្រងអំណាចដដែល។
អ្នកវិភាគនយោបាយលោក បណ្ឌិត មាស នី វិភាគថា សារនយោបាយនេះ បានកើតឡើងក្រោយពីលោក ហ៊ុន សែន និងលោក សម រង្ស៊ី បបួលគ្នាភ្នាល់ ពីលទ្ធភាពដោះលែង ឬមិនដោះលោក កឹម សុខា ។ លោកថា ល្បែងភ្នាក់នេះ កំពុងជំរុញលោក ហ៊ុន សែន និងលោក សម រង្ស៊ី ជួបហានិភ័យដូចគ្នា។
បើតាមលោក មាស នី ហានិភ័យរបស់លោក ហ៊ុន សែន បើមិនដោះលែងលោក កឹម សុខា ប្រឈមទៅនឹងសម្ពាធអន្តរជាតិ តាំងពីពេលនេះ រហូតថ្ងៃខាងមុខ ។
ចំណែកលោក សម រង្ស៊ី ប្រឈមនឹងបែកបាក់ផ្ទៃក្នុងកាន់តែខ្លាំងបើគ្មានភាពវ័យឆ្លាត ដោយថា ក្រោយបង្កើតល្បែងភ្នាល់ជាមួយលោក ហ៊ុន សែន អ្នកគាំទ្រកំពុងវាយប្រហារគ្នាទៅវិញទៅមក។ លោកវិភាគទៀតថា ភាពមិនរឹងមាំផ្ទៃក្នុងនេះ ជាឱកាសដៃគូប្រកួតប្រើវិធីសាស្ត្រ ពុះបំបែកផ្ទៃក្នុងបាន។
លោកថា៖ «ខ្ញុំមើលទៅអាចចេញច្រកហ្នឹង។ បើគណបក្សសង្គ្រោះជាតិមិនឆ្លាតអាចចូលអន្ទាក់របស់គណបក្សប្រជាជន ដែលគេចង់ឲ្យពីរនាក់ហ្នឹង [លោក កឹម សុខា និង លោក សម រង្ស៊ី ]បែកគ្នាតាំងពីដើមមក ហើយបើយើងមើលប៉ុន្មានថ្ងៃនេះ ប្រព័ន្ធផ្សព្វផ្សាយ ដូចជាខាងដើមអំពិល និងខាង Fresh News អីក៏កំពុងតែលើកយករឿង ហ្នឹងមកនិយាយ ម្តងហើយម្តងទៀតដែរ ដើម្បីឲ្យភាពប្រះឆា រវាងអ្នទាំងពីរហ្នឹងកាន់តែធំទៅៗ»។
ជម្លោះនយោបាយនៅកម្ពុជានេះ បានជំរុញឲ្យប្លុកលោកសេរី មានសហរដ្ឋអាមេរិក និងសហភាពអឺរ៉ុបជាដើម ប្រកាសមិនទទួលស្គាល់លទ្ធផលបោះឆ្នោតថ្ងៃទី២៩ ខែកក្កដា ឆ្នាំ២០១៨ ដែលគ្មានបក្សប្រឆាំងចូលរួម។
ពួកគេបានគំរាមពង្រីកវិធានការបង្កកទ្រព្យសម្បត្តិ និងដាក់ទណ្ឌកម្មទិដ្ឋាការ ដល់មន្ត្រីរដ្ឋាភិបាលមួយចំនួនទៀត រួមទាំងប្រព័ន្ធអនុគ្រោះពន្ធ ដែលមានទឹកប្រាក់ជិត៧០០លានដុល្លារក្នុង១ឆ្នាំៗ។
កាលពីម្សិលមិញ ឯកអគ្គរដ្ឋទូតសហរដ្ឋអាមេរិកចប់អាណត្តិលោក William A. Heidt បានចូលជួបលាលោក ហ៊ុន សែន នៅវិមានសន្តិភាព ក្នុងរាជធានីភ្នំពេញ បានជំរុញជាថ្មីទៀត ឲ្យដោះលែងលោក កឹម សុខា បញ្ចប់ការហាមប្រាមគណបក្សប្រឆាំង វិលទៅផ្សះផ្សាជាតិឡើងវិញ បន្ធូរបន្ថយការរឹតត្បិតលើសង្គមស៊ីវិល និងប្រព័ន្ធផ្សព្វផ្សាយ ដោយថា ដើម្បីជំរុញដល់ភាពប្រសើរឡើងវិញនៃទំនាក់ទំនងកម្ពុជា អាមេរិក ទៅថ្ងៃអនាគត។
យ៉ាងនេះក្តីសារនយោបាយរបស់លោក ហ៊ុន សែន បានបញ្ជាក់ថា បើទាក់ទងនឹងអធិបតេយ្យភាព បូរណភាពទឹកដីកម្ពុជា និងសុខសន្តិភាពរបស់ប្រជាជនខ្មែរ លោកថាកុំថាឡើយរុញទូកបណ្ដោយទឹក ទោះត្រូវអូសរថក្រោះឡើងភ្នំ ក៏ត្រូវតែធ្វើដែរ។
ចំណុចដែលបង្ហាញភាពធូរស្រាលរវាងអាមេរិកនិងកម្ពុជានៅមួយរយៈចុងក្រោយនេះគឺ កម្ពុជាព្រមឲ្យបន្តរកអដ្ឋិធាតុយោធាអាមេរិកលើទឹកដីរបស់ខ្លួនវិញ បន្ទាប់ពីផ្អាកមួយរយៈ។ ចំណុចមួយទៀតកាលពីថ្ងៃចន្ទ ដើមសប្តាហ៍នេះលោក ហ៊ុន សែនបញ្ជាក់ថា លោកនឹងសរសេរលិខិតមួយដើម្បីពន្យល់ថ្នាក់ដឹកនាំអាមេរិកថា មិនមានវត្តមានកងទ័ពចិននៅលើទឹកដីក ម្ពុជានោះទេ។