រដ្ឋាភិបាលថ្មីរបស់ប្រទេសម៉ាល់ឌីវ ថានឹងដកខ្លួនចេញពីកិច្ចព្រមព្រៀងពាណិជ្ជកម្មសេរី ដែលប្រទេសនេះបានធ្វើជាមួយចិននាពេលកន្លងមក។
លោក Mohamed Nasheed ទីប្រឹក្សាប្រធានាធិបតីថ្មីប្រទេសម៉ាល់ឌីវ ប្រាប់ទីភ្នាក់ងារសារព័ត៌មានរ៉យទ័រថា កិច្ចព្រមព្រៀងពាណិជ្ជកម្មសេរីរវាងកោះម៉ាល់ឌីវជាមួយចិនមានវិសមភាពយ៉ាងខ្លាំង ដែលគ្មាននរណាគេជឿថាមានកិច្ចព្រមព្រៀងបែបនេះនោះទេ។ លោក Mohamed Nasheed ប្រាប់ប្រភពដដែលថា ចិនមិនបានទិញអ្វីពីកោះម៉ាល់ឌីវទេ។ លោកបន្ថែមថាវាជាកិច្ចព្រមព្រៀងតែម្ខាងប៉ុណ្ណោះ។
កាលពីខែចុងខែកញ្ញា ឆ្នាំ២០១៨ ក្រោយពីអតីតប្រធានាធិបតីលោក Abdullah Yameen បានចាញ់ឆ្នោត លោក Mohamed Nasheed បានប្រកាសថារដ្ឋាភិបាលរបស់លោក Ibrahim Mohamed Solih នឹងធ្វើការពិនិត្យនូវគម្រោងវិនិយោគមួយចំនួនរបស់ចិន ដែលធ្វើឡើងជាមួយប្រទេសកោះមួយនេះឡើងវិញ។ ទោះជាយ៉ាងណាក៏ដោយ រដ្ឋាភិបាលថ្មីម៉ាលឌីវ ថាគ្មានផែនការបញ្ឈប់ឬផ្អាកគម្រោងវិនិយោគផ្សេងៗដូចជាគម្រោងពង្រីកអាកាសយានដ្ឋាន ដែលផ្ដល់ឲ្យក្រុមហ៊ុនចិននោះទេ។
កិច្ចព្រមព្រៀងពាណិជ្ជកម្មសេរីរវាងកោះម៉ាល់ឌីវ និងចិន ត្រូវបានចុះហត្ថលេខាដោយអតីតប្រធានាធិបតីម៉ាល់ឌីវ លោក Abdullah Yameen ក្នុងអំឡុងពេលបំពេញទស្សនកិច្ចទៅរដ្ឋធានីប៉េកាំង កាលពីខែធ្នូ ឆ្នាំ២០១៧កន្លងទៅ។ រដ្ឋភិបាលលោក Abdullah Yameen បានសច្ចាប័នលើកិច្ចព្រមព្រៀងនេះយ៉ាងប្រញាប់ប្រញាល់បំផុត ពោលគឺអនុម័តដោយគ្មានការដេញដោលគ្នាក្នុងសភា ហើយប្រើពេលមិនដល់មួយម៉ោងផង ក្នុងការពិនិត្យលើកិច្ចព្រមព្រៀងដែលមានកម្រាស់រហូតដល់១០០០ទំព័រនេះ។ ក្រុមអតីតបក្សប្រឆាំង ដែលកាលនោះដឹកនាំដោយលោក Ibrahim Mohamed Solih បានធ្វើការជំទាស់ និងរិះគន់យ៉ាងខ្លាំងលើកិច្ចព្រមព្រៀងនោះ ។
អ្នកនាំពាក្យក្រសួងការបរទេសចិន លោក Geng Shuang បានច្រាលចោទការប្រកាន់ដែលធ្វើឡើងដោយភាគីកោះម៉ាល់ឌីវ។ ក្នុងសន្និសីទសារព័ត៌មានកាលពីម្សិលមិញ លោក Geng Shuang បានលើកឡើងថាពីីកិច្ចព្រមព្រៀងពាណិជ្ជកម្មសេរីជាមួយកោះម៉ាល់ឌីវ គឺធ្វើឡើងដោយស្មើភាព ហើយភាគីទាំងសងខាងទទូលបានផលប្រយោជន៍ពីគ្នាទៅវិញទៅមក។ លោក ក៏បានអំពាវនាវឲ្យរដ្ឋាភិបាលកោះម៉ាល់ឌីវ ធ្វើការសម្រេចចិត្តឲ្យបានត្រឹមត្រូវផងដែរ។
សាស្រ្តាចារ្យរងនៃសាកលវិទ្យាល័យ China West Normal University លោកLong Xingchun បានប្រាប់សារព័ត៌មាន Global Times របស់ចិនថា វាជារឿងធម្មតា នៅពេលដែលប្រទេសមួយផ្លាស់ប្តូរមេដឹក ប្រទេសនោះតែងតែផ្លាស់គោលនយោបាយការបរទេស។ លោក Long Xingchun យល់យ៉ាងណាក៏ដោយ រដ្ឋាភិបាលថ្មីម៉ាល់ឌីវ នៅតែត្រូវការចិន ដើម្បីការរីកចម្រើនផ្នែកសេដ្ឋកិច្ចរបស់ខ្លួន។ សាស្រ្តាចារ្យរូបនេះ បន្តថាចំពោះការធ្វើពាណិជ្ជកម្ម គឺចិននាំទៅកាន់ប្រទេសម៉ាល់ឌីវ តែទំនិញណាដែលម៉ាល់ឌីវ ផលិតមិនបានតែប៉ុណ្ណោះ។
តាមការចុះផ្សាយរបស់ទីភ្នាក់ងារសារព័ត៌មានរ៉យទ័រក្នុងរយៈពេល៨ខែ ឆ្នាំ២០១៨នេះ ម៉ាល់ឌីវ បាននាំទំនិញចូលពីចិនមានតម្លៃជាទឹកប្រាក់សរុប៣៤២លានដុល្លារ តែទំហំទឹកប្រាក់ដែលម៉ាល់ឌីវ នាំចេញទៅចិន មានតែជាង២៦ម៉ឺនដុល្លាតែប៉ុណ្ណោះ។
រដ្ឋាភិបាលក្រុងប៉េកាំង បានផ្ដល់ជាជំនួយ និងវិនិយោគលើគម្រោងនានាជាច្រើននៅក្នុងប្រទេសម៉ាល់ឌីវ ដែលជាផ្នែកមួយនៃគម្រោងគំនិតផ្ដួចផ្ដើម«ខ្សែក្រវ៉ាត់និងផ្លូវ» របស់ខ្លួន។ ជាក់ស្ដែង ចិន បានផ្ដល់ជាជំនួយឥតសំណង និងកម្ចីមានការប្រាក់ទាបដល់ម៉ាល់ឌីវ ជាង១៨៤ លាន ដើម្បីសាងសង់ស្ពានភ្ជាប់កោះពីររបស់ប្រទេសដែនកោះមួយនេះដែលដាក់ឲ្យប្រើប្រាស់កាលពីចុងខែសីហា ឆ្នាំ២០១៨កន្លងមកនេះ ៕