លោកនាយករដ្ឋមន្ត្រី ហ៊ុន សែន បានទូលថ្វាយទៅព្រះមហាក្សត្រស្នើសុំតែងតាំងមន្ត្រី១៤រូបជាក្រុមប្រឹក្សា និងជា ទីប្រឹក្សាអមក្រុមប្រឹក្សាភិបាលមជ្ឈមណ្ឌល សកម្មភាពកំចាត់មីន ក្នុងនោះក៏មានកូនប្រុសទី២របស់លោកដែល មានឋានៈស្មើរដ្ឋមន្ត្រី។
ក្នុងព្រះរាជក្រឹត្យចុះហត្ថលេខាដោយប្រមុខរដ្ឋស្ដីទី លោក ប៊ិន ឈិន កាលថ្ងៃទី១២ ខែវិច្ឆិកា កន្លងមកនេះ បានសម្រេចដំឡើងឋានៈដល់លោក ហ៊ុន ម៉ានិត ជាសមាសភាពក្រុមប្រឹក្សាភិបាលដែលមានឋានៈស្មើរដ្ឋមន្រ្តី។ ការដំឡើងឋានៈនេះ ធ្វើឡើងតាមសំណើរបស់លោក ហ៊ុន សែន។
លោក ហ៊ុន ម៉ានិត បច្ចុប្បន្នកំពុងតែកាន់តំណែងបីសំខាន់ទៀតគឺជាអគ្គនាយក នៃអគ្គនាយកដ្ឋានស្រាវជ្រាវចារកិច្ចនៃក្រសួងការពារជាតិ និងជានាយករងខុទ្ទកាល័យលោកនាយករដ្ឋមន្រ្តី និងជាអនុប្រធានគណៈកម្មាធិការត្រួតពិនិត្យ នៃគណៈកម្មាធិការកណ្ដាលនៃគណបក្សកាន់អំណាច។