មេដឹកនាំសហជីពចំនួន៦រូប ត្រូវចូលរួមសវនាការ នៅសាលាដំបូងរាជធានីភ្នំពេញ នៅព្រឹកថ្ងៃទី៧ ខែធ្នូ ឆ្នាំ២០១៨ ជុំវិញសំណុំរឿងអំពើហិង្សាមួយនៅតំបន់វ៉េងស្រេងកាលពីឆ្នាំ២០១៣ និង២០១៤។ នេះបើតាមលិខិតអញ្ជើញរបស់តុលាការផ្ងើទៅកាន់មេធាវីការពារក្តី ដែលវីអូឌីទើបទទួលបាន។
បើតាមលិខិតតុលាការ មេដឹកនាំសហជីពចំនួន៦រូប រួមមាន លោក អាត់ ធន់ លោក ម៉ម ញឹម លោក ប៉ាវ ស៊ីណា លោក ជា មុនី លោក រ៉ុង ឈុន និងលោកស្រី យ៉ាង សោភ័ណ្ឌ។ ហើយ អ្នកទាំងអស់ ត្រូវបានចោទប្រកាន់ពាក់ព័ន្ធរឿងសំខាន់ៗ ដែលថាបានប្រព្រឹត្តិហិង្សា និងបានបង្កការខូចខាតនានា ដែលកើតឡើងនៅមុខសួនឧស្សាហកម្មកាណាឌីយ៉ាល់ ផ្លូវវ៉េងស្រេង កាលពីអំឡុងថ្ងៃទី២៥ ខែធ្នូ ឆ្នាំ២០១៣ រហូតដល់ថ្ងៃទី១៣ ខែមករា ឆ្នាំ២០១៤។
ដំណើរការក្តីរបស់សាលាដំបូងរាជធានីភ្នំពេញនៅពេលនេះ ត្រូវបានគេមើលឃើញថា ធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន កាលពីសប្តាហ៍កន្លងទៅ បានស្នើឱ្យស្ថាប័នពាក់ព័ន្ធរបស់រដ្ឋាភិបាលទាំងអស់ ត្រូវបញ្ចប់រឿងក្ដីទាំងឡាយ ជាមួយមេដឹកនាំសហជីពនៅក្នុងឆ្នាំ២០១៨៕
