ក្រុមអ្នកឃ្លាំមើលសិទ្ធិមនុស្ស វាយតម្លៃថា ទិវាសិទ្ធិមនុស្សអន្តរជាតិ១០ធ្នូ បិទបញ្ចប់ទៅក្រោមការរឹតត្បិត ទោះបីរដ្ឋាភិបាលប្រកាសឲ្យឈប់រឹតត្បិតសកម្មភាព របស់អង្គការសង្គមស៊ីវិលក៏ដោយ។
សមាគមអាដហុកការពារសិទ្ធិមនុស្សឲ្យដឹងតាមសេចក្តីប្រកាសចុះថ្ងៃចន្ទម្សិលមិញ ថាក្រុមអង្គការសង្គមស៊ីវិលដែលរៀបចំទិវាសិទ្ធិមនុស្ស ១០ធ្នូ ឆ្នាំ២០១៨ នៅទីលានប្រជាធិបតេយ្យ តាមបណ្តោយផ្លូវជាតិលេខ៥ ខណ្ឌឫស្សីកែវ រាជធានីភ្នំពេញ បានបញ្ចប់ដោយបរិយាកាសរឹតត្បិតសេរីភាពនៃការជួបជុំប្រមូលផ្តុំ និងក្រោមការឃ្លាំមើលយ៉ាងតឹងតែងពីសំណាក់អាជ្ញាធររដ្ឋាភិបាល។
អាដហុកឲ្យដឹងទៀតថា សាលារាជធានីភ្នំពេញ មិនអនុញាតឲ្យក្រុមអង្គការសង្គមស៊ីវិលដែលរៀបចំទិវានេះ នៅសួនច្បារ ក្រុមប្រឹក្សាអភិវឌ្ឍន៍កម្ពុជា CDC និងហាមមិនអោយហែរក្បួនចេញពីបរិវេណទីលានប្រជាធិបតេយ្យ ព្រមទាំងដាក់ពង្រាយកម្លាំងសមត្ថកិច្ចរាប់រយនាក់ឈរព័ទ្ធជុំវិញឃាមឃាត់ដាច់ខាតមិនឲ្យអ្នកចូលរួមហែរក្បួនចេញពីទីលានប្រជាធិបតេយ្យនោះទៀតផង។
ចំណែកអង្គការលីកាដូបានកត់សម្គាល់ដែរថា សាលារាជធានីភ្នំពេញបានពង្រាយកងកម្លាំងប្រដាប់អាវុធដែលមានពាក់មួកការពារសុវត្ថិភាពច្រើនជាងអ្នកចូលរួមធ្វើពិធីអបអរទិវាសិទ្ធិមនុស្សអន្តរជាតិ១០ធ្នូនេះ ទោះបីថ្មីៗនេះ រដ្ឋាភិបាលបានប្រកាសឲ្យឈប់រឹតត្បិតលើក្រុមសង្គមស៊ីវិលក្ដី ។ លីកាដូ ឲ្យដឹងទៀតថា សាលារាជធានីភ្នំពេញបានព្រមានចាត់វិធានការផ្លូវច្បាប់ ប្រសិនបើអ្នករៀបចំកម្មវិធីនៅតែធ្វើការហែក្បួនដែលអាច ប៉ះពាល់ដល់សន្តិសុខ សុវត្ថិភាព សណ្ដាប់ធ្នាប់ និងរបៀបរៀបរយសាធារណៈ ទោះបីជាថ្ងៃទី១០ ខែធ្នូនេះជាថ្ងៃឈប់សម្រាក ដែលមិនសូវមានប្រជាពលរដ្ឋធ្វើដំណើរតាមដងផ្លូវក្នុងរាជធានីក៏ដោយ។
បើតាមលីកាដូ អ្នកមកចូលរួមធ្វើពិធីអបអរទិវាសិទ្ធិមនុស្សអន្តរជាតិ១០ធ្នូ មានកម្មកររោងចក្រកាត់ដេរកសិករគ្រូបង្រៀន សហជីព តំណាងសហគមន៍ និងក្រុមយុវជន រាប់រយនាក់ ។
ប៉ុន្តែ អង្គការនេះថាក្រុមយុវជននិងសហគមន៍ ដែលប្រារព្វពិធីនេះនៅខេត្តរតនគិរីត្រូវបាន ធ្វើទុក្ខបុកម្នេញជាបន្តបន្ទាប់ ពីសំណាក់ការិយាល័យសាលាខេត្ត ចំណែកនៅខេត្តបន្ទាយមានជ័យ អាជ្ញាធរបានបញ្ឈប់ប្រជាពលរដ្ឋប្រមាណជាង៣០០នាក់ មកពីសហគមន៍ចំនួន៦ ពីការជួបជុំគ្នានៅក្រុងសិរីសោភ័ណ ហើយថា អ្នកទាំងនេះ ត្រូវបានហាមឃាត់មិនឱ្យចាកចេញពីភូមិ និងត្រូវបានបញ្ឈប់នៅតាមផ្លូវធ្វើដំណើរ ដោយតម្រូវឲ្យមានលិខិតអនុញ្ញាតពីអាជ្ញាធរស្រុក និងខេត្ត ទើបអាចចូលរួមប្រារព្ធទិវានេះបាន៕
