មេដឹកនាំសហជីពមួយរូបដែលត្រូវបានចាប់ខ្លួនពីប្រទេសថៃនោះ ត្រូវបានតុលាការសម្រេចចោទប្រកាន់ពីផ្លូវការនៅល្ងាចថ្ងៃនេះ។ នេះបើតាមការបញ្ជាក់របស់អ្នកនាំពាក្យតុលាការរាជធានីភ្នំពេញ។
អ្នកនាំពាក្យសាលាដំបូងរាជធានីភ្នំពេញ លោក លី សុផាណា បានថ្លែងតាមតេឡាក្រាមនៅល្ងាចថ្ងៃនេះថា លោក រ៉ាត់ រដ្ឋមុនី ដែលជាប្រធានសហជីពកម្មករសំណង់ ត្រូវបានចៅក្រមស៊ើបសួរចោទប្រកាន់ពីបទញុះញង់ឲ្យមានការរើសអើងតាមមាត្រា ៤៩៦នៃក្រមព្រហ្មទណ្ឌ។
អ្នកនាំពាក្យរូបនេះបន្ថែមថា មេដឹកនាំសហជីពរូបនេះ ត្រូវបានតុលាការសម្រេចឃុំខ្លួនបណ្ដោះអាសន្ន ក្រោយពីត្រូវបានចោទប្រកាន់ជាផ្លូវការហើយនោះ។
អ្នកស្រី ឡុង គឹមហ៊ាង ភរិយារបស់លោក រដ្ឋមុនី បានប្រាប់វីអូឌីនៅថ្ងៃនេះថា ស្វាមីរបស់អ្នកស្រីត្រូវបានតុលាការសាកសួរដោយពុំមានមេធាវីផ្ទាល់ខ្លួននោះឡើយ ហើយតុលាការបានចាត់តាំងមេធាវីម្នាក់សម្រាប់ផ្ដល់ជំនួយផ្នែកច្បាប់នៅរសៀលថ្ងៃនេះ។
លោក រ៉ាត់ រដ្ឋមុនី ត្រូវបានប៉ូលិសថៃចាប់ខ្លួនកាលពីថ្ងៃទី៧ ខែធ្នូ ឆ្នាំ២០១៨ នៅក្នុងទីក្រុងបាកក តាមសំណើរបស់រដ្ឋាភិបាលកម្ពុជា ដោយជាប់ពាក់ព័ន្ធការផលិតវីដេអូឯកសារមានចំណងជើងថា «ម្តាយខ្ញុំ លក់ខ្ញុំ» របស់សារព័ត៌មានរុស្ស៊ី (RT)។
វីដេអូឯកសារនេះ និយាយអំពីស្រ្តីខ្មែរលក់កូនស្រីខ្លួនឯង ដោយសារជីវភាពខ្វះខាត និងរៀបរាប់ពីស្ថានភាពនៃការប្រកបអាជីវកម្មផ្លូវភេទនៅកម្ពុជា។
ក្រោយពីការផ្សព្វផ្សាយវីដេអូនេះ សមត្ថកិច្ចកម្ពុជាបកស្រាយថា វីដេអូនេះ ជារឿងប្រឌិតឡើង ដែលធ្វើឲ្យប៉ះពាល់កិត្តិយសដល់ប្រទេសកម្ពុជា ហើយក្រោយមកបានបើកការស៊ើបអង្កេតរកអ្នកជាប់ពាក់ព័ន្ធក្នុងការផលិតវីដេអូ។
កាលពីថ្ងៃទី១១ ខែធ្នូ កន្លងមក អង្គការឃ្លាំមើលសិទ្ធិមនុស្ស (HRW) បានស្នើទៅរដ្ឋាភិបាលថៃកុំបញ្ជូនប្រធានសហជីពរូបនេះមកកម្ពុជាវិញ ដោយបារម្ភពីការកាត់ទោសក្រោមហេតុផលនយោបាយ និងការឃុំខ្លួនមិនត្រឹមត្រូវ៕