ទំនាក់រវាងប្រទេសចិន និងប្រទេសកាណាដា មានភាពរកាំរកូសនឹងគ្នាជាខ្លាំងក្នុងរយៈពេលជិត២សប្តាហ៍ចុងក្រោយនេះ ក្រោយពីមានការចាប់ខ្លួនអគ្គនាយកហិរញ្ញវត្ថុក្រុមហ៊ុន Huawei ដោយអាជ្ញាធរកាណាដា។
អគ្គនាយកហិរញ្ញវត្ថុក្រុមហ៊ុន Huawei លោកស្រី Meng Wanzhou ត្រូវបានអាជ្ញាធរប្រទេសកាណាដា ចាប់ខ្លួនកាលពីថ្ងៃទី១ ខែធ្នូ ឆ្នាំ២០១៨ តាមសំណើរបស់សហរដ្ឋអាមេរិកដោយសារតែក្រុមហ៊ុន Huawei បានល្មើសនឹងទណ្ឌកម្មរបស់អាមេរិកដែលមិនអនុញ្ញាតឲ្យក្រុមហ៊ុនណាមួយរកស៊ីជាប្រទេសអ៊ីរ៉ង់។ ភា្លមៗក្រោយការចាប់ខ្លួន ក្រសួងការបរទេសចិន បានប្រាប់ទៅអាជ្ញាធរកាណាដាឲ្យដោះលែងលោកស្រី Meng Wanzhou ដោយគ្មានលក្ខខណ្ឌ។ ចិន ព្រមានថា បើមិនមានការដោះលែងអគ្គនាយកហិរញ្ញវត្ថុក្រុមហ៊ុន Huawei ឲ្យបានឆាប់នោះទេ កាណាដា នឹងជួបផលលំបាកធ្ងន់ធ្ងរជាមិនខាន។ ទោះបីជាមានការព្រមានខ្លាំងៗពីភាគីចិនបែបណាក៏ដោយ អាជ្ញាធរកាណាដានៅតែបន្តនីតិវិធីក្នុងសំណុំរឿងអគ្គនាយកហិរញ្ញវត្ថុក្រុមហ៊ុន Huawei រូបនេះ។
បើទោះណាជាប្រទេសចិន មិនបានបង្ហាញពីវិធានការណ៍ជាក់លាក់ណាមួយយ៉ាងណាក្តី តែអ្វីដែលប្រទេសចិនបានធ្វើរយៈពេលមួយសប្តាហ៍ចុងក្រោយនេះ វាបានបញ្ជាក់យ៉ាងច្បាស់រួចទៅហើយថា ចិនឆ្លើយតបយ៉ាងដូចម្តេចទៅនឹងទង្វើររបស់ប្រទេសកាណាដា។
តាមការចុះផ្សាយរបស់សារព័ត៌មាន Beijing News អតីតមន្រ្តីទូតកាណាដាម្នាក់ប្រចាំក្រុងប៉េកាំង ហើយបច្ចុប្បន្នជាទីប្រឹក្សាអង្គការវិបត្តិអន្តរជាតិ (International Crisis Group) លោក Michael Kovrig ត្រូវបានអាជ្ញាធរចិនចាប់ខ្លួនកាលពីយប់ថ្ងៃចន្ទទី១០ ខែធ្នូ ឆ្នាំ២០១៨។ ប្រភពដដែល ឲ្យដឹងថាការចាប់ខ្លួនលោក Michael Kovrig ធ្វើឡើងក្រោមការសង្ស័យថា លោកបានធ្វើសកម្មភាពដែលប៉ះពាល់ដល់សន្តិសុខជាតិរបស់ប្រទេសកុម្មុយនីស្តមួយនេះ។
អតីតឯកអគ្គរាជទូតកាណាដាលោក David Mulroney មានប្រសាសន៍ថា ការចាប់ខ្លួនលោក Michael Kovrig អាចជាការសងសឹកដែលកាណាដាបានចាប់ខ្លួនអគ្គនាយកហិរញ្ញវត្ថុក្រុមហ៊ុន Huawei លោកស្រី ម៉េង វ៉ាន់ចូវ។ អតីតឯកអគ្គរាជទូតកាណាដាមួយរូបទៀតលោក Guy Saint-Jacque បាននិយាយជាមួយសារព័ត៌មាន South China Morning Post ថា ករណីនេះបង្ហាញថា រដ្ឋាភិបាលចិនចង់ដាក់សម្ពាធឲ្យបានធ្ងន់បំផុតដល់រដ្ឋាភិបាលកាណាដា។
ប៉ុន្តែក្នុងសន្និសីទសារព័ត៌មានប្រចាំថ្ងៃ កាលពីម្សិលមិញ ក្រសួងការបរទេសចិនបានច្រានចោលការចោទប្រកាន់នេះ។ អ្នកនាំពាក្យក្រសួងការបរទេសចិន លោក លូ ខាង បានឲ្យដឹងថា ការចាប់ខ្លួនលោក Michael Kovrig ធ្វើឡើង ព្រោះតែគាត់បានរំលោភច្បាប់អង្គការសង្គមស៊ីវិលរបស់ចិន។ លោកបន្តថា អង្គការវិបត្តិអន្តរជាតិ (International Crisis Group) មិនបានចុះបញ្ជីត្រឹមត្រូវស្របតាមច្បាប់ដែលតម្រូវដោយអាជ្ញាធរចិននោះទេ។ អ្នកនាំពាក្យក្រសួងការបរទេសចិនរូបនេះបន្ថែមថា ចិននឹងដោះស្រាយបញ្ហានេះតាមច្បាប់ដែលមានជាធរមានក្នុងប្រទេសខ្លួន។
ដោយឡែក តាមការឲ្យដឹងពីរដ្ឋមន្រ្តីក្រសួងការបរទេសកាណាដា អ្នកជំនួញជនជាតិកាណាដាម្នាក់ទៀតក៏អាចជួបបញ្ហានៅក្នុងប្រទេសចិនផងដែរ។ សារព័ត៌មាន South China Morning Post បានដកស្រង់សម្តីរបស់រដ្ឋមន្រ្តីក្រសួងការបរទេសកាណាដា លោកស្រី Chrystia Freeland ថា រដ្ឋាភិបាលកាណាដាពេលនេះ មិនអាចទាក់ទងអ្នកជំនួញជនរបស់ខ្លួនគឺ លោក Michael Spavor ដែលរកស៊ីនៅប្រទេសចិនបានទេ។
ទោះយ៉ាងណាក៏ដោយ បន្ទាប់ពីឃុំខ្លួនជាងមួយសប្តាហ៍ កាលពីថ្ងៃទី១១ ខែធ្នូ ឆ្នាំ ២០១៨ តុលាការប្រទេសកាណាដា បានសម្រេចដោះលែងលោកស្រី Meng Wanzhou ឲ្យនៅក្រៅឃុំបណ្ដោះអាសន្ន ដោយបង់ប្រាក់ធានាជាង៧លានដុល្លារ។ ប៉ុន្តែលោកស្រីដាក់ស្ថិតនៅក្រោមការតាមដាន២៤ម៉ោង លិខិតឆ្លងដែនរបស់លោកស្រីក៏ត្រូវបានដកហូត ហើយគាត់ត្រូវនៅក្នុងផ្ទះពីម៉ោង១១យប់ដល់៦ព្រឹកផងដែរ៕
