បុរសម្នាក់ត្រូវបានសមត្ថកិច្ចចាប់ខ្លួននៅរាជធានីភ្នំពេញកាលពីថ្ងៃម្សិលមិញនេះ ដោយត្រូវបានសង្ស័យថា បានកាត់តវីដេអូជនជាតិចិនមួយក្រុមកាន់កាំបិតដេញកាប់ចាក់គ្នា។ នេះបើតាមការផ្សាយរបស់នគរបាលជាតិ។
វេបសាយអគ្គស្នងការនគរបាលជាតិបានចុះផ្សាយកាលពីថ្ងៃម្សិលមិញថា កម្លាំងនគរបាលប្រឆាំងបទល្មើសបច្ចេកវិទ្យាបានឃាត់ខ្លួនបុរសម្នាក់ឈ្មោះ អ៊ឹង ហ៊ុម អាយុ ២៨ឆ្នាំ រស់នៅភូមិតាង៉ូវ សង្កាត់និរោធ ខណ្ឌច្បារអំពៅ ដោយសង្ស័យថា បានផ្សព្វផ្សាយព័ត៌មានមិនពិត និងបំពុលសង្គម បន្ទាប់ពីបុរសរូបនេះបានកាត់តវីឌីអូមួយ ដែលបង្ហាញថា មានជនជាតិមួយក្រុមបានធ្វើសកម្មភាពកាប់ចាក់គ្នានៅរាជធានីភ្នំពេញ។
អគ្គស្នងការនគរបាលជាតិបានដកស្រង់សម្ដីប្រធាននាយកដ្ឋានប្រឆាំងបទល្មើសបច្ចេកវិទ្យា លោក ជា ពៅ មកចុះផ្សាយថា ការឈានដល់ការចាប់ខ្លួនបុរសឈ្មោះ អ៊ឹង ហ៊ុម នេះ គឺបន្ទាប់សមត្ថកិច្ចបានឃាត់ខ្លួនជនសង្ស័យម្នាក់នៅខេត្តសៀមរាប ដែលបានសារភាពថា បានទិញវីដេអូពីលោក អ៊ឹង ហ៊ុម នេះ។
អគ្គស្នងការនគរបាលជាតិ បានចុះផ្សាយបន្តថា បុរសជាជនសង្ស័យបានសារភាពទទួលស្គាល់ថា គាត់ពិតជាអ្នកកាត់តវីឌីអូនេះមែន ដោយថា មានគោលបំណងទាក់ទាញការចាប់អារម្មណ៍ឲ្យមានអ្នកចូលវីឌីអូរបស់គាត់ច្រើន។
បើតាមការចុះផ្សាយរបស់អគ្គស្នងការនគរបាលជាតិ លោក ជា ពៅ បានប្រកាសច្រានចោលជាថ្មីថា រឿងជនជាតិចិនដេញកាប់ចាក់គ្នានេះ មិនបានកើតឡើងក្នុងប្រទេសកម្ពុជានោះទេ និងថា ជាការបង្កឲ្យមានការភ័ន្ដច្រឡំ និងរើសអើងជាតិសាសន៍៕