លោកនាយករដ្ឋមន្ដ្រី ហ៊ុន សែន បានបញ្ជាទៅអភិបាលខេត្តព្រះសីហនុ និងរដ្ឋមន្ដ្រីមួយចំនួនឲ្យចូលរួមស្ដារមុខមាត់ខេត្តព្រះសីហនុ និងតំបន់ឆ្នេរសមុទ្រកម្ពុជាឡើងវិញ បន្ទាប់ពីទទួលរងការរិះគន់ពីបញ្ហាអសន្ដិសុខ និងការបង្ហូរទឹកកខ្វក់ចូលសមុទ្រ។
ក្នុងពិធីបុណ្យសមុទ្រលើកទី៧ នៅឯខេត្តកោះកុង កាលពីថ្ងៃម្សិលមិញ លោក ហ៊ុន សែន បានបញ្ជាដោយផ្ទាល់មាត់ទៅអភិបាលខេត្តព្រះសីហនុ លោក យន្ដ មីន ឲ្យធ្វើយ៉ាងណាស្ដារមុខមាត់ខេត្តមួយនេះឡើងវិញ ដើម្បីទាក់ទាញភ្ញៀវទេសចរ និងវិស័យទេសចរណ៍កម្ពុជា ដូចជា ការបង្ក្រាបបទល្មើសផ្សេងៗ បញ្ហាគ្រឿងញៀន បញ្ហាបរិស្ថាន និងកសាងហេដ្ឋារចនាសម្ព័ន្ធក្នុងខេត្តនេះបន្ថែមទៀត។
លោក ហ៊ុន សែន ថ្លែងថា៖ «ខេត្តព្រះសីហនុ ត្រូវតែខិតខំខ្លាំងជាងគេ ដើម្បីស្ដារមុខមាត់ ហើយបង្ក្រាបឲ្យខាតតែបានទៅលើពួកល្មើស មិនថា ពួកល្មើសនោះមកពីណានោះទេ ហើយពាក់ផ្កាយប៉ុន្មាន ខ.ម មិន ខ.ម ដឹងតែអាណាខុស ត្រូវតែដាក់អាហ្នឹងតែម្ដងទៅ កុំឲ្យវាលំបាកពេក […] សន្ដិសុខសណ្ដាប់ធ្នាប់សង្គម ធ្វើយ៉ាងណាកុំឲ្យពួកគ្រឿងញៀន ពួកប្រព្រឹត្តខុសច្បាប់ ប្រើតំបន់មាត់សមុទ្រ ធ្វើសកម្មភាព។ កិច្ចការនេះត្រូវខិតខំដោះស្រាយ»។
ក្នុងពិធីនេះផងដែរ លោក ហ៊ុន សែន ក៏បានបញ្ជាឲ្យរដ្ឋមន្ដ្រីក្រសួងដែនដី លោក ជា សុផារ៉ា រដ្ឋមន្ដ្រីក្រសួងទេសចរណ៍ លោក ថោង ខុន និងរដ្ឋមន្ដ្រីក្រសួងបរិស្ថាន លោក សាយ សំអាល់ រួមគ្នាទប់ស្កាត់បញ្ហាបំពុលបរិស្ថាន និងរួមគ្នាអភិវឌ្ឍន៍តំបន់ឆ្នេរសមុទ្ររបស់កម្ពុជា ដូចជា ទប់ស្កាត់ការចាក់ដីរំលោភចូលទឹកសមុទ្រ ការបង្ហូរទឹកកខ្វក់ និងសំរាមចូលក្នុងទឹកសមុទ្រជាដើម។
ខេត្ដព្រះសីហនុ បានស្ថិតក្រោមការរិះគន់ជាបន្តបន្ទាប់ ខណៈដែលខេត្តជាប់ឆ្នេរសមុទ្រមួយនេះ ទទួលកំណើនជនជាតិចិនច្រើន បទល្មើសប្រព្រឹត្តដោយជនបរទេស បញ្ហាផ្ទះសំណាក់ឡើងថ្លៃ ការចាក់ដីលុបចូលសមុទ្រ និងបញ្ហាបង្ហូរទឹកកខ្វក់ និងសំរាមចូលសមុទ្រជាដើម។
សកម្មជនមាតាធម្មជាតិ លោក ថុន រដ្ឋា បានបង្ហោះវីដេអូមួយកាលពីដើមខែធ្នូនេះ ដោយបានបង្ហាញអំពីផលប៉ះពាល់បរិស្ថាន និងសុខភាពប្រជាពលរដ្ឋដែលបង្ករឡើងដោយសារការបង្ហូរបំពង់ទុយោទឹកស្អុយចំនួន ២៩ ចូលឆ្នេរអូឈើទាល៕
