ឱសថស្ថាន ឬក៏ហាងលក់ឱសថវេជ្ជសាស្ត្រ បានកើតឡើងរីកដុះដាលព្រោងព្រាត និងកាន់តែកៀកទៅនឹងលំនៅឋានរបស់ប្រជាពលរដ្ឋ ហើយពលរដ្ឋកាន់តែងាយស្រួលក្នុងការទិញឱសថទាំងនោះ នៅពេលពួកគេយល់ថា ពួកគេមានអការៈធ្លាក់ខ្លួនឈឺ ឬមិនស្រួលខ្លួន។
ប៉ុន្តែ ភាពងាយស្រួលនៃរកទិញឱសថនៅតាមឱសថស្ថាននាននៅទូទាំងប្រទេស ធ្វើឲ្យប្រជាពលរដ្ឋប្រឈមមុខនឹងឱសថក្លែងក្លាយ ដែលពួកគេពុំបានដឹងទាល់តែសោះ ខណៈដែលពួកគេទៅរកទិញឱសថដោយពុំមានវេជ្ជបញ្ជាត្រឹមត្រូវ។
ទើបតែដើរចេញពីឱសថស្ថានមួយកន្លែងនៅម្ដុំផ្សារបឹងកេងកង បុរសមាឌតូចសម្បុរខ្មៅស្រអែមម្នាក់ បានប្រាប់ថា លោកមានឈ្មោះ ប្រាក់ សុធី ហើយលោកបានទៅរកទិញឱសថដោយមិនបានពិគ្រោះយោបល់ និងវេជ្ជបញ្ជាចេញពីវេជ្ជបណ្ឌិតឯកទេសនោះឡើយ បន្ទាប់ពីគាត់គ្រាន់តែសន្និដ្ឋានថា គាត់មានជំងឺគ្រុនផ្ដាសាយ។
ដើម្បីទិញឱសថបាន បុរសអាជីវកររូបនេះ បានឲ្យដឹងថា លោកគ្រាន់តែប្រាប់អការៈរបស់លោកទៅអ្នកលក់ឱសថអំពីអការៈរាងកាយរបស់លោក ហើយបន្ទាប់មក លោកនឹងទទួលបានឱសថទៅតាមសភាពអការៈរាងកាយរបស់លោក។
នៅពេលត្រូវបានសាកសួរថា តើលោកបានដឹងថា ឱសថនៅក្នុងដៃរបស់លោក ជាឱសថក្លែងក្លាយ ឬក៏ជាឱសថពិតប្រាកដឬយ៉ាងណានោះ លោក សុធី បែរជាបង្ហាញក្ដីបារម្ភទៅវិញថា លោកពុំអាចបែងចែកបញ្ហានេះបានទាល់តែសោះ។
បុរសវ័យ៥២ឆ្នាំរូបនេះ ប្រាប់ថា៖ «ព្រួយបារម្ភតើ ធ្វើម៉េចយើងឈឺហើយ ត្រូវរកថ្នាំ វាមានតែផ្ដាសាយថែម។ ខ្លាចទី១ ប៉ះពាល់សុខភាពយើង ពេលប៉ះពាល់សុខភាពទៅ ជំងឺកាន់តែធ្ងន់ៗឡើង។ យើងមានលុយណាព្យាបាល ដូចខ្ញុំប្រកបមុខរបរអញ្ចឹង មានលុយណាព្យាបាល។ ឧទាហរណ៍ ជំងឺតូចតាច លេបទៅប៉ះចំឱសថក្លែងក្លាយ ធំកាន់តែធំៗទៅ វាអញ្ចឹង!»។
មិនមែនតែលោក សុធី ទេដែលបារម្ភអំពីឱសថក្លែងក្លាយត្រូវបាននាំចូល ចែកចាយ និងប្រើប្រាស់នៅក្នុងប្រទេសកម្ពុជា អាជីករម្នាក់ទៀតដែលកំពុងអីវ៉ាន់នៅម្ដុំបឹងសាឡាង អ្នកស្រីមានឈ្មោះថា ជឹម រស្មី អាយុ ៤៨ឆ្នាំ ក៏បង្ហាញនូវក្ដីបារម្ភអំពីផលប៉ះពាល់នៃឱសថក្លែងក្លាយចំពោះសុខភាពអ្នកប្រើប្រាស់ទូទៅដូចគ្នា។
អាជីវកររូបនេះ បានរំឭកឡើងវិញអំពីបទពិសោធន៍នៃការស្វែងរកទិញឱសថមកប្រើប្រាស់នាពេលកន្លងមកថា អ្នកស្រីបានទៅទិញថ្នាំពេទ្យនៅឱសថស្ថានមួយកន្លែងជិតផ្សារដើមគរ បន្ទាប់ពីអ្នកស្រីមានអការៈគ្រុនក្ដៅ ប៉ុន្តែ ក្រោយពេលពិសារថ្នាំនោះរួចមក គាត់បែរជាមានអការៈក្ដៅខ្លួនកាន់តែធ្ងន់ធ្ងរជាងមុនទៅវិញ។
អ្នកស្រីថា៖ «ទិញមកផឹកទៅប៉ះធ្វើទុក គ្រាន់តែក្ដៅផ្ដាសាយ។ យើងបា្រប់ថា យើងឈឺក្បាល ក្ដៅផ្ដាសាយ ហៀរសំបោអញ្ចឹង ដល់អញ្ចឹងគេដាក់ឲ្យ ដាក់ឲ្យដល់ពេលលេបតែមួយលេបសោះ ធ្វើទុក្ខខ្លួនភ្លាម មិនជាថ្នាំអី មិនដឹង គេផ្សំដាក់ឲ្យថ្នាំអី ដាក់មកធ្វើទុក្ខក្ដៅរងា។ អាយើងឈឺធម្មតា ទៅជាលើសដើមម៉ង»។
ប្រធានសមាគមគ្រូពេទ្យគុណធម៌ លោកវេជ្ជបណ្ឌិត អ៊ួច វុទ្ធី បានឲ្យដឹងថា ប្រជាពលរដ្ឋ និងគ្រូពេទ្យមួយចំនួន មិនបានដឹងថា ឱសថដែលខ្លួនបានទិញយកទៅប្រើប្រាស់ និងដាក់លក់នោះ ជាឱសថពិត ឬក្លែងក្លាយនោះទេ ហើយលោកព្រមានអំពីផលប៉ះពាល់ដល់អាយុជីវិតមនុស្ស។
លោកវេជ្ជបណ្ឌិត អ៊ួច វុទ្ធី ប្រាប់ថា ការប្រើប្រាស់ឱសថក្លែងក្លាយ ជាពិសេសថ្នាំគ្រាប់ បង្កផលប៉ះពាល់រយៈពេលយូរទៅដល់សុខភាព ដូចជា បង្កជាជំងឺមហារីកក្រពះ ពោះវៀន ក្បាល និងថ្លើមជាដើម។ ក្រៅពីប្រភេទថ្នាំគ្រាប់ក្លែងក្លាយ លោកវេជ្ជបណ្ឌិតរូបនេះ បានឲ្យដឹងទៀតថា ឱសថក្លែងក្លាយជាប្រភេទសេរ៉ូម នឹងបង្កផលប៉ះពាល់ដល់សុខភាពភ្លាមៗ
លោកថា៖ «កន្លែងហ្នឹង យើងត្រូវចេះមើលខ្លួនឯង បើថ្នាំសុទ្ធយើងលាយទឹក យើងក្រឡុកមើល វាភ្លឺថ្លាដូចកញ្ចក់តែម្ដង អាហ្នឹងបានន័យថា យើងចាក់គាត់បានហើយ អត់អាចគ្រោះថ្នាក់ទេ តែបើមានកករ កង្វក់នៅក្នុងហ្នឹង អត់អាចចាក់បានទេ។ អាហ្នឹងចាំសួរក្រុមហ៊ុន យើងទិញពីណាមក។ អាហ្នឹងអញ្ចឹង គ្រូពេទ្យត្រូវមានបទពិសោធន៍ខ្លួនគាត់រៀងៗខ្លួន កន្លងទៅមានគ្រូទេព្យខ្លះសងគេរាប់ម៉ឺន ចាក់ថ្នាំគេស្លាប់ អាហ្នឹងដោយសារ ថ្នាំក្លែងក្លាយអាហ្នឹង»។
ទាំងអាជីវករ និងវេជ្ជបណ្ឌិត សុទ្ធតែស្នើទៅអាជ្ញាធរឲ្យត្រួតពិនិត្យលើការនាំចូលឱសថឲ្យបានតឹងរឹង និងចាត់វិធានការធ្ងន់ទៅលើមន្ត្រីណា ឬបុគ្គលពាក់ព័ន្ធនឹងការអនុញ្ញាត ឬនាំចូលនូវឱសថក្លែងក្លាយមកក្នុងប្រទេសកម្ពុជា។
អ្នកស្រី ជឹម រស្មី ប្រាប់បន្ថែមថា៖ «រដ្ឋាភិបាលគួរគិតគូរឲ្យខ្លាំងមែនទែនតាមគ្លីនិច ព្រោះអីដូចសម្លាប់ប្រជាជនយើងអញ្ចឹង។ អស់លុយហើយ ខាតពេលវេលា។ អញ្ចឹង បានគ្រាន់តែថា ស្នើឲ្យរដ្ឋាភិបាលធ្វើម៉េច រឹតបន្តឹងឲ្យមែនទែនអាថ្នាំហួសគុណភាព កុំឲ្យចេះតែកេងចំណេញ។ អ្នកក្រគ្នាមិនដឹង ចេះតែទៅផ្សំហើយ ផ្សំកន្លែងតូចតាច»។
ប្រធានលេខាធិការដ្ឋាននៃគណៈកម្មាធិការជាតិប្រយុទ្ធប្រឆាំងផលិតផលក្លែងក្លាយ លោក លាវ សុផាន់ណារិទ្ធិ មានប្រសាសន៍ថា ឱសថក្លែងក្លាយ និងខូចគុណភាព ដែលអាជ្ញាធរចុះបង្រ្កាប និងដកហូតកន្លងមក គឺនាំមកពីប្រទេសផ្សេងៗ ប៉ុន្តែ លោកថា បច្ចុប្បន្ន អាជ្ញាធរកំពុងចុះត្រួតពិនិត្យនៅតាមក្រុមហ៊ុន និងឱសថស្ថាននានា ដើម្បីធានាគុណភាពឱសថវេជ្ជសាស្ត្រទាំងអស់នោះ។
លោកថា៖ «វាមានច្រើន ដែលយើងចូលទៅឆែកនៅឃ្លាំមួយចំនួន មាននៅទីក្រុងភ្នំពេញ វាមានប្រភពមកពីច្រើន នៅក្នុងឃ្លាំមកពីប្រទេសផ្សេងៗមិនមែនមកពីតែមួយប្រទេស វាតាមប្រភេទថ្នាំ ហើយថ្នាំនឹងវាខូចសុពលភាព ។ ថ្នាំខ្លះអាចជាថ្នាំសុទ្ធតែវាអត់មានច្បាប់អនុញ្ញាតពីក្រសួងសុខាភិបាល ហើយមួយចំនួនទៀតដែលរកឃើញគឺវាផុតការបរិច្ឆេទ ថ្នាំហួសដេឡេ»។
លោកណែនាំទៅប្រជាពលរដ្ឋឲ្យពិគ្រោះយោបល់ជាមួយគ្រូពេទ្យជាមុន មុននឹងទៅទិញថ្នាំនៅតាមឱសថស្ថាន និងគ្លីនិកមួយចំនួន ដោយថា អ្នកលក់ថ្នាំនៅតាមឱសថស្ថាននីមួយៗ មិនមានជំនាញច្បាស់លាស់នោះទេ។
លោកថា៖ «ប្រជាពលរដ្ឋ ឬក៏សាធារណជនដែលគាត់មានជំងឺហ្នឹង គួរទៅពិគ្រោះជាមួយវេជ្ជបណ្ឌិត មុននឹងគាត់ចេញវេជ្ជបញ្ជាជូនឲ្យច្បាស់លាស់ ហើយស្ថានភាពជំងឺហ្នឹង ត្រូវមានការពិនិត្យឲ្យបានច្បាស់លាស់ ព្រោះអីពួកគាត់មួយចំនួន ប្រជាពលរដ្ឋ ពេលគាត់មានជំងឺ គាត់ទៅឱសថស្ថាន អត់ពិនិត្យឈាម ពិនិត្យសុខភាពឲ្យបានច្បាស់លាស់ថា គាត់ឈឺអី»។
កាលពីថ្ងៃទី១៦ ខែសីហា ឆ្នាំ២០១៨ កម្លាំងសមត្ថកិច្ចចម្រុះ បានចុះបង្ក្រាបទីតាំងនាំចូល និងចែកចាយឱសថមួយកន្លែង នៅសង្កាត់អូរបែកក្អម ខណ្ឌសែនសុខ រាជធានីភ្នំពេញ។ ក្នុងការចុះបង្រ្កាបនោះ អាជ្ញាធរបានរកឃើញឱសថក្លែងក្លាយ និងខូចគុណភាពចំនួន៣៥ប្រភេទ។
កាលពីថ្ងៃទី៥ ខែវិច្ឆិកា ឆ្នាំ២០១៨ លោកនាយករដ្ឋមន្ត្រី ហ៊ុន សែន បានអំពាវនាវទៅកាន់សហគមន៍អន្តរជាតិ ឲ្យចូលរួមលុបបំបាត់ឱសថក្លែងក្លាយ និងខូចគុណភាព ដោយថា ឱសថក្លែងក្លាយបានបង្កគ្រោះថ្នាក់យ៉ាងធ្ងន់ធ្ងរចំពោះអ្នកប្រើប្រាស់ ដែលឱសថទាំងនោះ ភាគច្រើនត្រូវបានដាក់លក់អនឡាញ ដែលអាចបង្កគ្រោះថ្នាក់ដល់អ្នកប្រើប្រាស់ ពីព្រោះមិនមានប្រភពច្បាស់លាស់ ហើយធ្វើឲ្យអាជ្ញាធរពិបាកគ្រប់គ្រង។
លោកថា៖ «ខ្ញុំគិតថា នេះជាចំណុចដែលយើងត្រូវធ្វើការរួមគ្នាដើម្បីឲ្យក្លាយជាចរន្តអន្តរជាតិ ព្រោះយើងនៅទីនេះ មានក្រុមហ៊ុនផលិតប៉ុន្មាន មានប្រទេសប៉ុន្មាន ប៉ុណ្ណេះវាមិនគ្រប់គ្រាន់ទេ? ទាល់តែទៅទាំងមូលរួមគ្នាតែម្ដង ទាំងប្រទេសផលិត និងប្រទេសមិនផលិត»។
ក្រោយការប្រកាសរបស់លោកនាយករដ្ឋមន្ត្រី ហ៊ុន សែន នៅថ្ងៃទី១៣ ខែវិច្ឆិកា ឆ្នាំ២០១៨ គណៈកម្មាធិការប្រយុទ្ធប្រឆាំងផលិតផលក្លែងក្លាយបានចុះបង្ក្រាប និងដកហូតជាបណ្តោះអាសន្ននូវផលិតផលឱសថខុសច្បាប់ និងអន់គុណភាពបានចំនួន ៤០តោន ដែលឱសថទាំងអស់នោះបង្កគ្រោះថ្នាក់ខ្ពស់ដល់សុខភាព និងសុវត្ថិភាពសង្គម។
យោងតាមមាត្រា ៦៤ នៃច្បាប់រដ្ឋធម្មនុញ្ញចែងថា រដ្ឋត្រូវហាមឃាត់ និងផ្តន្ទាទោសជាទម្ងន់លើជនដែលនាំចូល ឬផលិតទំនិញក្លែងក្លាយ ប៉ះពាល់ដល់អាយុជីវិតរបស់អ្នកប្រើប្រាស់។
កាលពីពាក់កណ្តាលខែតុលាកន្លងទៅ ប្រធានគណៈកម្មាធិការសុខុមាលភាពនៃសភាពាណិជ្ជកម្មអឺរ៉ុប និងជានាយកក្រុមហ៊ុន Zuelling Pharma ប្រចាំកម្ពុជា លោក Jean Gaetan បានលើកឡើងថា បច្ចុប្បន្ន ក្នុងចំណោមថ្នាំចំនួន ១០ប្រភេទនៅទូទាំងពិភពលោក មានថ្នាំក្លែងក្លាយ ៧ប្រភេទហើយ ដែលនៅលាយឡំជាមួយថ្នាំទាំងនោះ ដែលធ្វើឲ្យពលរដ្ឋងាយរងគ្រោះ ឆាប់ជឿ និងយកមកប្រើប្រាស់។
លោកបន្ថែមថា ក្នុង ១ឆ្នាំ ពលរដ្ឋជាង ១លាននាក់នៅទូទាំងពិភពលោក បានបាត់បង់ជីវិតដោយសារការប្រើប្រាស់ថ្នាំក្លែងក្លាយនេះ ក្នុងនោះមានប្រជាជនកម្ពុជាជាង ២ពាន់នាក់៕