រដ្ឋមន្ត្រីក្រសួងមហាផ្ទៃ លោក ស ខេង បានបដិសេធទៅនឹងការលើកឡើងរបស់អតីតមេដឹកនាំបក្សប្រឆាំង ដែលបាននិយាយថា លោកមានគម្រោងបំបែកខ្លួនពីលោកនាយករដ្ឋមន្ត្រី ហ៊ុន សែន នៅឆ្នាំថ្មីនេះ។
លោក សម រង្ស៊ី អតីតប្រធានគណបក្សសង្គ្រោះជាតិ និងបច្ចុប្បន្នកំពុងរស់នៅនិរទេសខ្លួនឯងនៅឯក្រៅប្រទេសនោះ បានថ្លែងតាមវិទ្យុអាស៊ីសេរីកាលពីថ្ងៃម្សិលមិញថា លោក ស ខេង កំពុងរៀបចំបែកពីលោក ហ៊ុន សែន នៅឆ្នាំ២០១៩ខាងមុខ។
លោក សម រង្ស៊ី ក៏បានរៀបរាប់បន្តលើហ្វេសប៊ុករបស់លោកថា៖ «ព្រឹត្តិការណ៍មួយដ៏សំខាន់ នឹងផ្ទុះឡើងក្នុងឆ្នាំ ២០១៩ ពីព្រោះ ហ៊ុន សែន ចង់ដាក់កូនប្រុសគាត់ ហ៊ុន ម៉ានី ជំនួស ស ខេង នៅក្រសួងមហាផ្ទៃ»។
ប៉ុន្តែ លោក ស ខេង បានបដិសេទៅនឹងការចោទប្រកាន់របស់អតីតមេបក្សប្រឆាំងរូបនេះ ដោយហៅសម្ដីចោទប្រកាន់នោះថា ជាការមូលបង្កាច់លើរូបលោក។
ទំព័រហ្វេសប៊ុកលោក ស ខេង រៀបរាប់នៅថ្ងៃនេះថា៖ «ខ្ញុំសូមបញ្ជាក់ថា ខ្លួនខ្ញុំផ្ទាល់បានរួមការងារជាមួយសម្តេចអគ្គមហាសេនាបតីតេជោ ហ៊ុន សែន គ្រប់កាលៈទេសៈដើម្បីដោះស្រាយបញ្ហាជាតិ ជាង ៤០ឆ្នាំកន្លងមកហើយ»។
លោក សម រង្ស៊ី ដែលធ្លាប់ជាប្រធានក្រុមតំណាងរាស្ត្រមតិភាគតិច បានជួបពិភាក្សាជាមួយលោក ស ខេង ជាប្រធានក្រុមតំណាងរាស្ត្រមតិភាគច្រើនអំឡុងឆ្នាំ២០១៥ នៅក្នុងជំនួបជាច្រើនលើកដែលឈានទៅដល់ការកែប្រែច្បាប់នានាពាក់ព័ន្ធនឹងការបោះឆ្នោតនៅកម្ពុជា៕