គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប. បានប្រកាសថា ពលរដ្ឋជាង ៨លាន ៥៤ម៉ឺននាក់ ត្រូវបានចុះឈ្មោះជាផ្លូវការនៅក្នុងបញ្ជីបោះឆ្នោតឆ្នាំ២០១៨នេះ។
ក្នុងសេចក្ដីប្រកាសព័ត៌មាននៅថ្ងៃនេះ គ.ជ.ប. បានឲ្យដឹងថា ពលរដ្ឋជាង ៨លាន ៥៤ម៉ឺននាក់ ត្រូវបានចុះក្នុងបញ្ជីឈ្មោះបោះឆ្នោតជាផ្លូវការនៅឆ្នាំ២០១៨នេះ ឬត្រូវនឹងចំនួន ៨៦.២៤ភាគរយនៃចំនួនពលរដ្ឋមានសិទ្ធិបោះឆ្នោតចំនួនជាង ៩លាន ៩សែននាក់។
បើតាម គ.ជ.ប. ពលរដ្ឋជាង ១៩ម៉ឺន ៥ពាន់នាក់ ត្រូវបានស្ថាប័នមួយនេះចុះឈ្មោះថ្មី ខណៈដែលគ.ជ.ប. ក៏បានលុបឈ្មោះពលរដ្ឋចេញពីបញ្ជីជាង ៥ម៉ឺន ៦ពាន់នាក់ផងដែរ៕