កម្មករប្រមាណ ១០០នាក់ក្នុងចំណោមកម្មករជិត ២ពាន់នាក់ ដែលបម្រើការងារនៅរោងចក្រមួយ ស្ថិតក្នុងខណ្ឌមានជ័យ រាជធានីភ្នំពេញ បានប្រមូលផ្តុំគ្នាដាក់ញត្តិនៅខុទ្ទកាល័យនាយករដ្ឋមន្រ្តីនៅថ្ងៃនេះ ដើម្បីសុំទៅលោក ហ៊ុន សែន ឲ្យជួយអន្តរាគមន៍ដោះស្រាយវិវាទការងាររបស់ពួកគេ។
កម្មករជិត ២ពាន់នាក់បម្រើការងារនៅរោងចក្រ W&D ស្ថិតក្នុងភូមិឬស្សី សង្កាត់មានជ័យ បាននាំគ្នាតវ៉ារយៈពេល ១សប្តាហ៍ហើយ ដើម្បីទាមទារទៅថៅកែ ឲ្យបើកប្រាក់អតីតភាពការងារ។
កម្មករម្នាក់ អ្នកស្រី ជា សុខា ប្រាប់ វីអូឌី ក្រោយដាក់ញត្តិថា ក្រុមកម្មករសម្រេចទៅរកកិច្ចអន្តរាគមន៍ពីលោកនាយករដ្ឋមន្រ្តី ហ៊ុន សែន ឲ្យជួយដោះស្រាយ ដោយសារតែការតវ៉ារយៈពេលប៉ុន្មានថ្ងៃនេះ ពុំទទួលបានដំណោះស្រាយ។
អ្នកស្រីអ្នកបន្ថែមថា៖ «ច្បាប់សម្រាប់ឆ្នាំថ្មីនេះ គឺពួកខ្ញុំព្រមទទួលយកទាំងអស់ ប៉ុន្តែ ពួកខ្ញុំសូមឲ្យលោកនាយករដ្ឋមន្រ្តីសម្រួលដល់កម្មករដែលអតីតភាពការងារយូរឆ្នាំពីមុនមកបួនដប់ ឬដប់ពីរ ឬដប់បីឆ្នាំនោះ ឲ្យពួកគាត់បានផលប្រយោជន៍របស់ពួកគាត់ទាំងអស់មុនគាត់លាឈប់ថ្ងៃណាមួយ។ ការបង់រំលោះ ពួកខ្ញុំមិនអាចទទួលយកបានទេ ពីព្រោះយើងមិនដឹងថា យើងស្លាប់ពេលណាទេ? យើងអត់ដឹងថា យើងស្លាប់ពេលណាមែនហេ? ប៉ុន្តែ ពេលច្បាប់នេះចេញមក បើខ្ញុំស្លាប់ទៅ ខ្ញុំទទួលបានតែប្រាក់ខែខ្ញុំចុងក្រោយទេ។ ចុះប្រាក់អតីតភាពការងារដែលពួកខ្ញុំខំតស៊ូរាប់ឆ្នាំនោះបានអត់? អត់ទេ។ អញ្ចឹង វាអយុត្តិធម៌សម្រាប់ខ្ញុំចាស់ៗណាស់»។
កម្មករម្នាក់ទៀតវ័យ៤៨ឆ្នាំ អ្នកស្រី ឈាង វណ្ណា ដែលអះអាងថា បម្រើការងារនៅរោងចក្រនោះ ១៣ឆ្នាំមកហើយនោះ បាននិយាយថា ក្រុមកម្មករចង់ឲ្យថៅកែទូទាត់បើកប្រាក់អតីតភាពការងារជូនពួកគេឲ្យអស់ត្រឹមឆ្នាំ២០១៨ មុននឹងអនុវត្តច្បាប់ថ្មីនៅឆ្នាំ២០១៩ខាងមុននេះ។
កម្មកររូបនេះបន្តថា ការពន្យាពេលមិនដោះស្រាយនេះ បានធ្វើឲ្យកម្មករខាតផលប្រយោជន៍ និងជួបផលលំបាកជាច្រើនដោយមិនបានបំពេញការងារ និងខ្វះខាតជីវភាពជាដើម។
អ្នកស្រីបន្ថែមថា៖ «ពួកខ្ញុំលឺសម្តេច ហ៊ុន សែន ប្រកាសថា មុននឹងអនុវត្តច្បាប់ថ្មី សុំឲ្យនាយកក្រុមហ៊ុនហ្នឹងគិតប្រាក់អតីតភាពការងារឆ្នាំចាស់ហ្នឹងជូនកម្មករឲ្យអស់។ ដល់អញ្ចឹង ពួកខ្ញុំរង់ចាំមើលរហូតមកដល់ខែ១២នេះ អត់ឃើញបានអីសោះ ក៏នាំគ្នាតវ៉ាទៅ។ អត់សហជីព ឬសហព័ន្ធណាមួយដោះស្រាយទេ គេយករួចខ្លួនបាត់»។
មន្រ្តីខុទ្ទកាល័យនាយករដ្ឋមន្រ្តី គឺលោក គង់ ចំរើន បានទទួលញត្តិពីក្រុមកម្មករ និងបានសន្យាចំពោះមុខកម្មករថា នឹងបញ្ជូនញត្តិនោះឲ្យថ្នាក់លើពិនិត្យដើម្បីដោះស្រាយ។
វីអូឌី មិនអាចសុំការឆ្លើយពីភាគីរោងចក្រ W&D បានទេជុំវិញការតវ៉ាទាមទារប្រាក់អតីតភាពការងាររបស់ក្រុមកម្មករនេះ។
កាលពីសប្តាហ៍មុន អ្នកនាំពាក្យក្រសួងការងារ លោក ហេង សួរ បញ្ជាក់ថា បើទោះបីច្បាប់ថ្មីនេះចូលជាធរមានក៏ដោយ ថៅកែរោងចក្រនៅតែមានតួនាទីទូទាត់ប្រាក់អតីតភាពការងារឆ្នាំចាស់ៗជូនកម្មករដដែល ហើយលោកថា រដ្ឋាភិបាលធានាមិនឲ្យកម្មករណាម្នាក់បាត់បង់អត្ថប្រយោជន៏ ដោយសារតែក្រុមហ៊ុនក្ស័យធនឡើយ។
លោកបន្ថែមថា៖ «ចាប់ពីឆ្នាំ២០១៩នេះតទៅ អតីតភាពការងារនឹងទូទាត់ ១ឆ្នាំ២ដង ដែលក្នុងនោះ ខែ៦ទូទាត់ម្តង ខែ១២ទូទាត់ម្តង រីឯអតីតភាពការងារមានមុនឆ្នាំ២០១៩ក៏យើងតម្រូវឲ្យនយោជកទូទាត់សងទៅដល់បងប្អូនកម្មករយើងវិញ ហើយក្នុងករណីដែលរោងចក្រសហគ្រាសគាត់ក្ស័យធនឬដួលរលំនៅក្នុងដំណាក់កាលដែលប្រាក់អតីតភាពនោះមិនទាន់សងរំលោះអស់ គឺរដ្ឋាភិបាលនឹងទទួលខុសត្រូវលើអត្ថប្រយោជន៍ទាំងអស់នោះ»។
ប្រធានសហភាពការងារកម្ពុជា លោក អាត់ ធន់ មានប្រសាសន៍ថា ប្រសិនបើកម្មករបម្រើការងារដោយប្រើកិច្ចសន្យាមិនកំណត់លើសពីពីរឆ្នាំឡើងទៅ ថៅកែត្រូវគិតប្រាក់អតីតភាពការងារជូនកម្មករ។
កាលសប្តាហ៍មុន កម្មកររាប់ពាន់នាក់បម្រើការងារតាមរោងចក្រនានាក្នុងរាជធានីភ្នំពេញ បានផ្ទុះការតវ៉ាទាមទារបើកប្រាក់អតីតភាពការងារ ដោយការទាមទារនោះធ្វើឡើងបន្ទាប់ពីរដ្ឋាភិបាលឲ្យអនុវត្តច្បាប់ថ្មីដែលតម្រូវឲ្យទូទាត់ប្រាក់អតីតភាពការងារជូនកម្មករ១ឆ្នាំ២ដងចាប់ពីឆ្នាំ២០១៩ខាងមុខនេះតទៅ ខណៈក្រុមកម្មករបារម្ភថា ពេលអនុវត្តច្បាប់នថ្មីនោះនឹងធ្វើឲ្យពួកគេបាត់បង់ប្រាក់អត្ថប្រយោជន៍ឆ្នាំចាស់ៗរបស់ពួកគេពេលកន្លងមក៕
