រដ្ឋាភិបាលតៃវ៉ាន់ នឹងពិនិត្យការផ្ដល់ទិដ្ឋាការជាក្រុមដល់ទេសចរមកពីប្រទេសចំនួន៦ឡើងវិញ ក្រោយភ្ញៀវទេសចរវៀតណាម១៥២នាក់រត់គេចខ្លួនដើម្បីរកការងារធ្វើដោយខុសច្បាប់ ក្រោយពីពួកគេបានទៅដល់ដែនកោះមួយនេះ។
សារព័ត៌មាន Taipei Times បានចេញផ្សាយថារដ្ឋាភិបាលកោះតៃវ៉ាន់នឹងពិនិត្យមើលគម្រោងដែលជួយសម្រួលការផ្ដល់ទិដ្ឋការដល់ទេសចរមកពីបណ្ដាប្រទេសនៅអាស៊ីខាងត្បូងនិងអាស៊ីអាគ្នេយ៍ចំនួន៦ប្រទេស។
វិធានការរបស់អាជ្ញាធរតៃវ៉ាន់
កិច្ចប្រជុំគណៈរដ្ឋមន្រ្តីតៃវ៉ាន់ បានធ្វើឡើងបន្ទាប់ពីមានការគេចខ្លួនរបស់ភ្ញៀវទេសចរវៀតណាមទាំង១៥២នាក់នោះ។ រដ្ឋមន្រ្តីប្រចាំការម្នាក់គឺលោក Chang Ching-sen បានចេញសេចក្តីបង្គាប់មួយឲ្យភាគីពាក់ព័ន្ធពិនិត្យមើលឡើងវិញនូវគម្រោងសាកល្បងមានឈ្មោះថា «Kuan Hung Pilot Project» ។
«Kuan Hung Pilot Project» ជាគម្រោងមួយរបស់រដ្ឋាភិបាលតៃវ៉ាន់ សម្រាប់បង្កើនទំនាក់ទំនងរវាងតៃវ៉ាន់ជាមួយប្រទេសចំនួន៦ ដែលក្នុងនោះរួមមាន កម្ពុជា ឡាវ ឥណ្ឌូនេស៊ី មីយ៉ាន់ វៀតណាម និងឥណ្ឌា។ គម្រោងសាកល្បងរបស់រដ្ឋាភិបាលតៃវ៉ាន់នេះ ធ្វើឡើងដើម្បីទាក់ទាញភ្ញៀវទេសចររបស់បណ្តាប្រទេសទាំងនេះ បន្ទាប់ពីភ្ញៀវទេសចរចិនដីគោកបានធ្លាក់ចុះ។
«Kuan Hung Pilot Project» ត្រូវបានរដ្ឋាភិបាលតៃវ៉ានដាក់ចេញឲ្យដំណើរការនៅឆ្នាំ២០១៥។ តាមរយៈគម្រោងនេះ ក្រុមទេសចរមកពីបណ្ដាប្រទេសទាំង៦ខាងលើនេះ អាចស្នើសុំទិដ្ឋាការតាមអនឡាញជាក្រុមចាប់ពី៥នាក់ឡើងទៅដោយមិនគិតថ្លៃ ហើយក៏មិនចាំបាច់បញ្ជាក់ពីមុខរបរ និងទ្រព្យសម្បត្តិឡើយ។
លោក Chang Ching-sen ស្នើដល់ក្រុមហ៊ុនទេសចរទាំងអស់ដាក់នូវវិធានការជាក់លាក់បន្ថែមទៀត ដើម្បីពិនិត្យមើលការស្នើសុំទិដ្ឋាការរបស់ទេសចរវៀតណាមដែលស្នើសុំតាមរយៈគម្រោង«Kuan Hung Pilot Project»នេះ។ លោក Chang Ching-sen អំពាវនាវដល់ក្រសួងដឹកជញ្ជូន និងទូរគមនាគមន៍ ធ្វើការពិនិត្យមើលឡើងវិញនូវយន្តការរបស់ខ្លួន ក្នុងការពិនិត្យនូវពាក្យស្នើសុំទិដ្ឋការរបស់ទេសចរតាមរយៈគម្រោងនេះ។
រដ្ឋមន្រ្តីរូបនេះ ក៏បានស្នើសុំឲ្យក្រសួងមហាផ្ទៃបង្កើនវិធានការត្រួតពិនិត្យបន្ថែមទៀតលើក្រុមទេសចរដែលមកតាមរយៈគម្រោងនេះ នៅពេលដែលពួកគេមកដល់តៃវ៉ាន់។ លោក Chang Ching-sen ក៏បានស្នើសុំទៅឲ្យមានការដាក់ទោសនិងពិន័យឲ្យបានធ្ងន់ធ្ងរដល់ជនបរទេសដែលលួចធ្វើការដោយខុសច្បាប់ ក៏ដូចជាក្រុមមេខ្យល់ដែលនាំអ្នកទាំងនោះចូលធ្វើការនៅតៃវ៉ាន់។
ស្ថានភាពភ្ញៀវទេសចរវៀតណាមទាំង១៥២នាក់
ក្រុមទេសចរវៀតណាមចំនួន ១៥២នាក់បានធ្វើដំណើរដល់កោះតៃវ៉ាន់ចន្លោះពីថ្ងៃទី២១ ដល់ថ្ងៃទី២៣ ខែធ្នូ ឆ្នាំ២០១៨ តាមរយៈក្រុមហ៊ុនទេសចរណ៍មួយឈ្មោះថា ETholiday ។ ព័ត៌មាននៃការរត់គេចខ្លួនរបស់ក្រុមទេសចរទាំងនោះត្រូវបានរដ្ឋាភិបាលវៀតណាមផ្សព្វផ្សាយជាសាធារណៈកាលពីថ្ងៃទី២៥ ខែធ្នូ ឆ្នាំ២០១៨កន្លងទៅ។
អាជ្ញាធរអន្តោប្រវេសន៍តៃវ៉ាន់ និងសមាជិកសភាមកពីគណបក្សប្រឆាំងគឺបក្សគួមិនតាង បានដាក់ការសង្ស័យថា ទេសចរទាំង១៥២នាក់នោះបានគេចខ្លួនចេញពីមគ្គុទេសន៍ទេសចរណ៍ ដើម្បីស្វែងរកការងារធ្វើដោយខុសច្បាប់នៅលើកោះនេះ តាមរយៈបណ្ដាញក្រុមរត់ពន្ធមនុស្ស។ ពួកគេ បានលើកឡើងស្រដៀងគ្នាថា ក្រុមទេសចរស្រ្តីអាចទៅស្វែងរកការងារបម្រើសេវាផ្លូវភេទ ចំណែកឯបុរសអាចទៅស្វែងរកការងារដែលប្រើកម្លាំងពលកម្ម។ សមាជិកសភាបក្សប្រឆាំង ថាសកម្មភាពរបស់ក្រុមទេសចរវៀតណាមបែបនេះ នឹងធ្វើឲ្យប៉ះពាល់យ៉ាងធ្ងន់ធ្ងរដល់សន្តិសុខតៃវ៉ាន់។
គិតត្រឹមថ្ងៃទី៣០ ខែធ្នូ ឆ្នាំ២០១៨ម្សិលមិញ អាជ្ញាធរតៃវ៉ាន់បានរកឃើញទេសចរវៀតណាមដែលរត់គេចខ្លួនចំនួន២០នាក់, ៣ទៀតត្រូវបានរាយការណ៍ថា បានទៅដល់ប្រទេសវៀតណាមវិញហើយ ខណៈជាង១០០នាក់ទៀតអាជ្ញាធរតៃវ៉ាន់នៅកំពុងបន្តស្វែងរក៕
