អតីតមេដឹកនាំបក្សប្រឆាំង លោក សម រង្ស៊ី ដែលកំពុងនិរទេសខ្លួនបានផ្ញើសារនយោបាយក្រើនរំឭកមន្ត្រីរបស់ខ្លួន កុំឲ្យចាប់ការបោកបញ្ឆោតរបស់បក្សកាន់អំណាច ដោយថា ការសុំសិទ្ធិធ្វើនយោបាយឡើងវិញ ប្រៀបបាននឹងការទទួលស្គាល់ការរំលាយគណបក្សសង្គ្រោះជាតិ និងទទួលស្គាល់បទចោទលើលោក កឹម សុខា ថា «ក្បត់ជាតិ»។
លោក សម រង្ស៊ី នៅថ្ងៃនេះ បានសរសេរនៅហ្វេសប៊ុករបស់លោក ដោយបង្ហាញសារបែបក្រើនរំឭកផ្តោតលើមូលហេតុ ៧ចំណុចនូវអ្វីដែលោកថា កុំឲ្យចាញ់បោកមេដឹកនាំបក្សកាន់អំណាច លោក ហ៊ុន សែន ដែលថា បានប្រើតុលាការរំលាយគណបក្សខ្លួន។
លោកថា៖ «បើយើងទៅសុំសិទ្ធិពីលោក ហ៊ុន សែន ដើម្បីធ្វើនយោបាយវិញនៅពេលនេះ មានន័យផងដែរថា យើងទទួលស្គាល់ថា តុលាការកំពូលបានរំលាយគណបក្សសង្គ្រោះជាតិដោយស្របច្បាប់ និងយ៉ាងត្រឹមត្រូវ។ បើយើងទៅសុំសិទ្ធិពីលោក ហ៊ុន សែន ដើម្បីធ្វើនយោបាយវិញ នៅពេលនេះ មានន័យផងដែរថា យើងទទួលស្គាល់ថា ការចាប់ កឹម សុខា យកទៅឃុំឃាំងនៅថ្ងៃ៣ កញ្ញា ២០១៧ តាមបញ្ជាតុលាការដែលមានលោក ហ៊ុន សែន នៅពីក្រោយ ជាទង្វើស្របច្បាប់ និងត្រឹមត្រូវ»។
ទោះជាយ៉ាងណា លោកនាយករដ្ឋមន្ត្រី ហ៊ុន សែន បានលើកឡើងថា ច្បាប់បើកផ្លូវឲ្យអ្នកនយោបាយដែលតុលាការហាមឃាត់ បានធ្វើនយោបាយឡើងវិញ ជិតចូលជាធរមានហើយ។ លោកថា ច្បាប់នេះមិនលើកលែងទោសជាកញ្ចប់ទេ តែតម្រូវឲ្យបគ្គលម្នាក់ៗដាក់លិខិតសុំមករូបលោក ទៅក្រសួងមហាផ្ទៃ ឬទៅព្រះមហាក្សត្រ។
ប៉ុន្តែ មេដឹកនាំបក្សកាន់អំណាចរូបនេះ អះអាងថា លោកអរគុណចំពោះអ្នកនយោបាយដែលសម្រេចចិត្តមិនសុំសិទ្ធិធ្វើនយោបាយឡើងវិញ ។
អតីតគណបក្សសង្គ្រោះជាតិត្រូវបានតុលាការកំពូលប្រកាសរំលាយកាលពីថ្ងៃទី១៦ ខែវិច្ឆិកាឆ្នាំ២០១៧ និងបានហាមមន្ត្រីបក្សនេះ ១១៨នាក់ មិនឲ្យធ្វើនយោបាយរយៈពេល ៥ឆ្នាំ ក្រោយពីតុលាការបានចោទលោក កឹម សុខា ពីបទ «ក្បត់ជាតិ»។
ប៉ុន្តែ ចំណាត់ការនេះ សហរដ្ឋអាមេរិកគំរាមពង្រីកវិធានការបន្ថែមលើការដាក់ទណ្ឌកម្មទិដ្ឋាការ និងបង្កកទ្រព្យសម្បត្តិដល់ឥស្សរជនមួយចំនួនទៀត។
សហភាពអឺរ៉ុបក៏ព្រមានដកប្រព័ន្ធអនុគ្រោះពន្ធ EBA ពីកម្ពុជាវិញដែរ បើរដ្ឋាភិបាលមិនស្តារប្រជាធិបតេយ្យ និងបើកផ្លូវឲ្យគណបក្សប្រឆាំងបានដំណើរការឡើងវិញនោះ៕
