រដ្ឋាភិបាលសម្រេចបង្កើតតំបន់ការពារទេសភាព «បឹងលំកុដ» ជាង១០០ហិកតា នៅខេត្តរតនគិរី ដោយថា ដើម្បីកិច្ចគាំពារបរិស្ថាន ការអភិរក្សជីវៈចម្រុះ និងការប្រើប្រាស់ធនធានធម្មជាតិប្រកបដោយនិរន្តភាព។
អនុក្រឹតកាលពីថ្ងៃទី២៥ ខែធ្នូ ឆ្នាំ២០១៨ ដែលក្រសួងបរិស្ថានទើបតែផុសលើហ្វេសប៊ុក នៅថ្ងៃនេះរដ្ឋាភិបាលបានសម្រេចបង្កើតតំបន់ការពារទេសភាព «បឹងលំកុដ» នៅខេត្តរតនគិរីមានទំហំ ១១០,៩១ (មួយរយដប់ហិកតានិងកៅសិបមួយអា) ស្ថិតក្នុងភូមិសាស្ត្រ ឃុំសេដា ស្រុកលំផាត់ ខេត្តរតនគិរី។
អនុក្រឹតដែលបានចែងឲ្យក្រសួងបរិស្ថានជាអ្នកមានសមត្ថកិច្ចរៀបចំនិងគ្រប់គ្រងបន្តថា ការបង្កើតតំបន់នេះគឺដើម្បីធានាការថែរក្សានិងការពារសោភ័ណភាពធម្មជាតិ ប្រព័ន្ធអេកូឡូស៊ី ការពារលំនឹងបរិស្ថាន ថែរក្សាការពារវប្បធម៌ ប្រពៃណី ការអភិវឌ្ឍ និងសារៈសំខាន់ផ្នែកវប្បធម៌របស់សហគមន៍មូលដ្ឋានជាដើម។
អនុក្រឹតដដែលនេះបញ្ជាក់ថា ផ្ទៃដីតំបន់ការពារទេសភាព«បឹងលំកុដ»នេះ មិនរួមបញ្ចូលដីកម្មសិទ្ធិឯកជន និងដីប្រើប្រាស់ជាប្រយោជន៍សាធារណៈទេ។