ថ្នាក់ដឹកនាំប្រទេសកម្ពុជា-វៀតណាម បានប្តេជ្ញាចិត្តរួមគ្នាជាថ្មីថានឹងមិនផ្តល់ទឹកដីនៃប្រទេសខ្លួនឲ្យទៅជនណាឬ ប្រទេសណា ដើម្បីបំផ្លាញប្រទេសម្ខាងទៀតនោះឡើយ ខណៈថ្មីៗនេះសារព័ត៌មានបរទេសមួយចុះផ្សាយថាកម្ពុជាកំពុងផ្តល់ទីតាំងមូលដ្ឋានយោធាឱ្យប្រទេសចិន។
យោងតាមគេហទំព័ររបស់ក្រសួងមហាផ្ទៃ បានឱ្យដឹងថាក្រោយកិច្ចប្រជុំលើកទី១០ ស្តីពីកិច្ចសហប្រតិបត្តិការ និងការអភិវឌ្ឍបណ្តាខេត្តជាប់ព្រំដែនកម្ពុជា-វៀតណាម កាលពីថ្ងៃទី ៩ និង១០មករា នៅទីក្រុងហូជីមិញ រដ្ឋមន្ត្រីក្រសួងមហាផ្ទៃលោក ស ខេង និង ឧបនាយករដ្ឋមន្ត្រី រដ្ឋមន្រ្តីក្រសួងការបរទេស វៀតណាម លោក ផាម ប៊ិញមីញ បានរួមគ្នាចេញសេចក្តីប្រកាសមួយ។
ប្រភពដដែលបញ្ជាក់ចំណុចមួយ ក្នុងចំណោមចំណុចផ្សេងទៀតនៃសេចក្តីប្រកាសរួមនោះ ថាថ្នាក់ដឹកនាំប្រទេសទាំងពីរ ប្តេជ្ញាមិនអនុញ្ញាតឲ្យមានអង្គការចាត់តាំង ឬបុគ្គលណាមួយឬ ប្រទេសណាមួយប្រើប្រាស់ទឹកដីរបស់ប្រទេសម្ខាង ដើម្បីបង្កអន្តរាយដល់សន្តិសុខជាតិ និងស្ថិរភាពរបស់ប្រទេសម្ខាងទៀតនោះឡើយ។ មិនតែប៉ុណ្ណោះ ភាគីប្រទេសទាំងពីរបានសង្កត់ធ្ងន់អំពីសារៈសំខាន់នៃការថែរក្សាទំនាក់ទំនងជាមិត្តភាព និងសហប្រតិបត្តិការ បណ្តាខេត្តព្រំដែនកម្ពុជា-វៀតណាម និងពង្រឹងចំណងទំនាក់ទំនងក្នុងលក្ខណៈជាភូមិផងល្អប្រសើរ មិត្តភាពជាប្រពៃណី កិច្ចសហប្រតិបត្តិការលើគ្រប់វិស័យ ឋិតថេរ យូរអង្វែង រវាងកម្ពុជា-វៀតណាម ព្រមទាំងចំណុចមួយចំនួនទៀត។
សាស្ត្រាចារ្យផ្នែកកិច្ចការទូត និងកិច្ចការពិភពលោក នៃមហាវិទ្យាល័យ Occidental នៅសហរដ្ឋអាមេរិក និងជាអ្នកជំនាញគោលនយោបាយ លោក អៀ សុផល បានឱ្យ VOD តាមសារអេឡិចត្រូនិកអ៊ីមែលថា ការប្តេជ្ញាចិត្តរបស់ប្រទេសទាំងពីរ វាជាសញ្ញាមួយដែលបានបង្ហាញដថាកម្ពុជាបានទន់ទោរទៅជាមួយប្រទេសចិន ហើយថ្មីៗនេះរដ្ឋាភិបាលក្រុងភ្នំពេញដឹងថាអតីតអ្នកគាំទ្ររបស់ខ្លួន គឺវៀតណាមមិនសប្បាយចិត្តនឹងរឿងនេះទេ ទើបត្រូវប្តេជ្ញាបែបនេះ។
សាស្ត្រាចារ្យដដែល លើកឡើងថា ក្នុងដំណើរទស្សនៈកិច្ចមេដឹកនាំខ្មែរទៅវៀតណាមជាបន្តបន្ទាប់ ពុំមែនជារឿងចៃដន្យទេ ដោយថាវៀតណាមមិនសប្បាយចិត្តជាមួយរដ្ឋាភិបាលក្រុងភ្នំពេញនិងទាមទារឱ្យមានការធានាមួយឡើងវិញ។
លោកបន្ថែមថា៖« នៅពីក្រោយនៃដំណើរទស្សនៈកិច្ចថ្នាក់ដឹកនាំខ្មែរទៅកាន់វៀតណាមជាបន្តបន្ទាប់ ដោយថាប្រទេសកុម្មុយនីស្គមួយនេះព្រួយបារម្ភកាន់តែខ្លាំងឡើងថាកម្ពុជាបានបាត់បង់ទាំងស្រុងទៅប្រទេសចិន»។
ស្រដៀងគ្នានេះ អ្នកវិភាគនយោបាយ លោក ឯម សុវណ្ណារ៉ា មើលឃើញថាទំនាក់ទំនងកម្ពុជា-វៀតណាម ក្នុងរយៈពេលចុងក្រោយនេះ មានការប្រែប្រួលខ្លះ ក្រោយពេលកម្ពុជាកាន់តែជិតស្និតខ្លាំងជាមួយចិន។
បញ្ហានេះ លោកថា ធ្វើវៀតណាមកាន់តែបារម្ភ ហើយចង់ឱ្យកម្ពុជាបញ្ជាក់ជំហរបស់ខ្លួនឱ្យច្បាស់ ពិសេសបញ្ហាទាក់ទងព័ត៌មានមូលដ្ឋានយោធារបស់ចិននៅកម្ពុជា ដែលត្រូវបានរដ្ឋាភិបាលខ្មែរបដិសេធម្តងជាពីរដងរួចទៅហើយ។
លោកបន្ថែមថា៖ «កន្លែងនេះ វៀតណាមចង់ឱ្យកម្ពុជាបង្ហាញជំហនេះ ព្រោះបើមានកម្លាំងបរទេស ដូចជាចិននៅកម្ពុជា ធ្វើឱ្យវៀតណាមបារម្ភច្រើន ពាក់ព័ន្ធឥទ្ធិពល ពាក់ព័ន្ធជម្លោះសមុទ្រចិនខាងត្បូង ដែលជាបញ្ហាចំបង។ ចំណុចមួយទៀត ក៏វៀតណាមចង់រិតចំណងទាក់ទងរវាងកម្ពុជា-វៀតណាមហ្នឹងកុំឱ្យវាធូរ។ ធម្មតាទំនាក់ទំនងកាលណាមិនសូវមានទស្សនៈកិច្ចទៅវិញទៅមកទេ ទំនាក់ទំនង ឬ ការទូតកម្ពុជា-វៀតណាម វាហាក់ជារយាល។ អីចឹងហើយបានជាមានទស្សនៈកិច្ចរបស់ប្រមុខរដ្ឋ ប្រមុខរដ្ឋាភិបាល និងមន្ត្រីជាន់ខ្ពស់រដ្ឋាភិបាលទៅប្រទេសវៀតណាមជាបន្តបន្ទាប់»។
កាលពីពាក់កណ្តាលខែវិច្ឆិកា ២០១៨ សារព័ត៌មាន The Asia Times បានចុះផ្សាយអត្ថបទរបស់ខ្លួនមួយ ដែលមានចំណងជើងថា កម្ពុជាអាចក្លាយជាចំណុចស្នូលនៃសង្គ្រាមត្រជាក់ថ្មីមួយ ដោយថាកម្ពុជាងាកទៅរកចិនខ្លាំង និងឥតងាករេ។
អត្ថបទនោះអះអាងថា កម្ពុជាបានផ្តល់ដីសម្បទានសេដ្ឋកិច្ចទៅចិនជាង ៤៥.០០០ហិកតារ រយៈពេល ៩៩ឆ្នាំ នៅខេត្តកោះកុង ហើយចិនបានសាងសង់កំពង់ផែសមុទ្រទឹកជ្រៅ ដែលអាចឲ្យកប៉ាល់ចម្បាំងចិន ចូលចតបាន ដោយថានេះអាចជាមូលដ្ឋានយោធារបស់ចិនផងដែរ។ ប៉ុន្តែអត្ថបទនេះ ត្រូវបានមន្ត្រីរដ្ឋាភិបាលច្រានចោលជាបន្តបន្ទាប់។
ក្រោយពេលអត្ថបទនេះ ចេញផ្សាយ សកម្មភាពទស្សនៈកិច្ចរបស់ប្រមុខដឹកនាំ និងមន្ត្រីជាន់ខ្ពស់រដ្ឋាភិបាលកម្ពុជាទៅកាន់ប្រទេសវៀតណាមមានចំនួន៤ លើកមករួចហើយ ចាប់តាំងពីចុងខែវិច្ឆិកា ឆ្នាំ២០១៨ មក ដោយចាប់ផ្តើមពីរដ្ឋមន្ត្រីក្រសួងការបរទេស លោក ប្រាក់ សុខុន លោកនាយករដ្ឋមន្ត្រី ហ៊ុន សែន ព្រះមហាក្សត្រ និងចុងក្រោយរដ្ឋមន្ត្រីក្រសួងមហាផ្ទៃ លោក ស ខេង៕